ຂ່າວຫຼ້າສຸດ

ສິ່ງ​ຕ້ອງ​ຫ້າມ​ສຳລັບ​ກອງ​ເຊຍ ທີ່​ເຂົ້າ​ຊົມ World Cup 2018

73 14 ມິ.ນ. 2018 ຂ່າວຕ່າງປະເທດ
ສິ່ງ​ຕ້ອງ​ຫ້າມ​ສຳລັບ​ກອງ​ເຊຍ ທີ່​ເຂົ້າ​ຊົມ World Cup 2018

   ກະຊວງ​ພາຍ​ໃນ​ຣັດ​ເຊຍ ມີ​ຄຳ​ແນະນຳ ແລະ ຂໍ້​ກຳນົດ​ອອກ​ມາ​ເມື່ອ​ວັນ​ທີ 9 ມິຖຸນາ​ທີ່​ຜ່ານ​ມາ ສຳລັບ​ກອງ​ເຊຍ ເພື່ອ​ຊ່ວຍ​ໃຫ້​ພວກ​ເຂົາ​ຫຼີກເວັ້ນ​ສິ່ງ​ລຳ​ຄານ ທີ່​ບໍ່​ໜ້າ​ຈະ​ມີ​ກັບ​ຕຳຫຼວດ ເມື່ອ​ເດີນທາງ​ໄປ​ຣັດ​ເຊຍ ເພື່ອ​ຊົມ​ການ​ແຂ່ງຂັນ​ກິລາ​ບານເຕະ World Cup 2018 ຊຶ່ງ​ຣັດ​ເຊຍ​ເປັນ​ເຈົ້າພາບ​ຈັດ.

   ສິ່ງ​ຕ້ອງ​ຫ້າມ​ປະການ​ທີ່​ໜຶ່ງ​ກໍ​ແມ່ນ ສະໜາມກິລາ​ຂອງ​ຣັດ​ເຊຍ​ທຸກໆ​ແຫ່ງ ຫ້າມ​ກອງ​ເຊຍ ນຳ​ໃຊ້​ແກ​ວູ​ວູ​ເຊ​ລາ (vuvuzela) ຕະຫຼອດ​ເວລາ​ທີ່​ມີ​ການ​ແຂ່ງຂັນ World Cup 2018  ກອງ​ເຊຍ​ເຫຼົ່ານັ້ນ ສາມາດ​ນຳ​ເອົາ​ແກ​ທີ່​ມີ​ທໍ່​ຂະໜາດ​ນ້ອຍ​ເທົ່າ​ນັ້ນ ເຂົ້າ​ໄປ​ໃນ​ສະໜາມກິລາ.

   ຫ້າມ​ຖື​ອາວຸດ​ທຸກໆ​ປະເພດ ຕະຫຼອດ​ຮອດ​ດອກ​ໄມ້​ໄຟ ນ້ຳ​ສີ ແອ​​ລ​ກໍ​ຮໍ ເຄື່ອງ​ດື່ມ​ທີ່​ບັນຈຸ​ໃນ​ຂວດ​ແກ້ວ ແລະ​ຂວດ​ຢາງ​ທີ່​ບັນຈຸ​ເຄື່ອງ​ດື່ມ​ໄດ້​ຫຼາຍ​ກວ່າ 0,5 ລິດ ພ້ອມ​ທັງ​ເອກະສານ​ທີ່​ເປັນ​ການ​ໂຄສະນາ​ທີ່​ມີ​ເນື້ອ​ໃນ​ຮຸນ​ແຮງ ສັນຍາ​ລັກ​ຂອງ​ລັດທິ​ຟາດ​ຊິດ ອຸປະກອນ​ເລ​ເຊີ ໄຟ​ສາຍ ແລະ ອຸປະກອນ​ທີ່​ບໍ່​ຮຽບ​ຮ້ອຍ.

