ຂ່າວຫຼ້າສຸດ

ສະຖານີລົດໄຟສາຍໃຕ້ຄູນໝິງ ກັບຄວາມສຳຄັນຕໍ່ວຽກງານຄົມມະນາຄົມ

203 26 ມິ.ນ. 2018 ຫົວຂໍ້ຂ່າວອື່ນໆ
ສະຖານີລົດໄຟສາຍໃຕ້ຄູນໝິງ ກັບຄວາມສຳຄັນຕໍ່ວຽກງານຄົມມະນາຄົມ

     ນະຄອນ​ຄູນ​ໝິງ ແຂວງຢູນ​ນານ ຖື​ໄດ້​ວ່າ​ເປັນ​ຈຸດ​ເຊື່ອມຈອດ​ທາງ​ດ້ານ​ຄົມມະນາຄົມທີ່​ສຳຄັນ​ກໍ່​ວ່າ​ໄດ້ ເຮັດ​ໃຫ້​ພື້ນຖານ​ໂຄງ​ລ່າງ​ດ້ານ​ຕ່າງໆຂອງນະຄອນ​ຄູນ​ໝິງໄດ້​ຮັບ​ການ​ພັດທະນາ​ ສອດຄ່ອງ​ກັບ​ສະພາບການ​ພັດ​ທະ​ນາມ​ແຕ່​ລະ​ໄລຍະ ເພື່ອ ​ສ້າງ​ເງື່ອນ​ເຮັດ​ໃຫ້ການ​ພັດທະນາ​ເສດຖະກິດ​ກິດ-ສັງຄົມ​ມີ ການ​ຂະຫຍາຍຕົວ​ຢ່າງ​ຕໍ່​ເນື່ອງ ໃນ​ນັ້ນສະຖານີ​ລົດໄຟ​ສາຍ​ໃຕ້​ຄູນ​ໝິງແມ່ນ​ມີ​ຄວາມ​ສຳຄັນ​ທາງ​ດ້ານ​ຄົມ​ມະນາ​ຄົມ ເພື່ອ​ເຊື່ອມ​ຈອດ​ກັບ​ບັນດາ​ແຂວງ​ຕ່າງໆ ແລະ ສາມາດ​ເຊື່ອມ​ຈອດ​ກັບ​ຕ່າງໆ​ປະເທດ​ໃນພາກ​ພື້ນ​ນຳ​ອີກ ເຊິ່ງ​ການ​ພັດ​ທະດັ່ງກ່າວ​ນັ້ນ​ລ້ວນ​ແລ້ວແຕ່​ສອດຄ່ອງ​ກັບ​ນະໂຍບາຍ ໜຶ່ງ​ແລວ ໜຶ່ງ​ເສັ້ນທາງ ຂອງ​ພັກ-ລັດຖະ ບານ​ຈີນ.

    ອີງ​ຕາມ​ຂໍ້​ມູນ​ທີ່​ໄດ້​ຈາກ​ການ​ທັດສະນະ​ສຶກ​ສາ ໃນ​ໂອກາດ​ເຂົ້າ​ຮ່ວມສຳ​ມະ​ນາພະນັກງານ​ຂ່າວສານ ແລະ ນັກ​ໜັງສືພິມ ຄັ້ງ​ທີ 1 ໃນ​ກາງ​ເດືອນມິຖຸນາ 2018 ຜ່ານ​ມາ​ນີ້ ເຫັນ​ໄດ້​ວ່າ: ສະຖານີ​ລົດໄຟ​ສາຍ​ໃຕ້​ຄູນໝິງ ແມ່ນ​ມີ​ຄວາມ​ສຳຄັນ​ຫຼາຍຕໍ່ລະ ບົບ​ຄົມມະນາຄົມ​ທາງບົກ​ຂອງ​ແຂວງ​ຢູນ​ນານ ທີ່​ສາມາດເຊື່ອມຈອດ​ກັບ 8 ແຂວງ​ຂອງຈີນ ແລະ ຕ່າງປະເທດ​ອີກ 5 ສະຖານີ ເຊິ່ງ​ຖື​ໄດ້​ວ່າ​ເປັນ​ສະຖານີ​ລົດໄຟ​ທີ່​ໃຫຍ່​ທີ່​ສຸດ​ໃນ​ພາກຕາເວັນຕົກ​ສຽງ​ໃຕ້​ຂອງ ສປ ຈີນ ພ້ອມນັ້ນ​ ຍັງ​ມີ​ຄວາມ​ສຳຄັນຕໍ່​ບັນ​ດາໂຄງການ​ພັດທະນາພື້ນຖານ​ໂຄງ​ລ່າງ​ທາງ​ດ້ານ​ຄົມມະນາຄົມ​ທີ່​ສອດຄ່ອງ​ກັບ​ນະໂຍບາຍ ໜຶ່ງ​ແລວ ໜຶ່ງ​ເສັ້ນທາງ ເພື່ອ​ໃຫ້​ຢູນ​ນານສາມາດ​ເປີດ​ກວ້າງ ແລະ ເປັນ​ຈຸດ​ເຊື່ອມ​ໂຍງ​ລະຫວ່າງ ພາກ​ໃຕ້​ຂອງ​ຈີນ ກັບ​ບັນດາ​ປະ ເທດ​ອາຊີ​ໃຕ້.

