ຂ່າວຫຼ້າສຸດ

ລະວັງພະຍາດທີ່ມາກັບລະດູຝົນ-ວິທີປ້ອງກັນ

228 25 ມິ.ນ. 2018 ຫົວຂໍ້ຂ່າວອື່ນໆ
ລະວັງພະຍາດທີ່ມາກັບລະດູຝົນ-ວິທີປ້ອງກັນ

    ໄລຍະ​ນີ້​ແມ່ນ​ກ້າວ​ເຂົ້າ​ສູ່​ລະດູຝົນ ອາກາດ​ເຢັນ​ລົງ ແລະ ມີ​ຄວາມ​ຊູ່ມ​ຊື່ນ​ສູງ ຝົນຕົກ​ຕິດຕໍ່​ກັນ​ເປັນ​ເວລາ​ຫຼາຍ​ວັນ ເຮັດ​ໃຫ້​ນ້ຳ​ຖ້ວມ​ຂັງ​ຕາມ​ພື້ນ​ທີ່​ຕ່າງໆ ເຮັດ​ໃຫ້ການ​ດຳເນີນ​ຊີວິດ​ມີ​ຄວາມ​ຫຍຸ້ງຍາກ ແລະ ທີ່​ສຳຄັນ​ຍັງ​ນຳ​ເອົາ​ພະຍາດ​ຕ່າງໆ​ນຳ​ອີກ ເພາະສະນັ້ນ​ເຮົາ​ຄວນ​ຈະ​ຮັກສາ​ສຸຂະພາບ ແລະ ຄວນ​ຮູ້ຈັກ​ວິທີ​ປ້ອງ​ກັນ​ພະຍາດ​ທີ​ຈະ​ມາ​ກັບ​ລະດູຝົນ ເພື່ອ​ໃຫ້​ພະຍາດ​ເຫຼົ່າ​ນີ້​ຫ່າງ​ໄກ​ຈາກ​ພວກ​ເຮົາ.

    ສຳລັບ​ພະຍາດ​ທີ່​ມາ​ກັບ​ລະດູຝົນ ປະກອບ​ມີ ພະຍາດ​ໄຂ້​ຫວັດ: ສາເຫດ​ເກີດ​ມາ​ຈາກ​ເຊື້ອ​ໄວ​ຣັດ ແລະ ແບັກ​ທີ​ເຣຍ ໃນ​ອາກາດ.

    ວິທີ​ປ້ອງ​ກັນ: ຫຼີກ​ລ້ຽງ​ການ​ປ່ຽນແປງ​ອຸນຫະພູມ​ຂອງ​ຮ່າງກາຍ​ຢ່າງ​ກະທັນຫັນ ບໍ່​ຕາກ​ຝົນ​ເປັນ​ເວລາ​ດົນ ເວລາ​ອອກ​ຈາກ​ເຮືອນ​ຄວນ​ຖື ຄັນຮົ່ມ ຫຼື ຜ້າ​ຢາງ​ທຸກ​ຄັ້ງ ຫຼີກ​ລ້ຽງ​ການ​ຢູ່​ກັບ​ຄົນ​ຈຳນວນ​ຫຼາຍ ບໍລິເວນ​ອາກາດ​ຖ່າຍ​ເທ​ບໍ່​ສະດວກ ເວລາ​ປຽກ​ຄວນ​ປ່ຽນ​ເສື້ອ​ຜ້າ​ທັນທີ ບໍ່​ຄວນ​ປະ​ໄວ້​ເປັນ​ເວລາ​ດົນ ແລະ ເຊັດ​ຕົວ​ໃຫ້​ແຫ້ງ.

    ພະຍາດ​ຖອກທ້ອງ: ສາເຫດ​ເກີດ​ມາ​ຈາກ ກິນ​ອາຫານ​ທີ່​ປົນ​ເປື້ອນ​ກັບ​ເຊື້ອ​ພະຍາດ.

    ວິທີ​ປ້ອງ​ກັນ: ກິນ​ອາຫານ​ໃຫ້​ຖືກ​ຫຼັກ​ອະ​ນາໄມ ໂດຍ​ສະເພາະ ດື່ມນ້ຳ​ທີ່​ສະອາດ ລ້າງ​ມື​ກ່ອນ​ກິນ​ອາຫານ ເກັບ​ອາຫານ ແລະ ເຄື່ອງໃຊ້​ໃຫ້​ຫ່າງ​ຈາກ​ສັດ ແລະ ແມງໄມ້​ທີ່​ເປັນ​ພາຫະນະ​ແຜ່​ເຊື້ອ ເຊັ່ນ: ແມງວັນ ແມງ​ສາບ ແລະ ໜູ.

