ອາເຈນຕິນາອາການໂຄມ່າ ຖືກໂຄຣເອເຊຍ ຖະຫຼົ່ມ 3-0 ສ່ຽງຕົກຮອບ

351 22 ມິ.ນ. 2018 ວົງຈອນກີລາ
ອາເຈນຕິນາອາການໂຄມ່າ ຖືກໂຄຣເອເຊຍ ຖະຫຼົ່ມ 3-0 ສ່ຽງຕົກຮອບ

        "ເມສຊີ" ແຜງລິດບໍ່ອອກ ເຮັດໃຫ້ພ່າຍແພ້ແກ່ "ໂຄຣເອເຊຍ" ຢ່າງຂາດລອຍ 3-0.

          ເຕະບານໂລກ 2018 ຮອບແບ່ງກຸ່ມຮອບທໍາອິດ ນັດ 2 ກຸາມ D ເມື່ອວັນພະຫັດທີ 21 ມິຖຸນາ ທີ່ສະໜາມນິຊນີ ນອຟໂກຣັອດ ເມືອງນິຊນີ ນອຟໂກຣັອດ ປະເທດຣັດເຊຍ ລະຫວ່າງອາກຊັງຕິນ ທີ່ນຳທັບໂດຍນັກເຕະຊື່ກ້ອງໂລກ ລິໂອເນວ ເມສຊີ ດວນຝີຕີນກັບ ໂຄຣເອເຊຍ ທີ່ເຕັມໄປດ້ວຍດາວດັງຢ່າງ ລູກາ ໂມດຣິຊ, ອິວານ ຣາຄິຕິຊ, ອິວານ ເປຣິຊິຊ, ມາຣິໂອ ມານຊູຄິຊ ຜົນການແຂ່ງຂັນປາກົດວ່າ ຂຸນພົນໂຄຣເອເຊຍງັດຟອມສຸດຢອດອອກມາສະແດງ ໄລ່ຖະຫຼົ່ມອາເຈນຕິນາໝົດສະພາບ 3-0 ເກມຮັບຈັບ ເມສຊີ ຢູ່ໝັດ ແຜງລິດບໍ່ອອກເລີຍ ໂດຍໂຄຣເອເຊຍໄດ້ປະຕູຈາກ ອັນເຕ ເຣບິຊ ນາທີ 53, ລູກາ ໂມດຣິຊ ນາທີ 80 ແລະ ອິວານ ຣາຄິຕິຊ ໄລຍະທົດແທນເວລາບາດເຈັບນາທີ 90+1 ເຮັດໃຫ້ພວກເຂົາຊະນະ 2 ນັດຊ້ອນ ເກັບ 6 ຄະແນນເຕັມ ໄດ້ສິດຜ່ານເຂົ້າສູ່ຮອບຕັດເຊືອກ 16 ທີມສຸດທ້າຍແນ່ນອນແລ້ວ ສ່ວນ ອາເຈນຕິນາ ມີ 1 ຄະແນນ ຈາກ 2 ນັດ ອາການໂຄມ່າ ຕ້ອງໄປລຸ້ນໜັກໃນນັດສຸດທ້າຍທີ່ຈະພົບກັບ ໄນຈີເຣຍ ຊຶ່ງ ອາກຊັງຕິນຕ້ອງເອົາຊະນະໃຫ້ໄດ້ ແລະ ລຸ້ນອີກຄູ່ໃຫ້ຜົນການແຂ່ງຂັນເປັນໃຈດ້ວຍ.

          ສຳລັບເກມນັດສຸດທ້າຍ ອາເຈນຕິນາ ຈະພົບກັບ ໄນຈີເຣຍ ສ່ວນ ໂຄຣເອເຊຍ ພົບກັບ ໄອຊ໌ແລນ ໂດຍທັງ 2 ຄູ່ເຕະພ້ອມກັນ ເວລາ 01.00 ມ. ວັນທີ 26 ມິຖຸນານີ້.

ຂ່າວທີ່ກ່ຽວຂ້ອງ