ຂ່າວຫຼ້າສຸດ

ລາວ-ລຸກຊຳບວກ ເສີມຂະຫຍາຍການພົວພັນຮ່ວມມື

216 14 ມິ.ນ. 2018 ຂ່າວໜ້າ​ໜຶ່ງ
ລາວ-ລຸກຊຳບວກ ເສີມຂະຫຍາຍການພົວພັນຮ່ວມມື

ວັນ​ທີ 13 ມິຖຸນາ 2018 ທີ່​ຫ້ອງ​ວ່າການ​ສຳນັກງານ​ນາຍົກລັດຖະມົນຕີ ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ໄດ້​ໃຫ້​ກຽດ​ຕ້ອນຮັບ​ການ​ເຂົ້າ​ຢ້ຽມ​ຄຳນັບ​ຂອງ​ທ່ານ ຊັງ ອາ​ແຊນ​ບອນ ລັດຖະມົນຕີ​ກະຊວງ​ການ​ຕ່າງປະເທດ ແລະ ວຽກ​ງານ​ເອີ​ຣົບ ແຫ່ງ​ຣາ​ຊະ​ອານາຈັກ​ລຸກ​ຊຳ​ບວກ ພ້ອມ​ດ້ວຍ​ຄະນະ ໃນ​ໂອກາດ​ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່​ລາວ​ໃນ​ວັນ​ທີ 12-13 ມິຖຸນາ​ນີ້.

ໂອກາດ​ນີ້ ທ່ານ ທອງ​ລຸນ ສີ​ສຸ​ລິດ ໄດ້​ສະແດງ​ຄວາມ​ຍິນ​ດີ​ຕ້ອນຮັບ ແລະ ຕີ​ລາຄາ​ສູງ​ຕໍ່​ທ່ານ ຊັງ ອາ​ແຊນ​ບອນ ພ້ອມ​ຄະນະ​ທີ່​ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່​ລາວ​ຄັ້ງ​ນີ້ ເຊິ່ງ​ເປັນ​ການ​ປະກອບສ່ວນ​ສຳຄັນ ​ເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ລະຫວ່າງ​ສອງປະເທດ ລາວ-ລຸກ​ຊຳ​ບວກ ທີ່​ມີ​ລັກສະນະ​ຕັ້ງໜ້າ ມີ​ຈຸດ​ສຸມ ແລະ ລະດັບ​ເປົ້າ​ໝາຍ​ໃນ​ການຈັດຕັ້ງ​ປະຕິບັດ​ຢ່າງ​ເປັນ​ລະບົບ ແລະ ໄດ້​ຮັບ​ການ​ເສີມ​ຂະຫຍາຍ​ຂຶ້ນ​ໄປ​ເລື້ອຍໆ ນັບ​ຕັ້ງແຕ່​ໄດ້​ຮັບ​ການ​ສ້າງຕັ້ງ​ສາຍ​ພົວພັນ​ການ​ທູດ​ຮ່ວມ​ກັນ ​ໃນ​ປີ 1997 ເປັນຕົ້ນ​ມາ ພ້ອມ​ນີ້ ທ່ານ​ນາຍົກລັດຖະມົນຕີ ໄດ້​ສະແດງ​ຄວາມ​ຂອບໃຈ​ຕໍ່​ການ​ຊ່ວຍເຫຼືອ​ຂອງ​ລັດຖະບານ ແລະ ປະຊາຊົນ​ລຸກ​ຊຳ​ບວກ​ໃຫ້​ແກ່​ລາວ​ໄລຍະ​ຜ່ານ​ມາ ທັງ​ໃນ​ຂອບ​ສອງ​ຝ່າຍ ແລະ ຫຼາຍ​ຝ່າຍ ເຊິ່ງ​ໃນ​ປີ 2017 ລັດຖະບານ​ລຸກ​ຊຳ​ບວກ ໄດ້​ລົງ​ນາມ​ເພີ່ມ​ການ​ຊ່ວຍເຫຼືອ​ໃຫ້​ແກ່​ລາວ​ຈາກ 60 ມາ​ເປັນ 75 ລ້ານ​ເອີ​ໂຣ ເພື່ອ​ຊ່ວຍເຫຼືອ​ໃນ​ຂະແໜງ​ສາທາລະນະ​ສຸກ ການ​ພັດທະນາ​ທ້ອງຖິ່ນ​ຊົນນະບົດ ພັດທະນາ​ພື້ນຖານ​ໂຄງ​ລ່າງ ການ​ທ່ອງທ່ຽວ ໂຮງແຮມ ອະ​ຊີວະ​ສຶກ​ສາ ການ​ປົກຄອງ ແລະ ໂຄງການ​ຮ່ວມ​ມື​ອື່ນໆ​ທີ່​ລາວ ແລະ ລຸກ​ຊຳ​ບວກ ​ພວມ​ຈັດ​ຕັ້ງ​ປະຕິບັດ​ໃຫ້​ປາກົດ​ຜົນ​ເປັນ​ຈິງ.

ໂອກາດ​ດຽວ​ກັນ ທ່ານ ຊັງ ອາ​ແຊນ​ບອນ ໄດ້​ສະແດງ​ຄວາມຂອບໃຈ​ຕໍ່​ທ່ານ​ນາຍົກລັດຖະມົນຕີ ທີ່​ໄດ້​ໃຫ້ການ​ຕ້ອນຮັບ​ຢ່າງ​ອົບ​ອຸ່ນ ແລະ ລັດຖະບານ​ລາວ​ຕໍ່​ການ​ສະໜັບສະໜູນ​ລຸກ​ຊຳ​ບວກ ​ໃນ​ການ​ສະໝັກ​ເຂົ້າ​ເປັນ​ສະມາຊິກ​ຂອງ​ອົງ​ການຈັດຕັ້ງ​ສາກົນ​ໄລຍະ​ຜ່ານ​ມາ ພ້ອມ​ນັ້ນຍັງ​ໄດ້​ລາຍ​ງານ​ຈຸດ​ປະສົງການ​ເດີນທາງ​ມາ​ເຄື່ອນ​ໄຫວ​ເຮັດ​ວຽກ​ຢູ່​ລາວ ແລະ ການ​ພົບ​ປະ​ສອງ​ຝ່າຍ ລະຫວ່າງກະຊວງ​ການ​ຕ່າງປະເທດ​ລາວ ແລະ ລຸກ​ຊຳ​ບວກ ເພື່ອ​ສົ່ງເສີມ​ການ​ພົວພັນ​ຮ່ວມ​ມື​ວຽກ​ງານ​ແຕ່​ລະ​ດ້ານ​ໃນຕໍ່ໜ້າ​ຕື່ມ​ອີກ.

ຂ່າວທີ່ກ່ຽວຂ້ອງ