ໄປ​ຢາມ​ບ້ານ​ເຜົ່າ​ໄຕ ປະ​ທັບ​ໃຈ​ຫຼາຍ​ສິ່ງ

258 25 ມິ.ນ. 2018 ຫົວຂໍ້ຂ່າວອື່ນໆ
ໄປ​ຢາມ​ບ້ານ​ເຜົ່າ​ໄຕ ປະ​ທັບ​ໃຈ​ຫຼາຍ​ສິ່ງ

    ເມື່ອ​ກ່ອນ​ກໍ່​ໄດ້​ຍິນ​ຄຳ​ເວົ້າ​ຈາກ​ປາກ​ຕໍ່ປາກ​ວ່າ ຢູ່​ແຂວງ​ຢູນ​ນານ ສປ ຈີນ ມີ​ເຜົ່າ​ໄຕ ທີ່​ມີ​ວິຖີ​ການ​ດຳລົງ​ຊີວິດ​ທີ່​ຄ້າຍຄື​ກັບ​ຄົນ​ລາວ ລວມ​ເຖິງ​ພາສາ​ໃນ​ການ​ປາກ​ເວົ້າ​ທີ່​ມີ​ຫຼາຍ​ຄຳ​ທີ່​ຄ້າຍຄື​ກັນ ແລະ ສາມາດ​ສື່ສານ​ກັນ​ໄດ້ ແຕ່​ໃນ​ເວລາ​ນັ້ນ​ກໍ່​ຟັງ​ແລ້ວ​ກໍ່​ຄິດ​ສົນໃຈ ແຕ່​ເມື່ອ​ໄດ້​ມາ​ສຳ​ພັດ​ໂຕ​ຈິງ ແມ່ນ​ເປັນ​ຄື​ຫຼາຍ​ຄົນ​ໄດ້​ຊາ​ລື​ກັນ​ມາ​ຍິ່ງ​ຮູ້ສຶກ​ປະ​ທັບ​ໃຈ.

    ໃນ​ໂອກາດ​ຜູ້​ຂຽນ​ເອງ​ໄດ້ຮ່ວມສຳ​ມະ​ນາ ພະນັກງານສື່ສານ-ນັກ​ຂ່າວ​ໜັງສືພິມ ແມ່ນ້ຳ​ລ້ານ​ຊ້າງ-ແມ່ນ້ຳ​ຂອງ ຄັ້ງ​ທີ 1     ທີ່​ນະຄອນ​ຄູນ​ໝິງ ກໍ່​ໄດ້ມີໂອກາດ​ເດີນທາງ​ໄປ​ໄປ​ຢ້ຽມຢາມ ບ້ານ​ເຜົ່າ​ໄຕ ບ້ານ​ມາງ​ຕວນ (Mangtuan Village) ພໍ​ແຕ່​ຄະ ນະ​ໄດ້​ເດີນທາງ​ໄປ​ຮອດ​ກໍ່​ໄດ້​ຖືກ​ຮັບ​ຕ້ອນ​ຢ່າງ​ອົບ​ອຸ່ນ ພ້ອມ​ໄດ້​ຊົມ​ຫ້ອງ​ວາງສະແດງ​ມູນເຊື້ອ ຫ້ອງ​ວາງສະແດງ​ຜະລິດ​ຕະ​ພັນ​ຫັດຖະກຳ ພ້ອມ​ນັ້ນ​ກໍ່​ໄດ້​ຮັບ​ຊົມ​ການສະແດງ​ສິລະ​ປະ​ທີ່​ບົ່ງ​ບອກ​ເຖິງ​ທີ່​ບົ່ງ​ບອກ​ເຖິງ​ວິຖີ​ການ​ດຳລົງ​ຊີວິດ​ຂອງ​ຄົນ​ເຜົ່າ​ໄຕ ພາຍຫຼັງ​ທີ່​ໄດ້​ຢ້ຽມ-ຮັບ​ຊົມ​ການສະແດງເຫັນ​ໄດ້​ວ່າ​ວັດທະນະທຳ ແລະ ປະເພນີ​ຂອງ​ເຜົ່າ​ໄຕມີ​ຫຼາຍ​ສິ່ງຄ້າຍຄື​ກັບ​ເຜົ່າ​ໄຕ​ດຳຢູ່​ລາວ​ເຮົາ ລວມ​ເຖິງ​ພາສາ​ໃນ​ການ​ປາກ​ເວົ້າ​ມີ​ຫຼາຍ​ຄຳ ຫຼາຍ​ປະໂຫຍກ​ທີ່​ສາມາດ​ສື່ສານ​ກັນ​ໄດ້. 

