ຂ່າວຫຼ້າສຸດ

5 ສິ່ງທີ່ເຢຍລະມັນຕ້ອງຮີບກະທຳ ຫາກບໍ່ຢາກຕົກຮອບທໍາອິດ

207 21 ມິ.ນ. 2018 ວົງຈອນກີລາ
5 ສິ່ງທີ່ເຢຍລະມັນຕ້ອງຮີບກະທຳ ຫາກບໍ່ຢາກຕົກຮອບທໍາອິດ

ເປິດ 5 ສິ່ງທີ່ທີມຊາດເຢຍລະມັນ ຕ້ອງຮີບແກ້ໄຂໂດຍດ່ວນ ຫາກບໍ່ຢາກເປັນແຊັມເກົ່າອີກທີມທີ່ຕ້ອງກະເດັນຕົກຮອບທໍາອິດເຕະບານໂລກ.

          "ແຊັມເກົ່າ" ເຢຍລະມັນ ເລີ່ມຕົ້ນຜົນງານໃນເຕະບານໂລກ 2018 ທີ່ປະເທດຣັດເຊຍໄດ້ຢ່າງຕົກຕໍ່າ ຫຼັງພ່າຍແພ້ ເມັກຊິກ 0-1 ໃນເກມຮອບແບ່ງກຸ່ມ ກຸ່ມ F ນັດທໍາອິດ ເມື່ອວັນອາທິດທີ 17 ມິຖຸນາທີ່ຜ່ານມາ.

          ຫຼັງຄວາມພ່າຍແພ້ ໂຢອັກຄິມ ເລິຟ ຜູ້ຈັດການທີມຊາດເຢຍລະມັນ ກໍຖືກວິຈານຢ່າງໜັກ ແລະ ຈະພ່າຍແພ້ອີກໄມ່ໄດ້ແລ້ວໃນ 2 ເກມຕໍ່ໄປກັບ ຊູແອັດ ໃນວັນເສົາທີ 23 ມິຖຸນາທີ່ຈະມາເຖິງນີ້ ແລະ ສ ເກົາຫຼີ ໃນວັນພຸດທີ 27 ມິຖຸນານີ້.

          ໃນເຕະບານໂລກ 4 ຄັ້ງກ່ອນໜ້ານີ້ ມີແຊັມເກົ່າເຖິງ 3 ຄົນທີ່ຕ້ອງຕົກຮອບທໍາອິດ ໄລ່ຕັ້ງແຕ່ ຝຣັ່ງ ແຊັມຈາກປີ 1998 ທີ່ຕົກຮອບແບ່ງກຸ່ມປີ 2002 ອິຕາລີ ແຊັມປີ 2006 ທີ່ບອກລາຕັ້ງແຕ່ຮອບແບ່ງກຸ່ມໃນປີ 2010 ແລະ ແອັດສະປາຍ ແຊັມປີ 2010 ທີ່ຕົກຮອບແບ່ງກຸ່ມປີ 2014D

        ຫາກ ເຢຍລະມັນ ບໍ່ຢາກເປັນແຊັມເກົ່າອີກທີມທີ່ຕົກຮອບທໍາອິດ ນີ່ຄື 5 ສິ່ງທີ່ ໂຢອາຄິມ ເລິຟ ຕ້ອງແກ້ໄຂໂດຍດ່ວນ.

  1. ບອກ ຄິມມິຊ ໃຫ້ຮູ້ຕົວເອງວ່າບໍ່ແມ່ນກອງໜ້າ

          ໃນເກມທີ່ພ່າຍແພ້ ເມັກຊິກ ຕຳແໜ່ງແບັກຂວາຂອງເຢຍລະມັນ ກາຍເປັນຈຸດອ່ອນ ຫຼັງ ໂຢຊົວ ຄິມມິຊ ຂຶ້ນໄປເສີມເກມບຸກແລ້ວລົງມາບໍ່ຄ່ອຍທັນ.

     ຄິມມິຊ ເປັນແບັກທີ່ມັກເຕີມເກມສູງ ເຮັດໃຫ້ເວລາຖືກຄູ່ແຂ່ງຫຼິ້ນສວນກັບ ມັກຈະພົບບັນຫາ ເຮັດໃຫ້ ເລິຟ ຕ້ອງແນະນໍາລູກທີມໃຫ້ດີ ເຖິງໜ້າທີ່ສຳຄັນຂອງຕົວເອງ.

  1. ສົ່ງ ຣອຍ ເປັນຕົວຈິງ

          ຕອນທີ່ ເລິຟ ຕັດຊື່ ເລຣອຍ ຊາເນ່ ອອກຈາກ 23 ນັກເຕະລຸຍບານໂລກ ກອງເຊຍບານກໍເຊື່ອວ່າ ເລິຟ ຄົງຈະໃຫ້ ມາໂກ ຣອຍ ໄດ້ເປັນຕົວຈິງ.

