ເອັມບັບເປ ຍິງຊ່ວຍຝຣັ່ງຊະນະເປຣູ ທະລຸສູ່ຮອບ 16 ທີມ

243 22 ມິ.ນ. 2018 ວົງຈອນກີລາ
ເອັມບັບເປ ຍິງຊ່ວຍຝຣັ່ງຊະນະເປຣູ ທະລຸສູ່ຮອບ 16 ທີມ

          “ເອັມບັບເປ" ຍິງໜຶ່ງປະຕູ ຊ່ວຍຝຣັ່ງຊະນະ ເປຣູ ໄປຢ່າງຫວຸດຫວິດ 1-0 ຊະນະ 2 ນັດຊ້ອນ ຄວ້າສິດຜ່ານເຂົ້າສູ່ຮອບຕັດເຊືອກ 16 ທີມສຸດທ້າຍຮຽບຮ້ອຍ.

          ການແຂ່ງຂັນເຕະບານໂລກ 2018 ຮອບແບ່ງກຸ່ມຮອບທໍາອິດ ນັດ 2 ກຸ່ມ C ເມື່ອວັນພະຫັດທີ 21 ມິຖຸນາທີ່ສະໜາມເຊັນທຣັນ ເມືອງເຢຄາເຕຣິນເບິກ ປະເທດຣັດເຊຍ ລະຫວ່າງ ຝຣັ່ງ ຕົວແທນຈາກເອີຣົບ ວັດຝີຕີນກັບ ເປຣູ ຕົວແທນຈາກອາເມຣິກາໃຕ້ ຜົນການແຂ່ງຂັນປາກົດວ່າ ຝຣັ່ງຊະນະ ຄວ້າໄຊເໜືອ ເປຣູ ໄປໄດ້ຢ່າງຫວຸດຫວິດທີ່ສຸດ 1-0 ໂດຍໄດ້ປະຕູົຊຈາກ ຄິລິຢັນ ເອັມບັບເປ ກອງໜ້າດາວຮຸ່ງ ໄວ 19 ປີ 6 ເດືອນ ໃນນາທີ 34 ເຮັດໃຫ້ ເອັມບັບເປ ສ້າງປະຫວັດສາດເປັນນັກເຕະອາຍຸນ້ອຍທີ່ສຸດຂອງຝຣັ່ງ ທີ່ຍິງປະຕູໄດ້ໃນເຕະບານລາຍການຍິ່ງໃຫຍ່ (ບານໂລກ+ເອີໂຣ).

          ໄຊຊະນະເກມນີ້ ເຮັດໃຫ້ ຝຣັ່ງຄວ້າໄຊ 2 ນັດຊ້ອນ ມີ 6 ຄະແນນເຕັມ ຜ່ານເຂົ້າສູ່ຮອບຕັດເຊືອກ 16 ທີມສຸດທ້າຍເປັນທີມທີ 3 ຕໍ່ຈາກເຈົ້າພາບ ຣັດເຊຍ ແລະ ອຸຣຸກວາຍ ສ່ວນ ເປຣູ ພ່າຍແພ້ 2 ນັດຊ້ອນ ບໍ່ມີຄະແນນ ຕົກຮອບເປັນທີມທີ 4 ຕໍ່ຈາກ ໂມຣົກໂກ, ເອຢິບ ແລະ ຊາອຸດີອາຣະເບຍ.

        ສະຫຼຸບຄະແນນຂອງກຸ່ມ C ຫຼັງເຕະຜ່ານໄປ 2 ນັດ

          1. ຝຣັ່ງ 6 ຄະແນນ

          2. ດານມາກ 4 ຄະແນນ

          3. ອົດສະຕຣາລີ  1 ຄະແນນ

          4. ເປຣູ ບໍ່ມີຄະແນນ

          ສຳລັບເກມນັດສຸດທ້າຍ ຝຣັ່ງຈະພົບກັບ ດານມາກ ຫາກສະເໝີກັນ ຈະຈູງມືເຂົ້າຮອບ ສ່ວນ ເປຣູ ພົບກັບ ອົດສະຕຣາລີ ຊຶ່ງທາງອົດສະຕຣາລີຕ້ອງເອົາຊະນະໃຫ້ໄດ້ ແລ້ວໄປລຸ້ນໃຫ້ ດານມາກ ພ່າຍແພ້ ຝຣັ່ງ ໂດນທັງ 2 ນັດ ເຕະວັນທີ 26 ມິຖຸນາທີ່ຈະມາເຖິງນີ້.

ຂ່າວທີ່ກ່ຽວຂ້ອງ