ຂ່າວຫຼ້າສຸດ

ສາມພາກສ່ວນຮ່ວມມືກັນ ພັດທະນາສີມືຄູເຝິກຊ່າງໄມ້

186 22 ມິ.ນ. 2018 ຂ່າວໜ້າ​ໜຶ່ງ
ສາມພາກສ່ວນຮ່ວມມືກັນ ພັດທະນາສີມືຄູເຝິກຊ່າງໄມ້

ພິທີ​ເຊັນ​ບົດ​ບັນທຶກ​ຄວາມ​ເຂົ້າໃຈ ​ຮ່ວມ​ມື​ຈັດ​ຕັ້ງ​ປະຕິບັດໂຄງການ​ພັດທະນາ​ສີມື​ຄູ​ເຝິກ​ຊ່າງ​ໄມ້​ ໂຮງຮຽນ​ອາຊີວະ​ສຶກ​ສາ​ໃນ​ປະເທດ​ລາວ ລະຫວ່າງສະ​ຖາ​ບັນ​ພັດທະນາ​ອາຊີວະ​ສຶກ​ສາ ກັບອົງການ​ອາສາ​ສະໝັກ​ນາໆຊາດ​ຍີ່ປຸ່ນ (IV-JAPAN) ແລະ ສະມາຄົມ​ເຟີ​ນີ​ເຈີ​ລາວ ຈັດ​ຂຶ້ນ​ວັນ​ທີ 20 ມິຖຸນາ 2018 ທີ່​ສະຖານທີ່​ທ່ອງ​ທ່ຽວ​ທຳ​ມະ​ຊາດ​ນ້ຳຕົກຕາດ​ຊອນ ເມືອງ​ນາ​ຊາຍ​ທອງ ນະຄອນຫຼວງ​ວຽງ​ຈັນ ຮ່ວມ​ລົງ​ນາມ​ລະຫວ່າງທ່ານ ພູ​ວຽງ ພູ​ມາໄລ ຜູ້ອຳນວຍການ​ສະ​ຖາ​ບັນ​ພັດທະນາອາຊີວະ​ສຶກ​ສາ ທ່ານ ຮີ​ໂຣ​ຊິ ອີ​ມູ​ຣະ ຫົວໜ້າ​ໂຄງການ IV-JAPAN ແລະ ທ່ານ ຄຳ​ໄພ ສົມ​ຊະນະ ປະທານ​ສະມາຄົມ​ເຟີ​ນີ​ເຈີ​ລາວ ມີ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ​ເປັນ​ສັກຂີ​ພິຍານ.

ທ່ານ ພູ​ວຽງ ພູ​ມາໄລ ກ່າວ​ວ່າ: ການ​ລົງ​ນາມ​ຮ່ວມ​ມື​ຄັ້ງ​ນີ້ ແນໃສ່​ເຝິກອົບຮົມ​ຄູ​ລາວ ໂດຍ​ການ​ເຊີນ​ເອົາ​ຄູ​ຊ່າງ​ໄມ້ໃນ​ຂອບ​ເຂດ​ທົ່ວ​ປະເທດ 10 ຄົນ ສະມາຄົມ​ເຟີ​ນີ​ເຈີ​ລາວ 2 ຄົນ ແລະ ສະ​ຖາ​ບັນ​ພັດທະນາ​ອາຊີວະ​ສຶກ​ສາ 2 ຄົນ ລວມ​ທັງ​ໝົດ 14 ຄົນ ເພື່ອ​ມາ​ເຝິກອົບຮົມ​ໃນ​ໄລຍະ​ພັກແລ້ງ ຈະ​ໃຊ້​ເວລາ 2 ເດືອນ​ເຄິ່ງ ໂດຍ​ການ​ນຳ​ເອົາ​ວິທີ​ການ​ຜະລິດ​ຊ່າງ​ໄມ້ ເປັນຕົ້ນແມ່ນ​ເຕັກ​ໂນ​ໂລ​ຊີ​ຈາກ​ຍີ່ປຸ່ນ​ມາ​ເຝິກອົບຮົມ​ໃຫ້​ຄູ​ລາວ ໃຫ້​ມີ​ຄວາມ​ສາມາດ​ນຳ​ເອົາ​ບົດຮຽນ​ໄປ​ສືບຕໍ່​ສິດສອນ ​ຢູ່​ໃນ​ບັນດາ​ໂຮງຮຽນ​ອາຊີວະ​ສຶກ​ສາ ເຊິ່ງ​ການ​ເຝິກອົບຮົມ​ຈະ​ແບ່ງ​ອອກ​ເປັນ 2 ຊຸດ​ຄື: ຊຸດ​ທີ 1 ເລີ່ມ​ແຕ່​ເດືອນ​ມິຖຸນາ​ຫາ​ເດືອນສິງຫາ 2018 ແລະ ຊຸດ​ທີ 2 ໄລຍະ​ພັກແລ້ງ​ປີ 2019 ສຳລັບ​ຜູ້​ທີ່​ຈະ​ເຂົ້າ​ເຝິກອົບຮົມ​ຕ້ອງ​ເປັນ​ຄູ​ທີ່​ມີ​ວິຊາ​ສະເພາະ​ຊ່າງ​ໄມ້​ລະດັບ​ໜຶ່ງ​ແລ້ວ ເພື່ອ​ມາ​ຮຽນ​ຮູ້​ເອົາ​ຄວາມ​ຮູ້​ຄວາມ​ສາມາດ ແລະ ທັກ​ສະ​ຈາກ​ຊ່ຽວຊານ​ຍີ່ປຸ່ນ​ທີ່​ມາ​ຖອດ​ຖອນ​ໃຫ້.

ຂ່າວທີ່ກ່ຽວຂ້ອງ