ຂ່າວຫຼ້າສຸດ

ຈົ່ງຮ່ວມກັນປະຕິບັດ 4 ບໍ່ ເພື່ອປາບໄພຢາເສບຕິດ

224 14 ມິ.ນ. 2018 ຂ່າວໜ້າ​ໜຶ່ງ
ຈົ່ງຮ່ວມກັນປະຕິບັດ 4 ບໍ່ ເພື່ອປາບໄພຢາເສບຕິດ

ປັດຈຸບັນ​ລັດຖະບານ ກໍ່​ຄືສະພາ​ແຫ່ງ​ຊາດ ​ໄດ້​ສັ່ງ​ໃຫ້​ທົ່ວ​ສັງຄົມ​ຕ້ອງ​ພ້ອມ​ກັນ​ປະຕິບັດ 4 ບໍ່​ຄື: ບໍ່​ຂາຍ-ບໍ່​ຊື້-ບໍ່​ເສບ ແລະ ບໍ່​ຜະລິດ​ປຸງ​ແຕ່ງ​ຢາ​ເສບ​ຕິດ​ໃນ​ທຸກ​ປະເພດ ແລະ ໃຫ້​ກາຍເປັນ​ໜ້າທີ່ ເປັນຄວາມ​ຮັບຜິດຊອບ​ຂອງ​ທົ່ວ​ປວງ​ຊົນ ທັງ​ນີ້ເພື່ອ​ຫຼຸດຜ່ອນ ແລະ ກ້າວ​ໄປ​ເຖິງ​ການ​ຢຸດຕິ​ການ​ແຜ່​ກະຈາຍ​ຂອງ​ໄພ​ຢາ​ເສບ​ຕິດ.

ໃນ​ຄັ້ງ​ຫຼ້າ​ສຸດ​ບັນຫາ 4 ບໍ່​ດັ່ງກ່າວ​ ໄດ້​ຖືກ​ນຳ​ສະເໜີ​ຢູ່​ໃນ​ກອງ​ປະຊຸມ​ສະໄໝ​ສາມັນ​ເທື່ອ​ທີ 5 ຂອງ​ສະພາ​ແຫ່ງ​ຊາດ ຊຸດ​ທີ VIII ທີ່​ສະເໜີ​ໂດຍ​ທ່ານ ​ພົ.ວ ຄຳ​ສຸກ ວີ​ອິນ​ທະ​ວົງ ປະທານ​ກຳມາ​ທິ​ການ​ປ້ອງ​ກັນ​ຊາດ ປ້ອງ​ກັນ​ຄວາມ​ສະຫງົບ​ ສະພາ​ແຫ່ງ​ຊາດ ​ກ່ຽວ​ກັບ​ການ​ແກ້​ໄຂ​ໄພ​ຢາ​ເສບ​ຕິດ ໂດຍ​ຕ້ອງ​ພ້ອມ​ກັນ​ຕັ້ງໜ້າ​ໂຄສະນາ​ສຶກ​ສາ​ອົບຮົມ​ທົ່ວ​ປວງ​ຊົນ​ເຂົ້າ​ຮ່ວມ​ສະກັດ​ກັ້ນ ແລະ ຕ້ານ​ຢາ​ເສບ​ຕິດ​ດ້ວຍ​ຫຼາຍ​ວິທີ ແລະ ຫຼາຍ​ຮູບ​ແບບ ເຮັດ​ໃຫ້​ວຽກ​ງານ​ນີ້​ກາຍເປັນ​ສະຕິ ເປັນ​ເຈົ້າ​ການ ແລະ ເປັນຄວາມ​ຮັບຜິດຊອບ​ຂອງ​ທົ່ວ​ປວງ​ຊົນ ໂດຍ​ສະເພາະ ຕ້ອງ​ປະຕິບັດ​ໃຫ້​ໄດ້ 4 ບໍ່ ໃຫ້​ເປັນ​ຮູບ​ປະ​ທຳ​ຕົວ​ຈິງ​ໃນ​ທົ່ວ​ປະເທດ ແລະ ພ້ອມ​ນັ້ນ​ຕ້ອງ​ປັບປຸງ​ວຽກ​ງານ​ວິຊາ​ສະເພາະ ປັບປຸງ​ກຳລັງ ​ປກສ ສະກັດ​ກັ້ນ ແລະ ​ຕ້ານ​ຢາ​ເສບ​ຕິດ ປັບປຸງ​ຍົກ​ສູງ​ຄຸນະພາບ​ວຽກ​ງານ​ສືບສວນ-ສອບ​ສວນ​ດຳເນີນ​ຄະດີ​ຢ່າງ​ຈະແຈ້ງ ຊັດ​ເຈນ ຮັດກຸມ ວ່ອງໄວ ທັງ​ມີ​ຄວາມ​ໂປ່ງ​ໃສ ສືບຕໍ່​ຫັນ​ລົງ​ຮາກ​ຖານ​ຊ່ວຍ​ທ້ອງຖິ່ນ​ແກ້​ໄຂ​ບັນຫາ​ຢາ​ເສບ​ຕິດ ກຳ​ແໜ້ນ​ທຸກ​ສະພາບ​ກົນອຸບາຍ​ເລ້​ຫຼ່ຽມ​ການເຄື່ອນໄຫວ​ບັນດາ​ເປົ້າ​ໝາຍ​ທັງ​ລາຍ​ໃຫຍ່ ລາຍ​ກາງ ລາຍ​ຍ່ອຍ ຢູ່​ພາຍ​ໃນ ແລະ ຕ່າງປະເທດ ແກ້​ແຕ່​ກົກ​ເຖິງ​ປາຍ ທັງ​ເດັດດ່ຽວ​ປາບ​ປາມ ແລະ ເອົາ​ຜິດ​ກັບ​ທຸກ​ຄົນ​ທີ່​ໄປ​ກ່ຽວຂ້ອງ​ກັບ​ຢາ​ເສບ​ຕິດ​ຢ່າງ​ບໍ່​ຍົກເວັ້ນ.

