ນັກສຳມະນາກອນປະເທດແມ່ນ້ຳລ້ານຊ້າງ-ແມ່ນ້ຳຂອງ ສຳເລັດການແລກປ່ຽນບົດຮຽນ

129 22 ມິ.ນ. 2018 ຫົວຂໍ້ຂ່າວອື່ນໆ
ນັກສຳມະນາກອນປະເທດແມ່ນ້ຳລ້ານຊ້າງ-ແມ່ນ້ຳຂອງ ສຳເລັດການແລກປ່ຽນບົດຮຽນ

ນັກ​ສຳ​ມະ​ນາ​ກອນ​ຈາກ​ປະເທດ​ແມ່ນ້ຳ​ລ້ານ​ຊ້າງ-ແມ່ນ້ຳຂອງ ເຊັ່ນ: ຈີນ ກຳປູເຈຍ ລາວ ມຽນ​ມາ ແລະ ໄທ ໄດ້ສຳເລັດ​ການ​ສຳ​ມະ​ນາ​ພະນັກງານ​ສື່ສານ​ມວນ​ຊົນ ແລະ ນັກ​ໜັງສືພິມ ປະເທດ​ແມ່ນ້ຳ​ລ້ານ​ຊ້າງ-ແມ່ນ​ນ້ຳຂອງ ຄັ້ງ​ທີ 1 ໃນ​ຫົວຂໍ້ ສາຍ​ນ້ຳ-ຄອບຄົວ​ດຽວ​ກັນ (One River One Family) ເຊິ່ງ​ການ​ສຳ​ມະ​ນາ​ຄັ້ງ​ນີ້ ຈັດ​ຂຶ້ນ​ໃນ​ລະຫວ່າງ​ວັນ​ທີ 11-19 ມິຖຸນາ 2018 ທີ່​ນະຄອນ​ຄູນ​ໝິງ ແຂວງ​ຢູນ​ນານ ​ສປ ຈີນ.

ທ່ານ ຢາງ ຣຸນ ຫົວໜ້າ​ບັນນາ​ທິ​ການ ກຸ່ມ​ກິດຈະການ​ໜັງສື​ພິມ​ລາຍ​ວັນ ແຂວງ​ຢູນ​ນານ (ນັບ​ຈາກ​ຊ້າຍ​ມື) ກ່າວ​ວ່າ: ຕະຫຼອດ​ໄລຍະ 9 ວັນ ແມ່ນ​ໄດ້​ຮັບ​ການ​ສະໜັບສະໜູນ​ຈາກ​ພະແນກ​ຮ່ວມ​ມື​ສາກົນ​ຂອງ​ອົງການ​ບໍລິຫານ​ສື່ ການ​ພິມ ວິທະຍຸ​ກະຈາຍ​ສຽງ ສາລະ​ຄະດີ ໂທລະພາບ​ຂອງ​ລັດ​ຢູ່​ໃນ ​ສປ ຈີນ ແລະ ບັນດາ​ພະນັກງານ​ສື່ສານ​ມວນ​ຊົນ-ນັກ​ຂ່າວ​ຈາກ​ປະເທດ​ແມ່ນ​ນ້ຳຂອງ ຈຳນວນ 15 ຄົນ ທີ່​ໄດ້​ເຂົ້າ​ມາ​ຮ່ວມ​ແລກ​​ປ່ຽນ​ປະສົບ​ການ​ດ້ານ​ສື່ ແລະ ເປັນ​ເຈົ້າ​ການ​ໃນ​ການ​ປະສານ​ງານ​ຮ່ວມ​ມື​ເປັນ​ຢ່າງ​ດີ ພ້ອມ​ນັ້ນ ໃນ​ໄລຍະ​ຂອງ​ການ​ສຳ​ມະ​ນາ ນັກ​ສຳ​ມະ​ນາ​ກອນ​ຍັງ​ໄດ້​ມີ​ໂອກາດ​ເຂົ້າຮ່ວມ​ພິທີ​ເປີດ​ງານ​ວາງສະແດງ ຈີນ-ອາຊີ​ໃຕ້ ຄັ້ງ​ທີ 5 ແລະ ງານ​ຕະຫຼາດນັດ ສົ່ງເສີມ​ການ​ນຳ​ເຂົ້າ-ສົ່ງ​ອອກ​ຂອງ​ຄູນ​ໝິງ ໄດ້​ຢ້ຽມຢາມ​ໂຄງການ​ກໍ່ສ້າງ​ພື້ນຖານ​ໂຄງ​ລ່າງ ແລະ ການ​ພັດທະ​ນາ​ເສັ້ນທາງ​ຄົມມະນາຄົມ​ທີ່​ມີ​ຄວາມ​ສຳຄັນ​ ໃນ​ການ​ເຊື່ອມ​ຕໍ່​ກັບ​ພາກ​ພື້ນ ແລະ ໄດ້​ເຂົ້າ​ຮ່ວມ​ຮັບ​ຟັງ​ການ​ບັນ​ລະ​ຍາຍ​ທີ່​ສ້າງ​ຄວາມ​ເຂົ້າໃຈ​ຢ່າງ​ເລິກເຊິ່ງ​ຕໍ່​ກັບ​ນະໂຍບາຍ ໜຶ່ງ​ແລວ ໜຶ່ງ​ເສັ້ນທາງ ລວມ​ໄປ​ເຖິງ​ການຮ່ວມ​ມື​ບັນດາ​ປະເທດ​ແມ່ນ້ຳ​ລ້ານ​ຊ້າງ-ແມ່ນ້ຳ​ຂອງ ການ​ພັດທະ​ນາ​ວຽກ​ງານ​ສື່​ຂອງ ສປ ຈີນ ລະບົບ​ການ​ປະສານ​ງານ​ຮ່ວມ​ມື​ກັບ​ສາກົນ​ຂອງ​ສື່​ມວນ​ຊົນ​ແຂວງ​ຢູນ​ນານ ແລະ ຍັງ​ໄດ້​ຮຽນ​ຮູ້ ໄດ້​ເຮັດ​ວຽກ​ຕົວ​ຈິງ​ໃນ​ການ​ຜະລິດສື່​ຕ່າງໆ​ຮ່ວມ​ກັນ.

