ອີຣ່ານ ປະກາດສັກດາ ຄວ້າໄຊຮອບ 20 ປີ ຕົວແທນອາຊີສັ່ນເວທີໂລກ

179 20 ມິ.ນ. 2018 ວົງຈອນກີລາ
ອີຣ່ານ ປະກາດສັກດາ ຄວ້າໄຊຮອບ 20 ປີ ຕົວແທນອາຊີສັ່ນເວທີໂລກ

        ອີຣ່ານ ຄວ້າໄຊຊະນະນັດທີ 2 ໃນປະຫວັດສາດຮອບ 20 ປີ ການເຂົ້າຮ່ວມແຂ່ງຂັນເຕະບານໂລກ ຫຼັງຊະນະ ໂມຣົກໂກ ຫວຸດຫວິດ 1-0 ໃນເຕະບານໂລກ 2018 iອບທໍາອິດ ກຸ່ມ B ທີ່ປະເທດຣັດເຊຍ.

          ນັບຕັ້ງແຕ່ອິຣ່ານເຂົ້າຮ່ວມເຕະບານໂລກຄັ້ງທໍາອິດ ເມື່ອປີ 1978 ພວກເຂົາໃຊ້ເວລາ 20 ປີ ຄວ້າໄຊຊະນະນັດທໍາອິດໄດ້ໃນເຕະບານໂລກ 1998 ທີ່ປະເທດຝຣັ່ງ ດ້ວຍການຊະນະ ສະຫະລັດອາເມຣິກາຫວຸດຫວິດ 2-1D

          ຈາກນັ້ນ ອິຣ່ານໃຊ້ເວລາອີກ 20 ປີ ຄວ້າໄຊຊະນະນັດທີສອງໃນເຕະບານໂລກສະໄໝທີ 5 ຂອງພວກເຂົາໄດ້ສຳເລັດ ຊຶ່ງຈົນເຖິງຕອນນີ້ ລວມແລ້ວອິຣ່ານລົງເຕະແລ້ວ 13 ນັດ ຊະນະ 2 ສະເໝີ 3 ແລະ ພ່າຍແພ້ 8 ນັດ.

          ອາຊິຊ ບູຮາດູຊ ກອງໜ້າໂມຣົກໂກ ເປັນຜູ້ຍິງເຂົ້າປະຕູຕົວເອງ ສົ່ງໃຫ້ອິຣ່ານຊະນະໄປໄດ້ ຊຶ່ງຍັງຖືເປັນໄຊຊະນະທີ່ຍິ່ງໃຫຍ່ຂອງຊາວອາຊີໃນເຕະບານໂລກ ທີ່ຊະນະຊາດຈາກທະວີບອາຟຣິກາໄດ້!

          ກ່ອນໜ້ານີ້ ທີມຈາກທະວີບອາຊີ ເຄີຍເອົາຊະນະທີມຈາກທະວີບອາຟຣິກາໄດ້ ຄັ້ງຫຼ້າສຸດ ໃນເຕະບານໂລກ 2010 ທີ່ປະເທດອາຟຣິກາໃຕ້ ໃນເກມທີ່ ຍີ່ປຸ່ນ ຊະນະ ກາເມີຣູນ 1-0 ເຊັ່ນກັນ.

          ກ່ອນທີ່ຕ້ອງໃຊ້ເວລາອີກ 8 ປີ ຈົນເຖິງການປະກາດສັກດາຊາດອາຊີຂອງອິຣ່ານໃນເຕະບານໂລກຄັ້ງນີ້ ຊຶ່ງຖືວ່າ ອິຣ່ານສາມາດສະແດງໃຫ້ທົ່ວໂລກໄດ້ເຫັນເຖິງພັດທະນາການຂອງວົງການເຕະບານອາຊີທີ່ກ້າວຂຶ້ນມາທັດທຽມກັບທະວີບອື່ນແລ້ວອີກດ້ວຍ.

          ເຖິງແມ່ນວ່າໃນເຕະບານໂລກທຸກຄັ້ງທີ່ຜ່ານມາ ຊາດຈາກທະວີບອາຊີ ຈະເປັນພຽງໄມ້ປະດັບ ແຕ່ກໍຖືວ່າເປັນໄມ້ປະດັບທີ່ມີຄວາມສວຍງາມ ແລະ ມີໜາມຄົມທີ່ພ້ອມຈະສ້າງສີສັນໃຫ້ກັບເຕະບານໂລກທຸກຄັ້ງໄດ້ເປັນຢ່າງດີອີກດ້ວຍ.

ຂ່າວທີ່ກ່ຽວຂ້ອງ