ຫົວເຫວີຍ ສະໜັບສະໜູນນັກສຶກສາທີ່ມີພອນສະຫວັນດ້ານໄອທີ

137 14 ມິ.ນ. 2018 ຂ່າວໜ້າ​ໜຶ່ງ
ຫົວເຫວີຍ ສະໜັບສະໜູນນັກສຶກສາທີ່ມີພອນສະຫວັນດ້ານໄອທີ

ພິທີ​ຈັດ​ສົ່ງ​ນັກ​ສຶກ​ສາ​ລາວ​ໄປ​ທັດສະນະ​ສຶກ​ສາ​ທີ່ ​ສປ ຈີນ ໂດຍ​ກິດຈະກຳ​ຂອງ​ບໍລິສັດ ຫົວ​ເຫວີຍ ໄດ້​ຈັດ​ຂຶ້ນ​ວັນ​ທີ 8 ເດືອນມິຖຸນາ 2018 ທີ່​ຫ້ອງການ​ຫົວ​ເຫວີຍ​ລາວ​ນະຄອນຫຼວງ​ວຽງ​ຈັນ ມີ​ທ່ານ​ນາງ ແສງ​ເດືອນ ຫຼ້າ​ຈັນທະ​ບູນ ລັດຖະມົນຕີ ກະຊວງ​ສຶກ​ສາ​ທິ​ການ ແລະ ກີລາ ທ່ານ Wang Wentian ເອກ​ອັກ​ຄະ​ລັດ​ຖະ​ທູດ ແຫ່ງ ​ສປ ຈີນ ປະຈຳ​ລາວ ທ່ານ Mark Wang ປະທານ​ບໍລິສັດ ຫົວ​ເຫວີຍ ປະຈຳ​ລາວ ແລະ ນັກ​ສຶກ​ສາ​ເຂົ້າ​ຮ່ວມ.

ໃນ​ພິທີ​ດັ່ງກ່າວ ທ່ານ​ນາງ ແສງ​ເດືອນ ຫຼ້າ​ຈັນທະ​ບູນ ໄດ້​ສະແດງ​ຄວາມ​ຊົມເຊີຍ​ຕໍ່​ນັກ​ສຶກ​ສາ 10 ຄົນ​ທີ່​ໄດ້​ມີ​ໂອກາດ​ໄປ​ທັດສະນະ​ສຶກ​ສາ​ຢູ່​ຈີນ ພ້ອມ​ດຽວ​ກັນ​ນັ້ນ ໄດ້​ຊົມເຊີຍ ແລະ ຍ້ອງຍໍ​ຜົນງານ​ທີ່​ຫົວ​ເຫວີຍ ​ໄດ້​ໃຫ້ການ​ປະກອບສ່ວນ​ເຂົ້າ​ໃນ​ການ​ສົ່ງເສີມ​ການ​ສຶກ​ສາ ແລະ ການ​ພັດທະນາ​ດ້ານ ICT ໃນ​ໂອກາດ​ດຽວ​ກັນ​ນີ້ ທ່ານ​ທູດ​ຈີນ ປະຈຳ​ລາວ ກ່າວ​ວ່າ: ໂຄງການ Seeds for the Future ບໍ່​ພຽງ​ແຕ່​ສົ່ງ​ຜົນ​ປະໂຫຍດ​ໃຫ້​ແກ່​ນັກ​ສຶກ​ສາ​ ຍັງ​ຈະ​ສ້າງ​ອິດ​ທິ​ພົນ​ຢ່າງ​ຕັ້ງໜ້າ​ໃຫ້​ແກ່​ທັງ​ປະເທດ​ຈີນ ແລະ ປະເທດ​ລາວ​ ໃນ​ການ​ຮັດ​ແໜ້ນ​ສາຍ​ພົວພັນ​ລະຫວ່າງ​ສອງ​ປະເທດ ແລະ ຍົກ​ສູງ​ລະດັບ​ການ​ຮ່ວມ​ມື​ດ້ານ​ການ​ສຶກ​ສາ ກໍ່​ຄືຜັນ​ຂະຫຍາຍ​ຂໍ້​ລິ​ເລີ່ມ ພ້ອມ​ກັນ​ສ້າງ​ເສັ້ນທາງ​ສາຍໄໝ​ທາງ​ດີ​ຈິ​ຕອນ​ດ້ວຍ ຫົວ​ເຫວີຍ​ໄດ້​ເລີ່ມ​ຕົ້ນ​ດຳເນີນ​ໂຄງການ​ນີ້​ປີ 2008 ເພື່ອ​ຊອກ​ຫາ​ເພື່ອ​ພັດທະນາ​ນັກ​ສຶກ​ສາ​ຜູ້​ມີ​ພອນ​ສະຫວັນ ICT ຍົກ​ສູງ​ການ​ຖ່າຍ​ໂອນ​ຄວາມ​ຮູ້ ສົ່ງເສີມ​ຄວາມ​ເຂົ້າໃຈ​ທີ່​ໃຫຍ່​ກວ່າ ແລະ ຜົນ​ປະໂຫຍດ​ໃນ​ຂະແໜງການ​ສື່ສານ ປັບປຸງ ແລະ ຊຸກຍູ້​ການ​ກໍ່ສ້າງ ແລະ ການ​ເຂົ້າ​ຮ່ວມ​ປະຊາ​ຄົມ​ດ້ານ​ດີ​ຈິ​ຕອນ​ຢູ່​ໃນ​ພາກ​ພື້ນ ທຸກ​ປີ​ຫົວ​ເຫວີຍ​ໄດ້​ເຊື້ອ​ເຊີນ​ເອົາ​ນັກ​ສຶກ​ສາ 1.000 ຄົນ​ຈາກ​ທົ່ວ​ໂລກ ເພື່ອ​ໄປ​ທັດສະນະ​ສຶກ​ສາ​ຢູ່​ທີ່​ສຳນັກງານ​ໃຫຍ່​ຂອງ​ບໍລິສັດ​ ຫົວ​ເຫວີຍ ທີ່ ​ສປ ຈີນ.

ຂ່າວທີ່ກ່ຽວຂ້ອງ