          ຢ່າງໃດກໍຕາມ ເລິຟ ໃຫ້ ຢູລຽນ ດຣັກຊ໌ເລີ ເປັນຕົວຈິງໃນເກມພົບ ເມັກຊິກ ແຕ່ກໍສ້າງຜົນງານໄດ້ບໍ່ດີຢ່າງທີ່ກອງເຊຍບານຄາດຫວັງ ດັ່ງນັ້ນ ໃນອີກ 2 ນັດຂອງຮອບແບ່ງກຸ່ມ ໜ້າຈະເປັນ ຣອຍ ທີ່ໄດ້ໂອກາດເປັນຕົວຈິງແດ່.

  1. ພັກ ໂອຊິວ ເປັນຕົວສໍາຮອງ

          ຕອນຕົ້ນ ຄາດວ່າ ເມຊຸດ ໂອຊິວ ຈະເປັນພຽງແຕ່ຕົວສຳຮອງໃນເກມພົບ ເມັກຊິກ ເນື່ອງຈາກຜູ້ກ່ຽວຫາກໍຫາຍຈາກອາການບາດເຈັບ ແລະ ເກືອບບໍ່ໄດ້ລົງສະໜາມເລີຍໃນເກມອຸ່ນເຄື່ອງ.

          ໂອຊິວ ສ້າງຜົນງານໄດ້ຢ່າງຕົກຕໍ່າ ແລະ ເບິ່ງແລ້ວ ຜູ້ກ່ຽວກໍຍັງບໍ່ສົມບູນເທົ່າທີ່ຄວນ ເຮັດໃຫ້ຕົວເລືອກໃນກອງໜ້າ ຄົນອື່ນໆ ຢ່າງ ລີອອນ ໂກເຣັດຊະກາ ແລະ ຢູລຽນ ແບຣນ ໜ້າຈະໄດ້ໂອກາດຫຼາຍກວ່າ.

  1. ທຸກຄົນຕ້ອງສະແດງໃຫ້ເຫັນເຖິງຄວາມເປັນຜູ້ນຳ

           ນັບຕັ້ງແຕ່ທີ່ ຟິລິບ ລາມ ແລະ ບາສຕຽນ ຊະໄວສະໄຕເກີ ອໍາລາທີມຊາດເຢຍລະມັນຫຼັງຈາກຈົບເຕະບານໂລກຄັ້ງທີ່ຜ່ານມາ ກໍເບິ່ງເໝືອນວ່າ ເຢຍລະມັນຊຸດນີ້ບໍ່ຄ່ອຍມີນັກເຕະທີ່ເປັນຜູ້ນຳທີມໃນສະໜາມ.

          ເກມທີ່ຜ່ານມາ ຫຼັງຖືກ ເມັກຊິກອອກນຳກ່ອນນັ້ນ ເຢຍລະມັນເບິ່ງຄືປັ່ນປ່ວນ ແລະ ເສຍສະມາທິໄປດົນເຕິບ ດັ່ງນັ້ນໃນເກມຕໍ່ໄປ ພວກຮຸ່ນໃຫຍ່ໃນທີມຢ່າງ ໂທມັສ ມຸນເລີ, ມັດ ຮຸມເມິ່ນ, ຊາມີ່ ເຄດິຣ່າ ແລະ ມານູເອວ ນອຍເອີ ຕ້ອງສະແດງໃຫ້ເຫັນເຖິງຄວາມເປັນຜູ້ນຳທີມໃນສະໜາມຫຼາຍກວ່ານີ້.

  1. ໃຫ້ເວລາ ແວເນີ ຕໍ່ໄປ

          ຕິໂມ ແວເນີ ເປັນຄວາມຫວັງໃນແດນໜ້າຂອງທີມຊາດເຢຍລະມັນ ຕັ້ງແຕ່ໄດ້ລາງວັນດາວຍິງສູງສຸດເຕະບານ ຄອນເຟດເດີເຣຊັ່ນສ໌ ຄັບ 2017.

          ເຖິງແມ່ນກອງໜ້າໄວ 22 ປີ ຍິງ ເມັກຊິກ ໄມ່ໄດ້ ແຕ່ເຂົາກໍສະແດງໃຫ້ເຫັນເຖິງຄວາມວ່ອງໄວ  ຄວາມແຂງແກ່ນ  ແລະ ຊ່ວຍເກມຮັບໄດ້ດ້ວຍ ເຮັດໃຫ້ໜ້າຈະໄດ້ໂອກາດລົງເປັນຕົວຈິງຕໍ່ໄປ.

ຂ່າວທີ່ກ່ຽວຂ້ອງ