ຮ່ວມເປັນເຈົ້າພາບສັດທາ ສ້າງອາຄານ 3 ຫຼັງສຳລັບພະສົງ

146 14 ມິ.ນ. 2018 ຂ່າວໜ້າ​ໜຶ່ງ
ຮ່ວມເປັນເຈົ້າພາບສັດທາ ສ້າງອາຄານ 3 ຫຼັງສຳລັບພະສົງ

ສູນ​ກາງ​ອົງການ​ພຸດ​ທະ​ສາສະໜາ​ສຳພັນ​ລາວ (​ອພສ) ຮ່ວມ​ກັບ​ແນວ​ລາວ​ສ້າງ​ຊາດ ນະຄອນຫຼວງ​ວຽງ​ຈັນ ຖະແຫຼງ​ຂ່າວ​ ໂຄງການ​ສ້າງ​ອາຄານ​ອາຄັນຕຸກະ​ອະນຸສອນ​ສູນ​ກາງ ​ອພສ ສຳນັກງານ​ປະທານ​ສົງ ແລະ ອາຄານ​ສຳນັກງານ​ສູນ​ກາງ ​ອພສ ຂຶ້ນ​ວັນ​ທີ 12 ມິຖຸນາ 2018 ທີ່​ຫໍ​ທຳ​ມະ​ສະພາ​ຖະແຫຼງ​ຂ່າວ​ໂດຍ​ພະ​ອາຈານ ດຳ​ຣົງ ພິມ​ມະ​ຈັກ ເລຂາທິການ​ຄະນະ​ບໍລິຫານ​ງານ​ປະຈຳການ ຫົວໜ້າ​ຫ້ອງການ​ສູນ​ກາງ ​ອພສ ມີ​ທ່ານ ບຸນ​ທ່ຽງ ຂຸນ​ສີ ປະທານ​ແນວ​ລາວ​ສ້າງ​ຊາດ ນະຄອນ​ຫຼວງ​ວຽງ​ຈັນ ພະນັກງານ​ວິຊາ​ການ ແລະ ສື່​ມວນ​ຊົນ​ເຂົ້າ​ຮ່ວມ.

