ຂ່າວຫຼ້າສຸດ

ສື່ວິຈານໜັກວ່າ ເຢຍລະມັນເຮັດຂາຍໜ້າ

148 20 ມິ.ນ. 2018 ວົງຈອນກີລາ
ສື່ວິຈານໜັກວ່າ ເຢຍລະມັນເຮັດຂາຍໜ້າ

          ສື່ເຢຍລະມັນ ວິພາກວິຈານກັນຢ່າງໜັກວ່າ ທີມຊາດເຢຍລະມັນຟອມຂີ້ຮ້າຍທີ່ສຸດ ເຮັດໃຫ້ຄົນທັງຊາດຜິດຫວັງ ແລະຜ່ານຈຸດສູງສຸດໄປຮຽບຮ້ອຍແລ້ວ.

ສື່ເຢຍລະມັນ ພາກັນວິຈານຢ່າງໜັກໜ່ວງເຖິງຜົນງານຂອງນັກເຕະທີມຊາດເຢຍລະມັນ ຫລັງພ່າຍແພ້ຕໍ່ເມັກຊິກ 0-1 ໃນເກມເຕະບານໂລກ 2018 ຮອບທີໜຶ່ງ ນັດທໍາອິດ ໃນກຸ່ມ F ພ້ອມກ່າວວ່າ ເຮັດໃຫ້ປະເທດຊາດຂາຍໜ້າ ທີ່ເລີ່ມຕົ້ນໄດ້ຂີ້ຮ້າຍແບບນີ້ ທັ້ງທີ່ເປັນເຖິງແຊັມເກົ່າ.

ໜັງສືພິມທຸກສະບັບຂອງເຢຍລະມັນ ພາດຫົວຂ່າວໃນໜ້າ 1 ເພື່ອສະແດງເຖິງຄວາມຜິດຫວັງທີ່ມີຕໍ່ທີມຊາດເຢຍລະມັນ ທີ່ເຮັດໃຫ້ຄົນທັງຊາດຜິດຫວັງ ຂະນະທີ່ ຣາຟາເອວ ໂອນິງສະໄຕ ຜູ້ຊ່ຽວຊານດ້ານເຕະບານຂອງເຢຍລະມັນ ເປິດເຜີຍຕໍ່ "ບີບີຊີ" ວ່າ "ໃນເຄິ່ງເວລາທໍາອິດ ເຮົາຫຼິ້ນກັນຂີ້ຮ້າຍຫຼາຍ ບໍ່ມີການປ່ຽນແຜນກັນເລີຍ ເຮົາບໍ່ສາມາດເຮັດໄດ້ເໝືອນກັບທີ່ຜ່ານມາ ທຸກຄົນຜິດຫວັງຈິງໆ ແຕ່ເຮົາຕ້ອງຜ່ານມັນໄປໃຫ້ໄດ້ ທີມຂອງເຮົາເຄີຍຜ່ານປະສົບການຂອງຄວາມພ່າຍແພ້ມາຫຼວງຫຼາຍ".

ຂະນະທີ່ໜັງສືພິມ   "ຊຸດດຸດເຊ ໄຊຕຸງ" ພາຫົວວ່າ  "ຜ່ານພົ້ນຈຸດທີ່ດີທີ່ສຸດໄປແລ້ວ  ທີມຊາດເຢຍລະມັນ ບໍ່ເຄີຍເບິ່ງເໝືອນໝົດຫວັງແບບນີ້ມານານແລ້ວ" ສ່ວນ "ແດຣ໌ ເວວ" ບອກວ່າ " ເບິ່ງເໝືອນວ່າສິ່ງທີ່ເປັນໄປບໍ່ໄດ້ ຈະກາຍເປັນຄວາມຈິງ ແຊັມໂລກເຢຍລະມັນ ເຮັດໃຫ້ຕົວເອງຕ້ອງອັບອາຍ".

ສ່ວນ "ບິລດ໌" ສື່ຫົວໃຫຍ່ອີກແຫ່ງ ບອກວ່າ "ຖ້າຫາກເຮົາຍັງຫຼິ້ນແບບນີ້ ເຮົາຈະສາມາດເອີ້ນຕົວເອງວ່າແຊັມໂລກຕໍ່ໄປໄດ້ພຽງ 3 ອາທິດ ຕອນນີ້ ມັນຄືການເອົາຕົວລອດໃຫ້ໄດ້ໃນເຕະບານໂລກ".

ຂ່າວທີ່ກ່ຽວຂ້ອງ