ຂ່າວຫຼ້າສຸດ

ຍີ່ປຸ່ນ ສ້າງປະຫວັດສາດ ຊະນະໂກລົມບີ 10 ຄົນ 2-1

141 21 ມິ.ນ. 2018 ວົງຈອນກີລາ
ຍີ່ປຸ່ນ ສ້າງປະຫວັດສາດ ຊະນະໂກລົມບີ 10 ຄົນ 2-1

ຍີ່້ປຸ່ນ ຊະນະ ໂກລົມບີ ຫວຸດຫວິດ ທີ່ເຫຼືອ 10 ຄົນຕັ້ງແຕ່ຕົ້ນເກມ 2-1 ຄວ້າໄຊນັດເປີດສະໜາມໃນເຕະບານໂລກ 2018.

          ເຕະບານໂລກ 2018 ຮອບແບ່ງກຸ່ມຮອບທີໜຶ່ງ ນັດທໍາອິດ ກຸ່ມ H ເມື່ອວັນທີ 19 ມິຖຸນາ ທີ່ສະໜາມມໍດາເວຍ ອາຣີນ່າ ເມືອງຊາຣານ ປະເທດຣັດເຊຍ  ທີມຊາດຍີ່ປຸ່ນ ຕົວແທນຈາກອາຊີ ພົບກັບ ໂກລົມບີ ຕົວແທນຈາກອາເມຣິກາໃຕ້ ໂດຍເກມນີ້ ຍີ່ປຸ່ນ ສົ່ງ ເອອິຈິ ຄາວາຊິມະ ໄວ 35 ປີ 91 ວັນ ລົງເປັນຜູ້ຮັກສາປະຕູ ເຮັດໃຫ້ເຂົາເປັນນັກເຕະຍີ່ປຸ່ນແກ່ສຸດທີ່ລົງຫຼິ້ນໃນບານໂລກ ຜົນການແຂ່ງຂັນປາກົດວ່າ ຍີ່ປຸ່ນຊະນະ ໂກລົມບີ ຫວຸດຫວິດ 2-1D

          ໂດຍ ໂກລົມບີ ຕ້ອງເຫຼືອນັກເຕະພຽງແຕ່ 10 ຄົນຕັ້ງແຕ່ນາທີທີ 3 ເມື່ອ ຄາລອສ ຊານເຊຊ ເຮັດມືຖືກບານຈົນທີມເສຍຈຸດໂທດ ສ່ວນຕົວເຂົາຖືກໃບແດງໄລ່ອອກໄປດ້ວຍ ຖືເປັນໃບແດງທໍາອິດຂອງບານໂລກຄັ້ງນີ້ ແລະ ເປັນໃບແດງໄວສຸດອັນດັບ 2 ໃນປະຫວັດສາດບານໂລກ ທີ່ເວລາ 2 ນາທີ 56 ວິນາທີ ເປັນຮອງພຽງແຕ່ໃບແດງຂອງ ໂຮເຊ ອັນແບໂຕ ບາຕິສຕາ ຂອງອຸຣຸກວັຢ ທີ່ຖືກໄລ່ອອກຫຼັງຜ່ານໄປພຽງແຕ່ 54 ວິນາທີໃນເຕະບານໂລກ 1986 ນັດ ອຸຣຸກວັຍ ພົບ ສະກັອຕແລນ.

          ດ້ານ ຊິນຈິ ຄາງາວະ ຮັບໜ້າທີ່ສັງຫານຈຸດໂທດໃຫ້ ຍີ່ປຸ່ນ ບໍ່ພາດ ຂຶ້ນນຳໄປກ່ອນ 1-0 ໃນນາທີທີ່ 6 ສ່ວນ ໂກລົມບີ ຕີສະເໝີໄດ້ຈາກການຍິງລູກໂທດນອກເຂດຂອງ ຮວນ ຄວິນເຕໂຣ ນາທີ 39 ເຄິ່ງຫຼັງ ຍີ່ປຸ່ນ ຂຶ້ນນຳອີກຄັ້ງ 2-1 ຈາກລູກເຕະມຸມຂອງ ເຄຊຸເກະ ຮອນດະ ໂຍນມາໃຫ້ ຢູຢະ ໂອຊາໂກະ ເອົາຫົວຕໍາບານເຂົ້າໄປໃນນາທີ 73 ເຮັດໃຫ້ ຮອນດະ ເປັນນັກເຕະອາຊີຄົນທໍາອິດທີ່ສົ່ງບານໃຫ້ໝູ່ຍິງໄດ້ໃນບານໂລກ 3 ສະໄໝ ຈົບເກມ ຍີ່ປຸ່ນ ຊະນະ ໂກລົມບີຫວຸດຫວິດ 2-1 ເກັບ 3 ຄະແນນທໍາອິດໄດ້ສຳເລັດ..

          ສ່ວນຜົນອີກ 2 ຄູ່ເຊິ່ງແຂ່ງໃນວັນດຽວກັນມີດັ່ງນີ້:

  • ຣັດເຊຍ  ຊະນະ ເອຢິບ 3-1
  • ເຊເນກັນ ຊະນະ ໂປໂລຍ 2-1

ຂ່າວທີ່ກ່ຽວຂ້ອງ