ນະຄອນຫຼວງ ເລັ່ງເອົາຜັກຕົບອອກຈາກຄອງບຶງທາດຫຼວງ ໃຫ້ສຳເລັດທ້າຍເດືອນນີ້ເພື່ອຕ້ານຖ້ວມ

171 22 ມິ.ນ. 2018 ຂ່າວໜ້າ​ໜຶ່ງ
ນະຄອນຫຼວງ ເລັ່ງເອົາຜັກຕົບອອກຈາກຄອງບຶງທາດຫຼວງ ໃຫ້ສຳເລັດທ້າຍເດືອນນີ້ເພື່ອຕ້ານຖ້ວມ

ປັດຈຸບັນ​ນະຄອນຫຼວງ​ວຽງ​ຈັນ (ນວ) ໄດ້​ເລັ່ງ​ເອົາ​ຜັກ​ຕົບ​ອອກ​ຈາກ​ຮ່ອງ​ລະບາຍ​ນ້ຳ​ຕ່າງໆ ໂດຍ​ສະເພາະ​ແມ່ນ​ຄອງ​ບຶງ​ທາດຫຼວງ ​ທີ່​ເປັນ​ສິ່ງ​ກີດຂວາງ​ການ​ໄຫຼ​ຂອງ​ນ້ຳ ເພື່ອ​ປ້ອງ​ກັນ​ນ້ຳ​ຖ້ວມ​ຕົວ​ເມືອງ​ນະຄອນຫຼວງ​ວຽງ​ຈັນ ໃນ​ລະດູຝົນ​ປີ 2018 ພ້ອມ​ນີ້ ຍັງ​ໄດ້​ແຈ້ງ​ໃຫ້​ບໍລິສັດ ແລະ ຜູ້​ປະກອບ​ການ​ທີ່​ຈົກ​ດິນ​ຄອງ​ບຶງ​ທາດຫຼວງ ​ຢຸດ​ຈົກ​ດິນ​ກ່ອນ​ກຳນົດ 45 ວັນ ຕາມ​ແຜນ​ແລ້ວ​ແມ່ນ​ຮອດ​ວັນ​ທີ 30 ມິຖຸນາ 2018 ຈຶ່ງ​ໃຫ້​ຢຸດ​ຈົກ​ດິນ ພ້ອມ​ທັງ​ແກ້​ໄຂ​ຈຸດ​ທີ່​ຕົນ​ເອງ​ຕັນ​ແລວ​ນ້ຳ​ອອກ​ໃຫ້​ໝົດ ​ເພື່ອ​ເຮັດ​ໃຫ້​ນ້ຳ​ໄຫຼ​ສະດວກ ເນື່ອງ​ຈາ​ກວ່າ​ລະດູຝົນ​ປີ​ນີ້​ມີ​ຝົນຕົກ​ແຕ່​ຫົວປີ ແຕ່​ຈະ​ໄປ​ຕໍ່​ສັນຍາ​ໃນ​ກາງ​ເດືອນ​ພະຈິກ ຫາວັນ​ທີ 30 ທັນວາ 2018 ເພື່ອ​ເປັນ​ການ​ຊົດ​ເຊີຍ​ເວລາ​ທີ່​ໂຈະ​ໄປ​ກ່ອນ​ໜ້າ​ນີ້.