ທ່ານ ຢາງ ຣຸນ ຍັງ​ໄດ້​ກ່າວຕື່ມ​ວ່າ: ຂ້າພະເຈົ້າ​ເຊື່ອ​ວ່າ​ຫຼັງ​ຈາກ​ການ​ເຂົ້າ​ຮ່ວມ​ສຳ​ມະ​ນາຄັ້ງ​ນີ້ ນັກ​ສຳ​ມະ​ນາ​ກອນ​ແມ່ນໄດ້​ຮຽນ​ຮູ້ ແລະ ເຂົ້າໃຈ​ຫຼາຍ​ຂຶ້ນກ່ຽວ​ກັບ​ຢູນ​ນານ ແລະ ໃນ​ຖານະ​ທີ່​ພວກ​ເຮົາ​ເປັນ​ເຈົ້າພາບ ​ໃນ​ການ​ຈັດ​ສຳ​ມະ​ນາ​ຄັ້ງ​ນີ້ ພວກ​ເຮົາ​ກໍ່​ຮູ້ສຶກ​ດີໃຈ​ຫຼາຍ​ທີ່​ໄດ້​ຮູ້​ກ່ຽວ​ກັບ​ຢູນ​ນານ​ໃນ​ມູມ​ມອງ​ຂອງ​ບັນດາ​ທ່ານ ຜ່ານ​ການ​ສ້າງ​ຜະລິດຕະ​ພັນ​ສື່ ແຕ່​ມັນ​ສະແດງ​ເຖິງຄວາມ​ເປັນ​ມື​ອາຊີບ​ຂອງ​ບັນດາ​ທ່ານ ແລະ ຂ້າພະເຈົ້າ​ຫວັງ​ວ່າ ພວກ​ເຮົາ​ຄວນ​ມິ​ການ​ພົວພັນ​ຮ່ວມ​ມື​ຢ່າງ​ຕໍ່​ເນື່ອງ ເພື່ອ​ການ​ພັດທະນາ ແລະ ແນວ​ຄວາມ​ຄິດ​ໃໝ່​ເຂົ້າ​ໃນ​ວຽກ​ງານ​ສື່ສານ​ມວນ​ຊົນ ໃຫ້​ມີ​ປະສິດ​ທີ​ພາບ ແລະ ປະ​ສິດທິ​ຜົນ.

ທ່ານ ສະ​ຖາ​ພັດ ແພ​ທອງ ນັກ​ຂ່າວ​ໜັງສືພິມ​ເນ​ຊັນ ປະເທດ​ໄທ ກ່າວ​ວ່າ: ຕະຫຼອດ​ໄລຍະ 9 ວັນ​ຜ່ານ​ມາ ແມ່ນ​ເປັນ​ໂອກາດ​ອັນ​ດີ​ຫຼາຍ​ ທີ່​ພວກ​ເຮົາ​ໄດ້​ຮຽນ​ຮູ້​ເຖິງ​ການ​ເຕີບ​ໃຫຍ່​ຂະຫຍາຍຕົວ​ຂອງ​ວຽກ​ງານ​ສື່​ມວນ​ຊົນ ແລະ ຮຽນ​ຮູ້​ຫຼາຍ​ສິ່ງ​ກ່ຽວ​ກັບ​ແຂວງ​ຢູນ​ນານ ໂດຍ​ສະເພາະ ການ​ພັດທະນາ​ເສດຖະກິດ-ສັງຄົມ ທັງ​ໃນ​ໄລຍະ​ຍາວ-ໄລຍະ​ສັ້ນ ແລະ ການ​ພັດທະນາ​ຂົງເຂດ​ອື່ນໆ ຢ່າງໃດ​ກໍ່​ຕາມ ຕະຫຼອດ​ໄລຍະ​ການ​ເຂົ້າ​ຮ່ວມ​ຊຸດ​ສຳ​ມະ​ນາ​ຄັ້ງ​ນີ້ ພວກ​ເຮົາ​ໄດ້​ເຂົ້າ​ຮ່ວມ​ທຸກ​ກິດຈະກຳ​ຢ່າງ​ຕັ້ງໜ້າ ​ທີ່​ລ້ວນ​ແລ້ວແຕ່​ທີ່​ມີ​ຄວາມ​ສຳຄັນ​ໃນ​ການ​ແລກປ່ຽນ​ຄວາມ​ຄິດ​ເຫັນ​ດ້ານ​ການ​ຮ່ວມ​ມື ແລະ ເພີ່ມ​ທະວີ​ຄວາມ​ເຂົ້າໃຈ​ລະຫວ່າງບັນຫາ​ກ່ຽວ​ກັບ​ບັນດາ​ປະເທດ​ພາກ​ພື້ນ​ແມ່ນ້ຳ​ຂອງ ແລະ ທິດຕາເວັນຕົກ​ສ່ຽງ​ໃຕ້​ຂອງ ​ສປ ຈີນ.

ໂດຍ: ສ.ແສງ​ງາມ

ຂ່າວທີ່ກ່ຽວຂ້ອງ