    ບ້ານ​ດັ່ງກ່າວ​ແມ່ນ​ມີ​ຊື່ວ່າ ບ້ານ​ມາງ​ຕວນ (Mangtuan Village) ຕັ້ງ​ຢູ່ເຂດ​ເມັງ​ດິງ ເຂດ​ປົກຄອງ​ເຂດ​ປົກຄອງເກັງມາເມືອງ​ຫຼິນ​ຊາງ ທີ່​ຕັ້ງ​ຢູ່ຫ່າງຈາກ​ໃຈ​ກາງຂອງ​ເຂດ​ເມັງ​ດິງ 9 ກິ ໂລແມັດ ພາຍ​ໃນ​ບ້ານ​ດັ່ງກ່າວ ​ມີ​ທັງ​ໝົດ 171 ຄົວ​ເຮືອນ ມີປະຊາກອນ​ທັງ​ໝົດ 820 ຄົນ ໃນນັ້ນ ​ປະກອບ​ມີ ເຜົ່າ​ໄຕ ເຜົ່າຮັ້ນ ແລະ ເຜົ່າ​ວ້າ ແຕ່ເຜົ່າ​ໄຕ​ແມ່ນ​ກວມ​ເຖິງ 90% ຂອງປະຊາກອນ.

    ປະຊາຊົນ​ພາຍ​ໃນ​ບ້ານ​ອາ​ໄສ​ການ​ເຮັດ​ຫັດຖະກຳ​ເຈ້ຍສາ​ຈາກ​ຕົ້ນ​ມອນ ເປັນ​ການ​ສ້າງ​ລາຍ​ຮັບ​ເສີມ​ໃຫ້​ກັບ​ຄອບ​ຄົວ ປັດ​ຈຸບ​ັັນ​ມີ​ປະຊາຊົນ​ໄດ້​ເຮັດ​ຫັດຖະກຳ​ດັ່ງກ່າວ​ເຖິງ 120 ຄົນ ຈາກ​ຄວາມ​ເອົາໃຈໃສ່​ໃນ​ການ​ຜະລິດ ເຮັດ​ໃຫ້​ບ້ານ​ດັ່ງກ່າວ​ເປັນ​ທີ່​ຮູ້ຈັກ​ກັນ​ດີ​ຂອງ​ສັງຄົມ ແລະ ເປັນ​ອັນ​ດັບ 1 ຂອງ​ບ້ານ​ເຜົ່າ​ໄຕ ໃນ ສປ ຈີນ ທີ່​ໄດ້​ເຮັດ​ຫັດຖະກຳ​ເຈ້ຍສາ​ຈາກ​ຕົ້ນ​ມອນ ເຊິ່ງ​ໃນ​ປີ 2006  ແລະ ກໍ່​ໄດ້ເລີ່ມ​ຜະລິດ​ເຈ້ຍ​ຈາກ​ເປືອກ​ຂອງ​ຕົ້ນ​ມອນຈົນ​ກາຍ​ເປັນ​ຫັດຖະກຳ​ທີ່​ມີ​ຊື່ື່​ສຽງ.

    ອີງ​ຕາມ​ການ​ບອກເລົ່າ ຫັດຖະກຳ​ດັ່ງກ່າວ​ແມ່ນ​ມີ​ປະ​ຫວັດ​ຄວາມ​ເປັນ​ມາ​ເປັນ​ເວລາ​ເຖິງ 600 ປີ ຜ່ານ​ມາ ທີ່​ໄດ້​ບັນທຶກໃນ​ ປື້ມ Qi Min Yao Shu ເຮັດໃຫ້​ ກຳ​ມະ​ວິທີ ແລະ ຂັ້ນ​ຕອນຕ່າງໆ ທີ່​ລວມ​ມີ 11 ຂັ້ນ​ຕອນ​ຂອງ​ຫັດຖະກຳ​ເຈ້ຍສາ​ຈາກ​ຕົ້ນມອນ ແມ່ນ​ໄດ້​ຖືກ​ສືບ​ທອດມາ​ຫຼາຍ ເຊັ່ນຄົນ​ຈົນ​ມາ​ເຖິງ​ປັດຈຸບັນ.

