ເຈົ້າ​ຊີວິດ​ຂອງ​ມາ​ເລ​ເຊຍ ສະໝັກ​ໃຈ​ຕັດ​ຫຼຸດ​ເງິນເດືອນ

98 14 ມິ.ນ. 2018 ຂ່າວຕ່າງປະເທດ
ເຈົ້າ​ຊີວິດ​ຂອງ​ມາ​ເລ​ເຊຍ ສະໝັກ​ໃຈ​ຕັດ​ຫຼຸດ​ເງິນເດືອນ

    ເພື່ອ​ເປັນ​ການສະແດງ​ຄວາມ​ສະໜັບສະໜູນ​ຕໍ່​ຄວາມ​ພະຍາຍາມ ໃນ​ການ​ຕັດ​ຫຼຸດ ໜີ້​ສິນ​ພາກ​ລັດ​ຂອງ​ລັດຖະບານ​ລົງ​ນັ້ນ ຊູ​​ລ​ຕານ ມູ​ຮາມ​ມັດ V (Sultan Muhammad V) ເຈົ້າ​ຊີວິດ ຂອງ​ມາ​ເລ​ເຊຍ ໄດ້​ນຳ​ສະເໜີ​ໃຫ້​ຕັດ​ຫຼຸດ​ເງິນເດືອນ​ໃນ​ປັດຈຸບັນ​ຂອງ​ຕົນ​ລົງ.

    ໃນ​ແຈ້ງ​ການ​ທີ່​ມີ​ອອກ​ມາ​ເມື່ອ​ວັນ​ທີ 11 ມິຖຸນາ​ນັ້ນ ພະລາດ​ຊະ​ວັງ​ຂອງ​ມາ​ເລ​ເຊຍ ໃຫ້​ຮູ້​ວ່າ ເຈົ້າ​ຊີວິດ ມູ​ຮາມ​ມັດ V ຈະ​ຕັດ​ຫຼຸດ​ລະດັບ​ເງິນເດືອນ​ຂອງ​ຕົນ ທີ່​ໄດ້​ຮັບ​ຈາກ​ລັດຖະບານ​ນັ້ນ​ລົງ 10% ໄປ​ຮອດ​ປີ 2021 ເມື່ອ​ພະ​ອົງ​ລົງ​ຈາກ​ບັນລັງ ແຕ່​ກໍ​ບໍ່​ໄດ້​ໃຫ້​ຮູ້​ເຖິງ​ຕົວ​ເລກ​ທີ່ແທ້​ຈິງ​ແຕ່​ຢ່າງໃດ.

    ເມື່ອ​ເດືອນ​ທີ່​ຜ່ານ​ມາ ບັນດາ​ລັດຖະມົນຕີ​ໃໝ່ ທີ່​ສາບານ​ຕົນ​ຮັບ​ຕຳແໜ່ງ ໃນ​ຄະນະ​ລັດຖະບານ ໃໝ່​ພາຍ​ໃຕ້​ການ​ນຳພາ​ຂອງ​ນາຍົກລັດຖະມົນຕີ ມາ​ຮາ​ເທຍ ມໍ​ຮາ​ມັດ ກໍ​ໄດ້​ເຫັນ​ດີ​ເປັນ​ເອກະສັນ ຕໍ່​ທິດ​ທາງ​ການ​ຕັດ​ຫຼຸດ​ເງິນເດືອນ​ຂອງ​ພວກ​ຕົນ​ລົງ 10% ເພື່ອ​ເປັນ​ການ​ຄວບ​ຄຸມ​ການ​ໃຊ້​ຈ່າຍ ທ່າມກາງ​ທີ່​ລັດຖະບານ​ຊຸດ​ໃໝ່ ພວມ​ປະ​ເຊີນ​ກັບ​ບ້ວງ​ໜີ້​ພາກ​ລັດ ທີ່​ມີ​ເກີນ 1.000 ຕື້​ຣິງ​ກິດ (ເທົ່າ​ກັບ 251,5 ຕື້​ໂດ​ລາ​ສະຫະລັດ) ເຖິງ​ຢ່າງໃດ​ກໍ​ຕາມ ນະໂຍບາຍ​ດັ່ງກ່າວ ບໍ່​ເປັນ​ການ​ບັງຄັບ ສຳລັບ​ເຈົ້າ​ໜ້າທີ່​ລະດັບ​ສູງ ແລະ ​ເຂົາເຈົ້າ​ກໍ​ສາມາດ​ປະກອບສ່ວນ​ເຂົ້າ​ໃນ​ການ​ຫຼຸດຜ່ອນ​ການ​ໃຊ້​ຈ່າຍ ໃນ​ການ​ບໍລິຫານ​ປະເທດ ຖ້າ​ຫາ​ກວ່າ​ມີ​ຄວາມ​ມຸ່ງ​ຫວັງ.

 

ຂ່າວທີ່ກ່ຽວຂ້ອງ