ຖະແຫຼງການຮ່ວມ ອາເມຣິກາ-ສປປ ເກົາຫຼີ ເຫັນດີສ້າງຕັ້ງການພົວພັນ 2 ຝ່າຍແບບໃໝ່

185 14 ມິ.ນ. 2018 ຂ່າວໜ້າ​ໜຶ່ງ

ຕາມ​ຂ່າວສານ​ຫວຽດນາມລາຍ​ງານ ​ເມື່ອ​ວັນ​ທີ 12 ມິຖຸນາ 2018 ນີ້​ວ່າ: ຖະແຫຼງການ​ຮ່ວມ​ລະຫວ່າງ​ອາ​ເມ​ຣິ​ກາ ແລະ ​ສປປ ເກົາຫຼີ ເຊິ່ງ​ທ່ານ ໂດນັລ ທຣຳ ປະທານາທິບໍດີ ອາ​ເມ​ຣິ​ກາ ແລະ ຄີມ ຈອງ ອຸນ ຜູ້ນຳ​ສູງ​ສຸດ ​ສປປ ເກົາຫຼີ ໄດ້​ລົງ​ນາມ​ພາຍຫຼັງ​ການ​ພົບ​ປະ​ຄັ້ງ​ປະຫວັດສາດ​ຢູ່ສິງກະໂປ.

ໃນ​ຖະແຫຼງການ​ຮ່ວມ​ຢືນຢັນ​ວ່າ: ການ​ນຳ 2 ທ່ານ​ໄດ້​ມີ​ການ​ເຈລະຈາ​ຢ່າງຮອບດ້ານເລິກເຊິ່ງ ກວ້າງຂວາງ ແລະ ຈິງ​ໃຈ ​ກ່ຽວ​ກັບ​ບັນດາ​ບັນຫາ​ທີ່​ກ່ຽວຂ້ອງ ​ເຖິງ​ການ​ສ້າງຕັ້ງ​ການ​ພົວພັນ​ແບບ​ໃໝ່ລະຫວ່າງ 2 ປະເທດ ແລະ ສ້າງ​ກົນ​ໄກ​ສັນຕິພາບ​ຢ່າງ​ຍາວ​ນານ ແລະ ສະຖຽນ​ລະ​ພາບ​ໃນ​ແຫຼມ​ເກົາຫຼີ ພ້ອມ​ນັ້ນ ການ​ນຳ 2 ປະເທດ ໃຫ້​ຄຳ​ໝັ້ນ​ສັນຍາ​ສ້າງຕັ້ງ​ການ​ພົວພັນ​ອາ​ເມ​ຣິ​ກາ-​ສປປ ເກົາຫຼີ ແບບ​ໃໝ່ ໂດຍ​ອີງ​ຕາມ​ຄວາມ​ມຸ່ງ​ມາດ​ປາຖະໜາ​ຂອງ​ປະຊາຊົນ 2 ປະເທດ ເພື່ອ​ສັນຕິພາບ ແລະ ຄວາມ​ວັດທະນາ​ຖາວອນ ການນຳ 2 ທ່ານ​ໃຫ້​ຄຳ​ໝັ້ນ​ສັນຍາ​ຊອກ​ຫາ ແລະ ມອບ​ສົ່ງ​ອັດຖິ​ຂອງ​ທະຫານ​ຜ່ານ​ເສິກ (POW) ແລະ ຫາຍ​ສາບ​ສູນ​ໃນ​ສົງຄາມ (MIA) ແລະ ຢືນຢັນ​ຄືນໃໝ່​ຖະແຫຼງການ​ປັນ​ມຸນ​ຈອມ ເມື່ອ​ວັນ​ທີ 27 ເມສາ 2018 ​ສປປ ເກົາຫຼີ ໃຫ້​ຄຳ​ໝັ້ນ​ສັນຍາ​ມຸ່ງ​ໄປ​ເຖິງ​ການ​ປອດ​ນິວ​ເຄຼຍ​ຢ່າງ​ສິ້ນ​ເຊີງ ເຊິ່ງ​ໃນ​ແຫຼມ​ເກົາຫຼີ ນອກ​ນັ້ນ ການ​ປະຊຸມ​ສຸດ​ຍອດ​ຄັ້ງ​ປະຫວັດສາດ​ລະຫວ່າງທ່ານ ໂດນັລ ທຣຳ ປະທານາທິບໍດີ ອາ​ເມ​ຣິ​ກາ ແລະ ທ່ານ ຄີມ ຈອງ ອຸນ ຜູ້ນຳ​ສູງ​ສຸດ ​ສປປ ເກົາຫຼີ ມີ​ການ​ລົງ​ນາມ​ໃນ​ເອກະສານ​ສຳຄັນ​ເຖິງ 4 ສະບັບ ຖື​ເປັນປະຫວັດສາດ​ໜ້າ​ໃໝ່ ເຊິ່ງ​ທ່ານ ຄີມ ຈອງ ອຸນ ກ່າວ​ວ່າ ໂລກ​ຈະ​ເຫັນ​ການ​ປ່ຽນແປງ​ໂດຍ​ໄວ​ທີ່​ສຸດ ຂໍ້​ຕົກລົງ 4 ສະບັບ ​ຖື​ເປັນ​ການ​ເປີດ​ໜ້າ​ໃໝ່​ຄວາມ​ສຳພັນ​ລະຫວ່າງ​ສະຫະລັດ-​ສປປ ເກົາຫຼີ ໂດຍ​ເນື້ອ​ໃນ​ເອກະສານ​ທີ່​ມີ​ການ​ເປີດເຜີຍ​ ພາຍຫຼັງ​ມີ​ການ​ລະບຸ​ເຖິງ​ການ​ປົດ​ອາວຸດ​ນິວ​ເຄຼຍ​ຢ່າງ​ສົມບູນ ເຊິ່ງ​ມີ​ເນື້ອ​ໃນ​ເອກະສານ 4 ຂໍ້​ມີ​ດັ່ງນີ້:

1. ສະຫະລັດ ແລະ ​ສປປ ເກົາຫຼີ ໃຫ້​ຄຳ​ໝັ້ນ​ວ່າ​ຈະ​ສ້າງ​ຄວາມ​ສຳພັນ​ໃໝ່​ ຕາມ​ຄວາມ​ປາຖະໜາ​ຂອງປະຊາຊົນ​ທັງ​ສອງ​ປະເທດ ເພື່ອ​ສັນຕິພາບ ແລະ ຄວາມ​ຮຸ່ງເຮືອງ.

2. ສະຫະລັດ ແລະ ​ສປປ ເກົາຫຼີ ຈະ​ຮ່ວມ​ກັນ​ສ້າງ​ລະບອບ​ສັນຕິພາບ​ທີ່​ຍືນ​ຍົງ ແລະ ໝັ້ນຄົງ​ໃນ​ແຫຼມ​ເກົາຫຼີ.

3. ຢືນຢັນ​ຕາມ​ສັນຍາ​ປັນ​ມຸມ​ຈອມ ເມື່ອ​ວັນ​ທີ 27 ເມສາ 2018 ​ສປປ ເກົາຫຼີ ໃຫ້​ຄຳ​ໝັ້ນ​ວ່າ​ຈະ​ເດີນ​ໜ້າ​ປົດ​ນີວ​ເຄຼຍ​ຢູ່​ແຫຼມ​ເກົາຫຼີ ຢ່າງ​ສົມບູນ.

4. ສະຫະລັດ ແລະ ​ສປປ ເກົາຫຼີ ໃຫ້​ຄຳ​ໝັ້ນ​ວ່າ​ຈະ​ຄົ້ນ​ຫາ​ຮ່າງ​ທະຫານ​ຜ່ານ​ເສິກ​ໃນ​ປາງ​ສົງຄາມ ແລະ ທະຫານ​ທີ່​ຫາຍ​ສາບ​ສູນ ​ຂະນະ​ປະຕິບັດ​ໜ້າທີ່​ຮ່ວມ​ທັງ​ເລັ່ງ​ສົ່ງ​ຄືນ​ຮ່າງ​ທີ່​ພົບ​ແລ້ວ.

ນອກຈາກ​ນີ້ ໃນ​ຖະແຫຼງການ​ຮ່ວມ​ຂອງ 2 ປະເທດ ການ​ນຳ 2 ປະເທດ​ໃຫ້​ຄຳ​ໝັ້ນ​ສັນຍາ​ຮ່ວມ​ມື ​ເພື່ອ​ການ​ພັດທະນາ​ຂອງ​ການ​ພົວພັນ​ໃໝ່​ລະຫວ່າງ​ ອາ​ເມ​ຣິ​ກາ-​ສປປ ເກົາຫຼີ ແລະ ເພື່ອ​ຊຸກຍູ້​ສັນຕິພາບ ສະຖຽນລະ​ພາບ ແລະ ຄວາມ​ໝັ້ນຄົງ​ໃນ​ແຫຼມ​ເກົາຫຼີ ແລະ ໃນ​ໂລກ.

ຂ່າວທີ່ກ່ຽວຂ້ອງ