ພະ​ອາຈານ ດຳ​ຣົງ ພິມ​ມະ​ຈັກ ກ່າວ​ວ່າ: ໂຄງການ​ສ້າງ​ອາຄານ​ອາຄັນຕຸກະ​ອະນຸສອນ ສູນ​ກາງ ​ອພສ ສຳນັກງານ​ປະທານ​ສົງ ແລະ ອາຄານ​ສຳນັກງານ​ສູນ​ກາງ ​ອພສ ທັງ 3 ຫຼັງ​ນີ້​ມີ​ເນື້ອທີ່​ປຸກ​ສ້າງ​ທັງ​ໝົດ​ຍາວ 150 ແມັດ ແລະ ກວ້າງ 30 ແມັດ ເປັນ​ໂຄງການ​ລະດັບ​ຊາດ ມີ​ການ​ຮ່ວມ​ມື​ກັນ​ທັງ​ຝ່າຍ​ສົງ ແລະ ຝ່າຍ​ຄາ​ລະ​ວາດ ການ​ນຳ ພັກ-ລັດ ສັດທາ​ພຸດ​ທະ​ບໍລິສັດ ພຸດ​ທະ​ສາ​ສະ​ນິກະ​ຊົນ​ລາວ​ບັນດາເຜົ່າ​ທຸກ​ພາກສ່ວນ​ເປັນ​ເຈົ້າ​ການ​ນຳ​ກັນ ໂຄງການ​ກໍ່ສ້າງ​ນີ້​ມີ​ຈຸດປະສົງ​ເພື່ອ​ນ້ອມ​ບູຊາ ຄຸນ​ພະ​ສີ​ຣັດຕະ​ນະ​ໄຕ​ແກ້ວ​ອັນ​ປະເສີດ​ທັງ 3 ເພື່ອ​ໄວ້​ເປັນ​ທີ່​ລະນຶກ​ອະນຸສອນ​ຂອງ​ອົງການ​ພຸດ​ທະ​ສາສະໜາ​ສຳພັນ​ລາວ ​ທີ່​ປະຕິບັດ​ພາລະ​ບົດບາດ​ໜ້າທີ່​ຂອງ​ຕົນ ເພື່ອ​ຄວາມ​ຈະເລີນ​ກ້າວໜ້າ​ຂອງ​ພະ​ພຸດ​ທະ​ສາສະໜາ ແລະ ປະເທດ​ຊາດໄວ້​ເປັນ​ທີ່​ພັກ​ອາໄສ​ຢູ່​ຂອງ​ພະ​ມະຫາ​ເຖຣະ ຄະນະ​ກຳມະການ​ສູນ​ກາງ ​ອພສ ທີ່​ມາ​ຈາກ​ແຂວງ​ຕ່າງໆ​ພາຍ​ໃນ​ທົ່ວ​ປະເທດ ​ທີ່​ເດີນທາງ​ມາ​ປະຊຸມ​ທີ່​ນະຄອນຫຼວງ​ວຽງ​ຈັນ ເປັນ​ທີ່​ພັກ​ຂອງ​ພະ​ມະຫາ​ເຖຣະ​ຜູ້ນຳ​ສົງ​ທາງ​ພະ​ພຸດ​ທະ​ສາສະໜາ​ຈາກ​ຕ່າງປະເທດ ​ທີ່​ເດີນທາງ​ມາ​ຢ້ຽມຢາມ ຫຼື ມາ​ປະຊຸມ​ຢູ່​ລາວ ໄວ້​ເປັນ​ທີ່​ຈັດ​ກອງ​ປະຊຸມ​ໃຫຍ່​ຂອງ​ຄະນະ​ກຳມະການ​ສູນ​ກາງ ​ອພສ ກອງ​ປະຊຸມ​ສາມັນ​ປະຈຳ​ປີ ກອງ​ປະຊຸມ​ໃຫຍ່​ຜູ້​ແທນ​ພະສົງ​ທົ່ວ​ປະເທດ ແລະ ກອງ​ປະຊຸມ​ພະສົງ​ນາໆຊາດ ເປັນ​ທີ່ຢູ່​ຂອງ​ພະ​ອາຈານ​ໃຫຍ່ ປະທານ​ສູນ​ກາງ​ອົງການ​ພຸດ​ທະ​ສາສະໜາ​ສຳພັນ​ລາວ ເພື່ອ​ໄວ້​ເປັນ​ທີ່​ເຄື່ອນ​ໄຫວ​ວຽກ​ງານ​ລະບົບ​ການຈັດຕັ້ງ​ຂອງ​ຫ້ອງການ​ສູນ​ກາງ ​ອພສ ແລະ ກຳມາ​ທິ​ການ​ທັງ 5 ໃຫ້​ສອດຄ່ອງ​ກັບ​ພາລະ​ບົດບາດ​ໜ້າທີ່​ຂອງ​ຕົນ ເຊິ່ງ​ໄລຍະ​ການ​ກໍ່ສ້າງ​ອາຄານ​ທັງ 3 ຫຼັງ​ນີ້​ຄາດ​ຄະເນ​ຈະ​ໃຫ້​ສຳເລັດ​ປີ 2020-2021 ສຳລັບ​ວັນ​ທີ 14 ມິຖຸນາ 2018 ຈະ​ມີ​ການ​ຮັບ​ບໍລິຈາກ​ຜູ້​ທີ່​ມີໃຈ​ໃສ​ສັດທາ​ມາ​ທຳບຸນ​ສ້າງ​ອາຄານ​ທັງ 3 ຫຼັງ ແລະ ວັນ​ທີ 15 ມິຖຸນາ 2018 ຈະ​ມີ​ພິທີ​ວາງ​ສີ​ລາ​ລຶກ​ສ້າງ​ອາຄານທັງ 3 ຫຼັງ ດັ່ງນັ້ນ ຈຶ່ງ​ຮຽກຮ້ອງ​ໃຫ້​ບັນດາ​ສັດທາ​ພຸດ​ທະ​ບໍລິສັດ ແລະ ພຸດ​ທະ​ສາ​ສະ​ນິ​ກະ​ຊົນ​ລາວ​ບັນດາເຜົ່າ​ທຸກ​ພາກສ່ວນ​ ມາ​ຮ່ວມ​ເປັນ​ເຈົ້າ​ການ​ນຳ​ກັນ.

ຂ່າວທີ່ກ່ຽວຂ້ອງ