ທ່ານ ສາຍ​ຄຳ ແພງ​ຄຳ​ມີ ຫົວໜ້າ​ຂະແໜງ​ຊົນລະປະທານ ພະ​ແນກ​ກະສິກຳ ແລະ ປ່າໄມ້ ນວ ໄດ້​ໃຫ້​ສຳພາດ ວັນ​ທີ 21 ມິຖຸນາ 2018 ວ່າ: ຜ່ານ​ການຈັດຕັ້ງ​ປະຕິບັດ​ໂຄງການ​ລວງ​ຄອງ​ສຸກ​ເສີນ ໄດ້​ມີ​ຜູ້​ສະເໜີ​ມາ​ລວງ​ຄອງ​ເພື່ອ​ບໍ່​ໃຫ້​ນ້ຳ​ຖ້ວມຂັງ​ມີ​ທັງ​ໝົດ 11 ບໍລິສັດ ແລະ 30 ຜູ້​ປະກອບ​ການ ແລະ ມາ​ຮອດ​ປັດຈຸບັນ​ ການ​ບຸກ​ທະລຸ​ຄອງ​ສຳເລັດ ມີ​ຄວາມ​ຍາວ 42.035 ແມັດ ເທົ່າ​ກັບ 29,8% ຂອງ​ໜ້າ​ວຽກ​ທັງ​ໝົດ ໃນ​ນັ້ນ ຢູ່​ເຂດ​ເມືອງ​ໄຊ​ເຊດ​ຖາ ແບ່ງ​ອອກ​ເປັນ 9 ໄລຍະ ມີ​ຄວາມ​ຍາວ​ທັງ​ໝົດ 19 ພັນ​ແມັດ ມີ 1 ບໍລິສັດ 8 ຜູ້​ປະກອບ​ການ ເມືອງ​ສີ​ສັດຕະ​ນາກ ແບ່ງ​ອອກ​ເປັນ 2 ໄລຍະ ມີ​ຄວາມ​ຍາວ​ທັງ​ໝົດ 2 ພັນ​ແມັດ ມີ 1 ບໍລິສັດ ແລະ 1 ຜູ້​ປະກອບ​ການ ບຸກ​ທະລຸ​ອະນາໄມ​ຜັກ​ຕົບ ແລະ ຕະ​ກອນ​ສຳເລັດ 100% ເມືອງ​ຫາດ​ຊາຍ​ຟອງ ແບ່ງ​ອອກ​ເປັນ 5 ໄລຍະ ມີ​ຄວາມ​ຍາວ​ທັງ​ໝົດ 7.076 ແມັດ ມີ 3 ບໍລິສັດ 15 ຜູ້​ປະກອບ​ການ ບຸກ​ທະລຸ​ອະນາໄມ​ຜັກ​ຕົບ ແລະ ຕະ​ກອນ​ອອກ​ສຳເລັດ 11.059 ແມັດ ແລະ ເມືອງ​ນາ​ຊາຍ​ທອງ ແບ່ງ​ອອກ​ເປັນ 4 ຈຸດ ມີ​ຄວາມ​ຍາວ 18 ພັນ​ແມັດ ມີ 3 ບໍລິສັດ 1 ຜູ້​ປະກອບ​ການ ບຸກ​ທະລຸ​ປະຕິບັດ ສຳເລັດ 100%.

