ຂ່າວຫຼ້າສຸດ

ຊີ​ຣີ ນຳ​ເອົາ​ລະບົບ​ປ້ອງ​ກັນ​ອາກາດ Pantsir ເຂົ້າ​ໄປ​ໃກ້​ພູ​ພຽງ ໂກ​ລານ

59 14 ມິ.ນ. 2018 ຂ່າວຕ່າງປະເທດ
ຊີ​ຣີ ນຳ​ເອົາ​ລະບົບ​ປ້ອງ​ກັນ​ອາກາດ Pantsir  ເຂົ້າ​ໄປ​ໃກ້​ພູ​ພຽງ ໂກ​ລານ

    ຜູ້​ບັນຊາ​ການ​ຄົນ​ໜຶ່ງ ຂອງ​ກອງ​ກຳລັງ​ພັນທະ​ມິດ​ລະດັບ​ເຂດ ທີ່​ໃຫ້ການ​ສະໜັບສະໜູນ​ປະທານາທິບໍດີ​ຊີ​ຣີ ບາ​ຊາ ອາ​​ລ-​ອັສ​ຊາດ ກ່າວ​ເມື່ອ​ວັນ​ທີ 12 ມິຖຸນາ​ນີ້​ວ່າ ກອງທັບ​ຊີ​ຣີ​ໄດ້​ເພີ່ມ​ທະວີ​ລະບົບ​ປ້ອງ​ກັນ​ອາກາດ ຢູ່​ໃກ້​ກັບ​ແນວ​ຮົບ​ພູ​ພຽງ ໂກ​ລານ ທີ່​ຖືກ​ອິດ​ສະ​ຣາ​ແອນ​ຢຶດ​ຄອງ.

    ນາຍ​ທະຫານ​ດັ່ງກ່າວ​ທີ່​ບໍ່​ປະສົງ​ອອກ​ນາມ ຍັງ​ໃຫ້​ຮູ້​ຕື່ມ​ວ່າ ໃນ​ຊຸມ​ມື້​ຕໍ່ໜ້າ​ນີ້ ລະບົບ​ປ້ອງ​ກັນ ອາກາດ ຈະ​ໄດ້​ເພີ່ມ​ທະວີ​ການ​ຜັນ​ຂະຫຍາຍ​ຢູ່​ໃນ​ເຂດ​ດັ່ງກ່າວ. ການ​ຕິດ​ຕັ້ງ ກຸ່ມ​ລູກ​ສອນ​ໄຟ ປ້ອງ​ກັນ​ອາກາດ Pantsir S1 ທີ່​ຜະລິດ​ໂດຍ​ຣັດ​ເຊຍ ນັ້ນ​ແມ່ນ​ເພື່ອ​ປ່ຽນ​ລະບົບ​ປ້ອງ​ກັນ​ອາກາດ​ໃໝ່ ເພື່ອ​ຮັບ​ມື​ກັບ​ອິດ​ສະ​ຣາ​ແອນ.

    ອິດ​ສະ​ຣາ​ແອນ​ຢຶດ​ຄອງ​ໃນ​ເນື້ອທີ່ 1.200​ກມ2 ຂອງ​ພູ​ພຽງ​ໂກ​ລານ​ຂອງ​ຊີ​ຣີ ໃນ​ລະຫວ່າງ ສົງຄາມ 6 ມື້ ເມື່ອ​ປີ 1967 ແລະ​ຫຼັງ​ຈາກ​ນັ້ນ​ກໍ​ຜະໜວກ​ເອົາ​ເນື້ອທີ່​ດິນ​ດັ່ງກ່າວ ເຂົ້າ​ໃນ​ດິນແດນ ຂອງ​ຕົນ ແຕ່​ບໍ່​ໄດ້​ຮັບ​ການ​ຍອມຮັບ​ຈາກ​ສາກົນ. ປັດຈຸບັນ​ນີ້ ຊີ​ຣີ​ຄວບ​ຄຸມ​ພູ​ພຽງ​ໂກ​ລານ ໃນ​ເນື້ອທີ່ ປະມານ 510​ກມ2.

    ໃນ​ຂະນະ​ດຽວ​ກັນ ຂ່າວສານ ຊິນ​ຮວາ ລາຍ​ງານ​ກ່ອນ​ໜ້າ​ນັ້ນ​ວ່າ ເມື່ອ​ວັນ​ທີ 10 ມິຖຸນາ ທີ່​ຜ່ານ​ມາ ກອງທັບ​ອິດ​ສະ​ຣາ​ແອນ ໄດ້​ເລີ່ມ​ການ​ຊ້ອມ​ຮົບ​ຂະໜາດ​ໃຫຍ່ ຢູ່​ໃນ​ເຂດ​ພູ​ພຽງ​ໂກ​ລານ ຊຶ່ງ​ມີ​ຂຶ້ນ​ທ່າມກາງ​ຄວາມ​ເຄັ່ງ​ຕຶງ​ຢູ່​ລຽບ​ຕາມ​ຊາຍ​ແດນ ອິດ​ສະ​ຣາ​ແອນ - ຊີ​ຣີ. ໂຄສົກ​ຂອງ​ກອງທັບ ອິດ​ສະ​ຣາ​ແອນ ເວົ້າ​ວ່າ ການ​ຊ້ອມ​ຮົບ​ນີ້ ຈະ​ແກ່ຍາວ​ເປັນ​ເວລາ​ຫຼາຍ​ວັນ ແລະ​ວ່າ​ກອງ​ກຳລັງ​ທະຫານ ສຳຮອງ ກໍ​ຈະ​ເຂົ້າ​ຮ່ວມ​ການ​ຊ້ອມ​ຮົບ​ນີ້​ດ້ວຍ.

    ເມື່ອ​ວັນ​ທີ 3 ມິຖຸນາ​ທີ່​ຜ່ານ​ມາ ກອງທັບ​ອິດ​ສະ​ຣາ​ແອນ ກໍ​ໄດ້​ດຳເນີນ​ການ​ຊ້ອມ​ຮົບ ຂະໜາດ​ໃຫຍ່​ສອງ​ລາຍການ ທ່າມກາງ​ຄວາມ​ເຄັ່ງ​ຕຶງ​ທະວີຄູນ​ຂຶ້ນ​ຢູ່​ໃນ​ເຂດ​ແຫຼມ​ກາ​ຊາ. ໜຶ່ງ​ໃນ ການ​ຊ້ອມ​ຮົບ​ສອງ​ລາຍ​ນັ້ນ ມີ​ຂຶ້ນ​ຢູ່​ໃນ​ເຂດ​ພາກ​ໃຕ້​ອິດ​ສະ​ຣາ​ແອນ ແລະ ​ອີກ​ລາຍ​ໜຶ່ງ​ແມ່ນ ການ​ຊ້ອມ​ຮົບ​ຂອງ​ກອງທັບ​ອາກາດ​ອິດ​ສະ​ຣາ​ແອນ ທີ່​ໄດ້​ມີ​ຂຶ້ນ​ຢູ່​ໃນ​ຂອບ​ເຂດ​ທົ່ວ​ປະເທດ ອິດ​ສະ​ຣາ​ແອນ.

 

ຂ່າວທີ່ກ່ຽວຂ້ອງ