     ພະຍາດ​ທີ່​ມາ​ຈາກ​ຍຸງ​ເປັນ​ພາຫະນະ: ເຊີ່ງ​ຈະ​ໃຫ້​ເກີດ​ພະຍາດ​ໄຂ້ເລືອດອອກ ສະໝອງ​ອັກເສບ ແລະ​ມາລາ​ເຣຍ ສາເຫດ​ເກີດ​ມາ​ຈາກ​ການ​ທີ່​ຖືກ​ຍຸງ​ກັດ

    ວິທີ​ປ້ອງ​ກັນ: ບໍ່​ໃຫ້​ຍຸງ​ກັດ ນອນ​ໃນ​ມຸ້ງ ແລະ ທຳລາຍ​ແຫຼ່ງ​ເຜາະ​ພັນ​ຂອງ​ຍຸງ ເຊັ່ນ:  ອ່າງ​ນ້ຳ ຕີນລົດ​ເກົ່າ ກະ​ປ໋ອງ ຕິດ​ຕະ​ໜ່າງ​ກັນ​ຍຸງ​ໃສ​ປະຕູ​ເຮືອນ ຖ້າວ່າ​ມີ​ຄົນ​ໃນ​ຄອບຄົວ​ມີ​ອາການ​ເປັນໄຂ້ ໂດຍ​ບໍ່​ຮູ້​ສາເຫດ​ແນ່ນອນ 2-3 ວັນ​ຄວນ​ນຳໄປ​ພົບ​ແພດ​ໂດຍ​ດ່ວນ.

    ພະຍາດ​ຜິວໜັງ: ສາເຫດ​ເກີດ​ຈາກ​ການ​ແຊ່​ນ້ຳ​ເປັນ​ເວລາ​ດົນ ເຊີ່ງ​ຈະ​ເຮັດ​ໃຫ້​ເຊື້ອ​ພະຍາດ​ແຊກ​ຊຶມ​ຜ່ານ​ຜິວໜັງ ເລັບ ງ່າມ​ມື ຕີນ ແລະ ຂາ​ໜີບ.

     ວິທີ​ປ້ອງ​ກັນ: ບໍ່​ຄວນ​ໃຫ້​ຜິວໜັງ​ປຽກ​ເປັນ​ເວລາ​ດົນ​ຕິດຕໍ່​ກັນ ເມື່ອ​ແຊ່​ນ້ຳ​ເວລາ​ດົນໆ​ຄວນ​ເຊັດ​ໃຫ້​ແຫ້ງ​ທັນທີ.

ພະຍາດ​ຕາແດງ: ສາເຫດ​ເກີດ​ຈາກ​ເຊື້ອ​ໄວ​ຣັດ ແບັກ​ທີ​ເລຍ ຈາກ​ນ້ຳ​ເປື້ອນ​ເຂົ້າ​ຕາ ແລະ ມື​ທີ່​ເປື້ອນ​ມາ​ສີ​ຕາ ຜູ້​ເປັນ​ພະຍາດ​ຕາແດງ​ຈະ​ເລີມ​ມີ​ອາການ​ເຄືອງ​ຕາ ຄັນ​ໃນ​ຕາ ຕາ​ເລີ່ມ​ຈະ​ແດງ​ຂຶ້ນ​ເລື້ອຍໆ.

ວິທີ​ປ້ອງ​ກັນ: ລ້າງ​ມື​ໃສ່​ສະບູ​ທຸກ​ຄັ້ງ​ຫຼັງ​ຈາກ​ຈັບ​ສິ່ງ​ເປິ​​ະ​ເປື້ອນ ຄວນ​ຢູ່​ຫ່າງ​ຈາກ​ຄົນ​ທີ່​ເປັນ​ພະຍາດ ຖ້າ​ມີ​ຝຸ່ນ​ເປື້ອນ​ເຂົ້າ​ຕາ ຄວນ​ລ້າງ​ດ້ວຍ​ນ້ຳ​ສະອາດ.

ຂ່າວທີ່ກ່ຽວຂ້ອງ