ມາ​ຮອດ​ວັນ​ທີ 14 ພຶດສະພາ 2018 ຄະນະ​ກຳມະການ​ຮັບຜິດຊອບ​ໂຄງການ​ດັ່ງກ່າວ ກໍ່​ໄດ້​ລົງ​ກວດກາ​ປະ​ເມີນ​ເນື່ອງ​ຈາກ​ປີ​ນີ້​ຝົນຕົກ​ໄວ ຈຶ່ງ​ໄດ້​ຫ້າງ​ແຈ້ງ​ການ​ເຖິງ​ຜູ້​ປະກອບ​ການ​ຢຸດ​ເຊົາ​ການຈັດຕັ້ງ​ປະຕິບັດ ແລະ ກ່ອນ​ຈະ​ຢຸດ​ເຊົາ​ກໍ່​ໄດ້​ໄປ​ແນະນຳ​ໃຫ້​ຜູ້​ປະກອບ​ການ​ທະລຸ​ຄູ​ທີ່​ຜູ້​ປະກອບ​ການ​ສ້າງ​ຂຶ້ນ​ຊົ່ວຄາວ ເພື່ອຈົກ​ເອົາ​ດິນ ມາ​ຮອດ​ປັດຈຸບັນ​ນີ້ ​ບັນດາ​ຄູ​ດັ່ງກ່າວ ​ໄດ້​ຈັດ​ຕັ້ງ​ປະຕິບັດ​ສຳເລັດ​ໂດຍ​ພື້ນຖານ​ຍັງ​ເຫຼືອ​ແຕ່​ບາງຈຸດ​ເທົ່າ​ນັ້ນ ເປັນຕົ້ນ ຢູ່​ເຂດ​ຂົວ​ບຶງ​ຂົວ​ນາ​ຄວາຍ ເມືອງ​ໄຊ​ເຊດ​ຖາ ເຊິ່ງ​ຂະແໜງການ​ພວກ​ເຮົາ​ສົມທົບ​ກັບເມືອງ​ໄຊ​ເຊດ​ຖາ ໄດ້​ເຊື້ອ​ເຊີນ​ເອົາ​ຜູ້​ປະກອບ​ການ​ມາ​ລຸ​ລ່ວງ​ເພື່ອ​ແກ້​ໄຂ​ໃຫ້​ສຳເລັດ ນອກ​ນີ້ ຍັງ​ໄດ້​ສືບຕໍ່​ສົມທົບ​ກັບ​ອຳນາດ​ການ​ປົກຄອງ​ເມືອງ ແລະ ຜູ້​ປະກອບ​ການ​ນຳ​ໃຊ້​ແຮງ​ງານ​ຄົນ ແລະ ກົນ​ຈັກ​ເຮັດ​ອະ​ນາໄມ​ຜັກ​ຕົບ​ຢູ່ 3 ຈຸດ​ຄື: ເຂດ​ຂົວ​ໜອງ​ໜ່ຽງ ເຂດ​ຂົວ​ຊຳ​ເຄ້ ແລະ ຂົວ​ທາດຫຼວງ​ທີ່​ໄດ້​ຈັດ​ຕັ້ງ​ປະຕິບັດ​ມາແລ້ວ​ໃນ​ໄລຍະ​ຜ່ານ​ມາ ແລະ ສືບຕໍ່​ຈັດ​ຕັ້ງ​ປະຕິບັດ​ໃຫ້​ສຳເລັດ​ໃນ​ທ້າຍ​ເດືອນ​ມິຖຸນາ​ນີ້ ເພື່ອ​ບໍ່​ໃຫ້​ມີ​ນ້ຳຖ້ວມ​ຂັງ​ຢູ່​ເຂດ​ຕົວ​ເມືອງ​ວຽງ​ຈັນ ​ພາຍຫຼັງ​ໝົດ​ລະດູຝົນ​ກໍ່​ຈະ​ໄດ້​ໃຫ້​ຜູ້​ປະກອບ​ການ​ສືບຕໍ່​ຈັດ​ຕັ້ງ​ປະຕິບັດ ບັນດາ​ໜ້າ​ວຽກ​ທີ່​ຍັງ​ຄົງ​ຄ້າງ​ຕື່ມ​ອີກ ແລະ ຈະ​ໃຫ້​ສຳເລັດ​ພາຍ​ໃນ​ປີ​ນີ້ ສຳລັບ​ວຽກ​ລວງ​ຄອງ​ລະບາຍ​ນ້ຳ​ສຸກ​ເສີນ​ທີ່​ມີ​ຄວາມ​ກວ້າງ 50 ແມັດ ເນື່ອງ​ຈາກ​ນະຄອນຫຼວງ​ມີ​ແຜນ​ວຽກ​ງານ​ລວງ​ຄອງ​ລະບາຍ​ນ້ຳ​ຖາວອນ ໃນ​ອະນາຄົດ​ຂ້າງ​ໜ້າ​ມີ​ຄວາມ​ກວ້າງ 150 ແມັດ ດັ່ງນັ້ນ​ໂຄງການ​ນີ້​ຈະ​ໄດ້​ສົມທົບ​ກັບ​ພາກສ່ວນ​ກ່ຽວຂ້ອງ ເປັນຕົ້ນແມ່ນ​ພະ​ແນກ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ລົງ​ສຳ​ຫຼວດ​ກວດກາ​ຄືນໃໝ່​ກ່ຽວ​ກັບ​ທີ່​ດິນ​ຢູ່​ຕາມ​ແຄມ​ບຶງ​ແຄມ​ຄອງ ທີ່​ມີ​ໃບ​ສິດ​ນຳ​ໃຊ້​ທີ່​ດິນ​ທີ່​ອອກ​ໃຫ້​ໃນ​ໄລຍະ​ຜ່ານ​ມາ​ອີກ​ຂັ້ນ​ຕອນ​ໜຶ່ງ ກ່ອນ​ທີ່​ຈະ​ກ້າວ​ໄປ​ສູ່​ການຈັດຕັ້ງ​ປະຕິບັດ​ວຽກ​ງານ​ດັ່ງກ່າວ​ ໃຫ້​ສຳເລັດ​ຕາມ​ແຜນການ​ພັດທະນາ​ຂອງ ນວ.

ຂ່າວທີ່ກ່ຽວຂ້ອງ