ຂ່າວຫຼ້າສຸດ

ເມສຊີ ຂໍຈັດທີມເອງ ເກມຊີ້ຊະຕາກັບ ນີເຊຣີ

151 25 ມິ.ນ. 2018 ວົງຈອນກີລາ
 ເມສຊີ ຂໍຈັດທີມເອງ ເກມຊີ້ຊະຕາກັບ ນີເຊຣີ

          ນັກເຕະອາກຊັງຕິນ ຢຶດອຳນາດຈາກ ຄໍເກ ຊາມເປົາລີ ຜູ້ຈັດການໃຫຍ່ທີມຊາດເປັນທີ່ຮຽບຮ້ອຍ ໂດຍໃນເກມນັດຊີ້ຊະຕາກັບນິເຊຣີ ລີໂອເນວ ເມສຊີ ແລະ ໝູ່ເພື່ອນ ຈະຈັດທີມ ແລະ ວາງແຜນການຫຼີ້ນກັນເອງ ຫຼັງຈາກທີ່ມີຂ່າວວ່ານັກເຕະທີມຊາດອາກຊັງຕິນສະແດງຄວາມບໍ່ພໍໃຈ ຊາມເປົາລີ ຜູ້ຈັດການທີມອາກຊັງຕິນ ຫຼັງເກມທີ່ພ່າຍແພ້ກຣົວຊີ 0-3 ເນື່ອງຈາກໂຍນຄວາມຜິດໃຫ້ນັກເຕະທຸກຄົນໃນທີມ ທີ່ບໍ່ສາມາດຫຼິ້ນໄດ້ຕາມແຜນທີ່ວາງໄວ້ໃຫ້ເມສຊີ ເປັນສູນກາງເຄື່ອນເກມນັ້ນ.

          ຫຼ້າສຸດ ສື່ໃນອັງກິດລາຍງານວ່າ ຄວາມຂັດແຍ່ງພາຍໃນທີມຍັງໜັກຂຶ້ນເລື້ອຍໆ ໂດຍ ຣິກາໂດ ກຸສຕິ ອະດີດນັກເຕະຊຸດແຊັມໂລກປີ 1986 ເປີດເຜີຍວ່າ ໄດ້ລົມກັບ ຮໍເກ ບູກຊາກາ ຜູ້ຈັດການທົ່ວໄປຂອງສະຫະພັນເຕະບານອາກຊັງຕິນ ແລະ ຊາບວ່ານັກເຕະຈະເລືອກວາງຕົວຜູ້ຫຼິ້ນກັນເອງແລ້ວ ໂດຍບໍ່ໄດ້ສົນໃຈການມີຢູ່ຂອງ ຊາມເປົາລີ ອີກຕໍ່ໄປ.

          “ນັກເຕະຈະຕັດສິນໃຈກັນເອງໃນທີມ ຖ້າຊາມເປົາລີ ຈະນັ່ງຢູ່ຂ້າງສະໜາມນໍາກໍໄດ້ ແຕ່ຖ້າບໍ່ ກໍບໍ່ແມ່ນບັນຫາຂອງພວກເຂົາ” ກຸສຕິກ່າວວ່າ ທາງສະມາຄົມຊີ້ແຈງວ່າຈະບໍ່ມີການປົດຊາມເປົາລີ ເນື່ອງຈາກຈະສູນເສຍເງິນຄ່າຊົດເຊີຍຫຼາຍເຖິງ 20 ລ້ານໂດລາສະຫະລັດ.

          ໂດຍລາຍງານຂ່າວລະບຸວ່າ ເມສຊີ ແລະ ມາສເຊຣາໂນ ໃນຖານະນັກເຕະອາວຸໂສ ເປັນຫົວໂປ່ໃນການເລືອກຕັດສິນໃຈແບບນີ້ເພື່ອໂອກາດສຸດທ້າຍຂອງ ອາກຊັງຕິນ ໃນເຕະບານໂລກ.

           ທັ້ງນີ້ ໃນລະຫວ່າງການເຝິກຊ້ອມເມື່ອວັນທີ 24 ມິຖຸນາທີ່ຜ່ານມາ ຊາມເປົາລີ ຍັງຄຸມການຊ້ອມປົດກະຕິ ລວມທັງກອດ ແລະຫອມແກ້ມເມສຊີ ເພື່ອອວຍພອນວັນເກີດຄົບຮອບປີທີ 31 ອີກດ້ວຍ.

ຂ່າວທີ່ກ່ຽວຂ້ອງ