ຂ່າວຫຼ້າສຸດ

ເວ​ເນ​ຊູ​ເອ​ລາ ສົ່ງ​ສານ​ຄັດຄ້ານ​ການ​ກະທຳ​ແຊກ​ແຊງ​ຂອງ​ອຸປະ​ທູດ ສ ອາ​ເມ​ຣິ​ກາ

213 14 ມິ.ນ. 2018 ຂ່າວຕ່າງປະເທດ
ເວ​ເນ​ຊູ​ເອ​ລາ ສົ່ງ​ສານ​ຄັດຄ້ານ​ການ​ກະທຳ​ແຊກ​ແຊງ​ຂອງ​ອຸປະ​ທູດ ສ ອາ​ເມ​ຣິ​ກາ

    ວັນ​ທີ 11 ມິຖຸນາ​ນີ້ ທ່ານ ກາກ​​ລົສ ຣອນ ຮອງ​ລັດຖະມົນຕີ​ການ​ຕ່າງປະເທດ​ເວ​ເນ​ຊູ​ເອ​ລາ ໄດ້​ສົ່ງ​ສານ​ການ​ທູດ​ສະບັບ​ໜຶ່ງ ທີ່​ເປັນ​ການ​ຄັດຄ້ານ​ໄປ​ຍັງ​ທ່ານ ຄຣິ​​ສ​ໂຕ​ເຟີ ແລມ​ເບີດ ອຸປະ​ທູດ​ຄົນ​ໃໝ່​ຂອງ ສ ອາ​ເມ​ຣິ​ກາ ປະຈຳ​ເວ​ເນ​ຊູ​ເອ​ລາ ຍ້ອນ​ວ່າ​ເຂົາ​ແຊກ​ແຊງ​ວຽກ​ງານ​ພາຍ​ໃນ ແລະ​ບໍ່​ນັບຖື​ຕໍ່​ບັນດາ​ອົງ​ປະກອບ​ຂອງ​ເວ​ເນ​ຊູ​ເອ​ລາ.

    ທ່ານ ກາກ​​ລົສ ຣອນ ເຫັນ​ວ່າການ​ທີ່​ທ່ານ ແລມ​ເບີດ ຈັດການ​ພົບ​ປະ​ກັບ ໂອ​ມາ ບາກ​ບໍ​ຊາ ທີ່​ເປັນ​ບຸກຄົນ​ຝ່າຍ​ຄ້ານ​ໃນ ເວ​ເນ​ຊູ​ເອ​ລາ ນັ້ນ​ເປັນ​ການ​ກະທຳ​ທີ່​ບໍ່​ເໝາະ​ສົມ ອາດ​ຈະ​ເປັນ​ການ ກີດຂວາງ​ຕໍ່​ຄຳ​ເຊີນ​ເຂົ້າ​ຮ່ວມ​ການ​ເຈລະຈາ​ໃນ​ທາງ​ສ້າງສັນ ຂອງ​ປະທານາທິບໍດີ​ເວ​ເນ​ຊູ​ເອ​ລາ ນີ​ໂກ​ລາ​​ສ ມາ​ດູ​ໂຣ ເພື່ອ​ເປັນ​ການ​ເພີ່ມ​ທະວີ​ການ​ພົວພັນ​ຄວາມ​ເຂົ້າໃຈ ບົນ​ພື້ນຖານ​ເຄົາລົບ ຊຶ່ງ​ກັນ ແລະ ກັນ.

    ທ່ານ ກາກ​​ລົສ ຣອນ  ກ່າວ​ເນັ້ນ​ວ່າ ການ​ກະທຳ​ດັ່ງກ່າວ​ຂອງ​ທ່ານ ແລມ​ເບີດ ເປັນ​ການ​ຝືນ​ກັບ​ຂໍ້​ກຳນົດ​ຢູ່​ໃນ​ກົດ​ບັດ​ວຽນ (Vienna) ກ່ຽວ​ກັບ​ການເຄື່ອນໄຫວ​ຂອງ​ເຈົ້າ​ໜ້າທີ່​ການ​ທູດ ຢູ່​ໃນ​ປະເທດ​ເຈົ້າ​ບ້ານ ພ້ອມ​ກັນ​ນັ້ນ​ກໍ​ເປັນ​ການ​ກະທຳ​ໂຈມ​ຕີ​ຂອງ​ສະຖານທູດ ສ ອາ​ເມ​ຣິ​ກາ ເຂົ້າ​ໃສ່​ອຳນາດ​ອະທິປະ​ໄຕ​ຂອງ​ປະຊາຊົນ ແລະ ລັດຖະບານ ເວ​ເນ​ຊູ​ເອ​ລາ.

    ທ່ານ ແລມ​ເບີດ ຫາ​ກໍ​ໄດ້​ຮັບ​ການ​ແຕ່​ຕັ້ງ​ໃຫ້​ເປັນ​ອຸປະ​ທູດ​ຂອງ​ສະຖານທູດ ສ ອາ​ເມ​ຣິ​ກາ ປະຈຳ​ເວ​ເນ​ຊູ​ເອ​ລາ ຫຼັງ​ຈາກ​ທີ່​ທ່ານ ທອດ ໂຣ​ບິນ​ສັນ ຜູ້​ທີ່​ເປັນ​ອຸປະ​ທູດ​ຄົນ​ກ່ອນ ຖືກ​ທາງ​ການ ເວ​ເນ​ຊູ​ເອ​ລາ ຂັບ​ໄລ່​ອອກ​ໄປ​ຈາກ​ເວ​ເນ​ຊູ​ເອ​ລາ ເມື່ອ​ວັນ​ທີ 22 ພຶດສະພາ​ທີ່​ຜ່ານ​ມາ ໃນ​ຂໍ້​ຫາ​ວ່າ ເຂົ້າ​ຮ່ວມ​ກົນອຸບາຍ​ທາງ​ການເມືອງ ການ​ທະຫານ ແລະ ​ເສດຖະກິດ​ຂອງ​ຝ່າຍ​ຄ້ານ​ໃນ​ເວ​ເນ​ຊູ​ເອ​ລາ ເພື່ອ​ໂຄ່ນ​ລົ້ມ​ລັດຖະບານ​ຂອງ​ປະທານາທິບໍດີ ມາ​ດູ​ໂຣ.

 

ຂ່າວທີ່ກ່ຽວຂ້ອງ