    ສະຖານີ​ດັ່ງກ່າວ​ຕັ້ງ​ຫ່າງຈາກ​ເທສະບານ​ນະຄອນ​ຄູນ​ໝິງ 7 ກີ​ໂລ​ແມັດ ແລະ ຫ່າງ​ຈາກ​ສະຖານີ​ລົດໄຟ​ຄູນ​ໝິງ 28 ກີ​ໂລ​ແມັດ ການ​ອອກ​ແບບ​ໂຄງ​ສ້າງ​ອາຄານ​ຮອງ​ຮັບ​ຜູ້ໂດຍສານ​ແມ່ນ​ມີ​ີ​ຄວາມ​ເປັນ​ເອກະລັກ​ທີ່​ບົ່ງ​ບອກ​ເຖິງ​ວັດທະນະທຳ​ຄູນ​ໝິງ ກໍ່​ຄື ອາຄານ​ມີ​ຮູບ​ແບບ​ຄ້າຍຄື​ກັບ​ດອກ​ໄມ້​ສວຍ​ງາມ​ທີ່​ກຳລັງ​ເບັ່ງ​ບານ ແລະ ນົກ​ຍຸງ​ທີ່​ກຳລັງ​ພຶງ​ຂົນ (ຫາງ) ທີ່​ງົດ​ງາມ ເຊິ່ງ​ເປັນ​ເຄື່ອງໝາຍ​ໃຫ້​ກັບການ​ເປີດ​ກວ້າງ ໃນ​ການ​ຮ່ວມ​ມື ແລະ ການ​ບໍລິການ ພ້ອມນັ້ນຍັງມີ​ການ​ຈັດ​ວາງ​ຮູບ​ພາບ​ຂອງຄູນ​ໝິງ ເຊັ່ນ: ໄຂ່​ມຸກ ເຊິ່ງເປັນ ເຄື່ອງໝາຍ​ໃຫ້​ກັບ​ເມືອງ Yunnan-Guizhou Plateau ເຊິ່ງ ເປັນ​ເມືອງ​ທີ່​ມີ​ການ​ເຊື່ອມ​ໂຍງ​ກັບ​ບັນດາ​ແຂວງ​ພາຍ​ໃນ ແລະ ມີ​ການ​ເຊື່ອມ​ໂຍງ​ແລກປ່ຽນ​ກັບ​ຕ່າງປະເທດ ນອກ​ນັ້ນ​ກໍ່​ຍັງ​ເປັນ​ສູນ​ກາງຂອງ​ການ​ຄົມມະນາຄົມ​ຂົນສົ່ງ ແລະ ເປັນ​ປະຕູ​ສູ່​ອາຊີ​ໃຕ້​ນຳ​ອີກ.

    ສະຖານີ​ລົດໄຟ​ຄູນ​ໝິງ ເນື້ອທີ່​ຂອງ​ອາຄານ​ກວມ​ເອົາ 336.600 ຕາ​ແມັດ ປະກອບ​ມີ​ຈຸດ​ພັກ​ລົດ 16 ຈຸດ ແລະ ລົດໄຟ​ທັງ​ໝົດ 30 ຂະ​ບວນ ສາມາດ​ຮອງ​ຮັບ​ຜູ້ໂດຍສານ​ທີ່​ເຂົ້າ​ມາ​ໃຊ້​ບໍລິການ​ໄດ້ 120.000 ຄົນ​ຕໍ່​ວັນ ແລະ ຫຼາຍ​ສຸດ​ໄດ້​ເຖິງ 300.000 ຄົນ​ຕໍ່​ວັນ ນັບ​ແຕ່ປີ 2016 ເປັນຕົ້ນ​ມາ ສະຖານີລົດ ໄຟ​ແຫ່ງ​ດັ່ງກ່າວ​ໄດ້​ນຳ​ສົ່ງ​ຜູ້ໂດຍສານ​ໄດ້​ເຖິງ 10,28 ລ້ານຄົນ.

    ດ້ວຍ​ການ​ອອກ​ແບບ ເພື່ອ​ໃຫ້​ສາມາດ​ເຊື່ອມ​ຈອດ​ກັບ​ລົດ ໄຟ​ຄວາມ​ໄວ​ສູງ ເຮັດ​ໃຫ້​ແຂວງ​ຢູນ​ນານໃກ້ຊິດ​ກັບ​ບັນດາ​ແຂວງ​ຕ່າງໆ​ໃນ​ທົ່ວ​ປະເທດ​ຫຼາຍ​ຂຶ້ນ​ດ້ວຍ​ຂະ​ບວນ​ລົດໄຟ​ຄວາມ​ໄວ ສູງ ຈາກ​ເບື້ອງ​ຕົ້ນ​ທີ່​ມີ​ລົດ​ໄຟ ​ອອ​ກຈາກ-ເຂົ້າ​ມາ​ຄູນ​ໝິງມີ 22 ຄູ່​ຂະ​ບວນ​ເທົ່າ​ນັ້ນ ແຕ່​ກໍ່​ເພີ່ມ​ຂຶ້ນ​ມາ​ເປັນ 67 ຄູ່​ຂະ​ບວນ ສາມາດ​ໃຫ້​ບໍລິການ​ໄດ້​ເຖິງ 50.000 ບ່ອນ​ນັ່ງ​ຕໍ່​ວັນ ເຊິ່ງ​ປາຍທາງ​ມີ​ເຖິງ 17 ເມືອງ​ຂອງ​ບັນດາ​ແຂວງ ​ເຊັ່ນ: ປັກ​ກິງ ຊາງ​ໄຮ ແລະ Changsha.

ຂ່າວທີ່ກ່ຽວຂ້ອງ