ຈາກ​ມູນເຊື້ອ​ດັ່ງກ່າວ ເຮັດ​ໃຫ້​ປະຊາຊົນ​ພາຍ​ໃນ​ບ້ານສາມາດ​ສ້າງ​ລາຍ​ຮັບ​ໄດ້​ຫຼາຍ​ລ້ານ​ກີບ​ຕໍ່​ຄອບຄົວ​ຕໍ່​ເດືອນ​ຈາກການ​ ຂາຍ​ຜະລິດ​ຕະ​ພັນ​ຈາກ​ເຈ້ຍ​ທີ່​ຜະລິດ​ຂຶ້ນ​ພາຍ​ໃນ​ບ້ານ ທີ່​ມີ​ຜູ້​ສົນໃຈ​ຮັບ​ໄປ​ຈຳໜ່າຍ​ຢູ່​ບັນດາ​ແຂວງ​ຂອງ ສປ ຈີນ ຈາກຄວາມນິຍົມ​ຊົມ​ຊອບ​ຂອງ​ຫັດຖະກຳ​ເຈ້ຍສາ​ຈາກ​ຕົ້ນ​ມອນ ທີ່​ເຫັນ​ໄດ້​ວ່າ​ຕະຫຼາດ​ນັບ​ມື້​ມີ​ການ​ເຕີບ​ໃຫຍ່ ເຮັດ​ໃຫ້​ປີ 2017 ປະຊາຊົນ​ພາຍ​ໃນ​ບ້ານ​ດັ່ງກ່າວ ກໍ່​ຄື ສະມາຊິກ​ກຸ່ມ​ຫັດຖະກຳ ໄດ້​ສຸມ​ໃສ່​ຜະ​ລິດ​ເຈ້ຍ​ໄດ້​ເຖິງ 1,5 ລ້ານ​ແຜ່ນ ແລະ ສາມາດ​ສ້າງ​ລາຍ​ຮັບ​ເຖິງ 4 ລ້ານ​ຢວນ ຫຼື 5 ຕື້​ກວ່າ​ກີບ.

    ນັ້ນ​ເປັນ​ສິ່ງ​ທີ່​ໜ້າ​ປະ​ທັບໃຈ ນອກຈາກ​ວັດທະນະທຳ ແລະ ຮີດຄອງ​ປະເພນີ​ຂອງ​ເຜົ່າ​ໄຕ ກໍ່​ຍັງ​ມີ​ຫັດຖະກຳທີ່​ສາມາດສ້າງ​ ລາຍ​ຮັບ​ໃຫ້​ກັບ​ປະຊາຊົນ​ພາຍ​ໃນ​ບ້ານ ທີ່​ສາມາດ​ປະກອບສ່ວນ​ເຂົ້າ​ໃນ​ການ​ປັບປຸງ​ຊີວິດ​ການ​ເປັນ​ຢູ່​ຂອງ​ປະຊາຊົນນັ້ນ​ຖື​ໄດ້​ວ່າ​ເປັນ​ບົດຮຽນ​ທີ່​ຄວນ​ເອົາ​ເປັນ​ແບບຢ່າງ​ໃນ​ການ​ສົ່ງເສີມ​ປະຊາຊົນ​ໃນ​ການ​ຜະລິດ​ເປັນ​ສິນຄ້າ ສ້າງ​ລາຍ​ຮັບ​ໃຫ້​ກັບ​ຊຸມ​ຊົນ ກໍ່​ຄື ຄອບຄົວ​ຂອງ​ປະຊາຊົນ. 

ຂ່າວທີ່ກ່ຽວຂ້ອງ