ມີ​ຜູ້​ອົບ​ພະ​ຍົບ​ກວ່າ 68 ລ້ານ​ຄົນ ໃນ​ປີ 2017

87 22 ມິ.ນ. 2018 ຂ່າວຕ່າງປະເທດ
ມີ​ຜູ້​ອົບ​ພະ​ຍົບ​ກວ່າ 68 ລ້ານ​ຄົນ ໃນ​ປີ 2017

     ສື່ສານ​ໃນ​ເຢຍ​ລະ​ມັນ ອ້າງ​ຕາມ​ຕົວ​ເລກ​ສະຖິຕິ​ໃໝ່​ຂອງ​ສະຫະ​ປະຊາ​ຊາດ (​ສປຊ) ຊີ້​ໃຫ້​ເຫັນ​ເມື່ອ​ວັນ​ທີ 19 ມິຖຸນາ​ນີ້​ວ່າ ໃນ​ປີ 2017 ມີ​ຜູ້​ທີ່​ຕ້ອງ​ໄດ້​ອົບ​ພະ​ຍົບ​ເຖິງ 68,5 ລ້ານ​ຄົນ ຊຶ່ງ​ໂດຍ​ສະເລ່ຍ​ແລ້ວ​ໃນ 2 ວິນາທີ​ໃດ ແມ່ນ​ມີ​ຜູ້​ຕ້ອງ​ໄດ້​ອົບ​ພະ​ຍົບ 1 ຄົນ ຍ້ອນ​ເກີດ​ສົງຄາມ ເຫດການ​ຮຸນ​ແຮງ ແລະ ການ​ກໍ່​ການ​ຮ້າຍ. ໃນ​ນັ້ນ ກະແສ​ຄື້ນ​ອົບ​ພະ​ຍົບ​ໃໝ່ ເລີ່ມ​ມາ​ຈາກ​ວິ​ກິດ​ການ ຢູ່​ໃນ​ມຽນ​ມາ ​ສປ ກົງ​ໂກ ແລະ ຊີ​ຣີ.

    ​ສປຊ ໃຫ້​ຮູ້​ວ່າ ວິ​ກິດ​ການ​ຢູ່​ໃນ​ເຂດ​ຕ່າງໆ ອັນ​ປະກອບ​ມີ ຊູ​ດານ​ໃຕ້ ກົງ​ໂກ ແລະ​ຊີ​ຣີ ຕະຫຼອດ​ຮອດ​ການ​ອົບ​ພະ​ຍົບ​ຂອງ​ຊາວ​ໂຣ​ຮິງ​ຢາ​ຈາກ​ມຽນ​ມາ ທີ່​ເກີດ​ຂຶ້ນ​ໃນ​ປີ 2017 ລວມ​ແລ້ວ​ໄດ້​ເພີ່ມ​ຂຶ້ນ​ເປັນ 65,6 ລ້ານ​ຄົນ. ທ່ານ ຟີ​ລິບ​ໂປ ກຣັນ​ດີ ຂ້າ​ຫຼວງ​ໃຫຍ່ ​ສປຊ ກ່ຽວ​ກັບ​ຜູ້​ລີ້​ໄພ ເວົ້າ​ວ່າ ປະມານ 70% ຂອງ​ຈຳນວນ​ຜູ້​ທີ່​ພວມ​ອົບ​ພະ​ຍົບ​ນັ້ນ ແມ່ນ​ມາ​ຈາກ 10 ປະເທດ.

    ບົດ​ລາຍ​ງານ​ຂອງ ​ສປຊ ໃຫ້​ຮູ້​ວ່າ ຈຳນວນ​ຜູ້​ລີ້​ໄພ​ທີ່​ກັບ​ຄືນ​ບ້ານ​ເດີມ​ໃນ​ປີ 2017 ມີ​ຢູ່ 667.400 ຄົນ ທຽບໃສ່​ປີ 2016 ທີ່​ມີ 552.000 ຄົນ ຊຶ່ງ​ກວມ​ເອົາ 3% ຂອງ​ຍອດ​ຈຳນວນ​ຜູ້​ລີ້​ໄພ. ໃນ​ຂະນະ​ດຽວ​ກັນ 85% ຂອງ​ຈຳນວນ​ຜູ້​ລີ້​ໄພ ພວມ​ຢູ່​ໃນ​ບັນດາ​ປະ​ເທດ​​ບໍ​ພັດທະນາ ໂດຍ​ທີ່​ຫຼາຍ​ຄົນ ໃນ​ພວກ​ເຂົາ ຢູ່​ໃນ​ສະພາບ​ທຸກ​ຍາກ ແລະ ​ສ່ວນ​ໃຫຍ່​ເປັນ​ຄົນ​ຊີ​ຣີ ອາ​ຟະ​ກາ​ນິດ​ສະຖານ ຊູ​ດານ​ໃຕ້ ມຽນ​ມາ ໂຊ​ມາລີ ຊູ​ດານ ແລະ​ກົງ​ໂກ.

 

ຂ່າວທີ່ກ່ຽວຂ້ອງ