   ໃນ​ຂະນະ​ດຽວ​ກັນ ເຫຼົ່າ​ກອງ​ເຊຍ ກໍ​ຈະ​ບໍ່​ໄດ້​ເຂົ້າ​ໄປ​ໃນ​ສະໜາມກິລາ ໃນ​ສະພາບ​ທີ່​ມຶນເມົາ ແລະ ປິດ​ບັງໃບ​ໜ້າ. ພວກ​ເຂົາ​ບໍ່​ສາມາດ​ທີ່​ຈະ​ແຕະຕ້ອງ​ກອງ​ເຊຍ​ອື່ນໆ ດ້ວຍ​ການ​ໃຊ້​ແຜ່ນ​ປ້າຍ​ທີ່​ພິມ​ຂໍ້ຄວາມ ພ້ອມ​ກັນ​ນັ້ນ​ກໍ​ຫ້າມ​ການ​ນຸ່ງ​ຖື​ທີ່​ປ່ອຍ​ໃຫ້​ເຫັນ​ຈຸດ​ສະດຸ້ງ​ໄວ​ຂອງ​ຮ່າງກາຍ.

    ອີກ​ຂໍ້​ຫ້າມ​ອີກ​ໜຶ່ງ​ກໍ​ແມ່ນ ຫ້າມ​ນຳ​ເອົາ​ສັດລ້ຽງ​ເຂົ້າ​ໄປ​ໃນ​ສະໜາມກິລາ ໂດຍ​ຍົກເວັ້ນ​ແຕ່​ໝາ​ພາ​ທາງ ແຕ່​ຕ້ອງ​ໄດ້​ສວມ​ຫັບ​ໃສ່​ທີ່​ປາກ.

    ຖ້າ​ຫາກ​ເກີດ​ການ​ລະເມີດ​ຕໍ່​ຂໍ້​ກຳນົດ​ຕ່າງໆ​ດັ່ງກ່າວ ພວກ​ກອງ​ເຊຍ​ກໍ​ຈະ​ຖື​ປັບ​ໃໝ​ແຕ່  3.000 ຫາ 10.000 ຣຸບ (ເທົ່າ​ກັບ 50-160 ໂດ​ລາ​ສະຫະລັດ) ບັນດາ​ກອງ​ເຊຍ​ທີ່​ລະເມີດ​ຂໍ້​ຫ້າມ​ນັ້ນ ກໍ​ອາດ​ຖືກ​ຫ້າມ​ເຂົ້າ​ໄປ​ຊົມ​ການ​ແຂ່ງຂັນ​ນັດ​ຕໍ່ໆ​ໄປ ໃນ​ຂະນະ​ທີ່​ຄົນ​ຕ່າງປະເທດ​ທີ່​ກັບ​ມາ​ລະເມີດ​ອີກ​ເທື່ອ ໃໝ່ ແມ່ນ​ອາດ​ຈະ​ຖືກ​ຂັບ​ໄລ່.

    ຂໍ້​ກຳນົດ​ອີກ​ໜຶ່ງ​ປະການ ກໍ​ແມ່ນ​ພົວພັນ​ເຖິງ​ການ​ລົງທະບຽນ​ອາໄສ​ຊົ່ວຄາວ ໃນ​ນັ້ນ ຄົນ​ຕ່າງປະເທດ ແລະ ​ຄົນ​ທີ່​ບໍ່​ມີ​ສັນຊາດ ແມ່ນ​ໄດ້​ຮັບ​ອະນຸຍາດ​ອາໄສ​ຢູ່​ໄດ້ 24 ຊົ່ວໂມງ ຢູ່​ໃນ 11 ນະຄອນ ທີ່​ມີ​ສະຖານທີ່​ແຂ່ງຂັນ World Cup 2018 ຫຼັງ​ຈາກ​ນັ້ນ​ຕ້ອງ​ໄດ້​ລົງທະບຽນ​ອາໄສ​ຊົ່ວຄາວ​ພາຍ​ໃນ 3 ວັນ ນັບ​ແຕ່​ມື້​ເຂົ້າ​ເມືອງ​ເປັນຕົ້ນ​ມາ ຖ້າ​ລະເມີດ​ແມ່ນ​ຈະ​ຖືກ​ປັບ​ໃໝ​ແຕ່ 2.000 ຫາ 5.000 ຣຸບ ຍິ່ງ​ໄປ​ກວ່າ​ນັ້ນ​ແມ່ນ​ຈະ​ຖືກ​ຂັບ​ໄລ່.

   World Cup 2018 ຈະ​ມີ​ການ​ແຂ່ງຂັນ​ທັງ​ໝົດ 64 ນັດ ໂດຍ​ເລີ່ມ​ແຕ່​ວັນ​ທີ 14 ມິຖຸນາ ຮອດ​ວັນ​ທີ 15 ກໍລະກົດ 2018.

ຂ່າວທີ່ກ່ຽວຂ້ອງ