ຂ່າວຫຼ້າສຸດ

"ໂລເປເຕກີ" ຖືກແຕ່ງຕັ້ງຄຸມ ຣິວ ມາດຣິດ ຍອມຮັບວ່າເສຍໃຈ ຖືກແອັດສະປາຍ ໄລ່ອອກຈາກຕໍາແໜ່ງ

146 20 ມິ.ນ. 2018 ວົງຈອນກີລາ
"ໂລເປເຕກີ" ຖືກແຕ່ງຕັ້ງຄຸມ ຣິວ ມາດຣິດ ຍອມຮັບວ່າເສຍໃຈ ຖືກແອັດສະປາຍ ໄລ່ອອກຈາກຕໍາແໜ່ງ

    ຄູເລນ ໂລເປເຕກີ ຜູ້ຈັດການຊາວແອັດສະປາຍ ເດີນທາງເຂົ້າຮັບການແຕ່ງຕັ້ງເປັນຜູ້ຈັດການທີມຄົນໃໝ່ຂອງ ຣີວ ມາດຣິດ ຢ່າງເປັນທາງການ ຫຼັງຕົກງານຈາກຕຳແໜ່ງຜູ້ຈັດການໃຫຍ່ທີມຊາດແອັດສະປາຍ ແບບບາດແຜບໍ່ທັນຕົກສະເກັດ ກ່ອນຍອມຮັບວ່າຮູ້ສຶກເສຍໃຈເປັນຢ່າງຍິ່ງທີ່ບໍ່ໄດ້ພາຊາດບ້ານເກີດລຸຍເສິກບານໂລກ.

          ໂລເປເຕກີ ເດີນທາງກັບມາທີ່ ມາດຣິດ ພາຍຫຼັງຖືກເຂ່ຍອອກຈາກຕໍາແໜ່ງຜູ້ຈັດການທີມຊາດແອັດສະປາຍ ເພາະເຊັນສັນຍາຄຸມ ຣິວ ມາດຣິດ ກ່ອນບານໂລກນັດທໍາອິດທີ່ຣັດເຊຍເປິດສາກ ຊຶ່ງເປັນເລື່ອງຜິດມາລະຍາດ ຈາກນັ້ນກໍມາພົບກັບ ທ່ານ ຟລໍເຣນຕິໂນ ເປເຣຊ ປະທານສະໂມສອນ ມາດຣິດ ແລະ ເປິດຕົວຄຸມທີມຮຽບຮ້ອຍ.

          ໂລເປເຕກີ ເຊັນສັນຍາ 3 ປີ ສືບທອດຕຳແໜ່ງຂອງ ຊີເນີດີນ ຊີດານ ຜູ້ຈັດການທີ່ພາທີມຄວ້າຂັນ ຢູຟ່າ ແຊັມປຽນ ລີກ ສະໄໝທີ 13 ໂດຍກ່າວວ່າ "ມື້ວານນີ້ (ມື້ທີ່ຖືກປົດ) ເປັນມື້ທີ່ຂ້ອຍໂສກເສົ້າທີ່ສຸດໃນຊີວິດ ເໝືອນມື້ທີ່ແມ່ຂ້ອຍຈາກໂລກນີ້ໄປ ແຕ່ມື້ນີ້ ເປັນມື້ທີ່ຂ້ອຍມີຄວາມສຸກຫຼາຍ".

          ເຖິງແມ່ນຈະຍອມຮັບວ່າຜິດຫວັງທີ່ບໍ່ໄດ້ຄຸມແອັດສະປາຍຈົນຈົບລາຍການທີ່ ຣັດເຊຍ ແຕ່ກໍເຊື່ອມັ່ນວ່ານັກເຕະທຸກຄົນພ້ອມຊ່ວຍກັນເຮັດພາລະກິດລ່າແຊັມໂລກສະໄໝທີ 2 ໃຫ້ສຳເລັດໄດ້.

ຂ່າວທີ່ກ່ຽວຂ້ອງ