ຢາ​ເສບ​ຕິດ​ເປັນ​ໄພ​ອັນຕະລາຍ​ທີ່​ທ້າ​ທາຍ ແລະ ພວມ​ຂົ່ມຂູ່​ຕໍ່​ມວນ​ມະນຸດຊາດ​ໃນ​ທົ່ວ​ໂລກ ກໍ່​ຄືປະເທດ​ພວກ​ເຮົາ ສຳລັບ​ຢູ່​ລາວ​ບັນຫາ​ຢາ​ເສບ​ຕິດ​ໃນ​ປັດຈຸບັນ ​ພວມ​ມີ​ລັກສະນະ​ເພີ່ມ​ຂຶ້ນ ແລະ ແຜ່​ຂະຫຍາຍ​ໄປ​ທົ່ວ​ທຸກ​ບ່ອນ​ໃນ​ສັງຄົມ ​ໃນ​ລະດັບ​ທີ່​ແຕກ​ຕ່າງ​ກັນ ການ​ພົວພັນ​ຄ້າ-ຂາຍ​ຢາ​ເສບ​ຕິດ​ມີ​ທັງ​ຄົນ​ລາວ ແລະ ຄົນ​ຕ່າງປະເທດ ມີ​ການເຄື່ອນໄຫວ​ຂ້າມ​ຊາດ ແລະ ມີ​ການ​ນຳ​ໃຊ້​ພາຫະນະ​ເຕັກນິກ​ທີ່​ທັນ​ສະໄໝ ​ເຂົ້າ​ໃນ​ການ​ຂົນສົ່ງ​ຢາ​ເສບ​ຕິດ​ຢ່າງ​ເລິກ​ແລບ​ແນບ​ນຽນ​ທີ່​ສຸດ ບັນຫາ​ທີ່​ໜ້າ​ເປັນ​ຫ່ວງ ຢາ​ເສບ​ຕິດ​ໄດ້​ຊຶມ​ເລິກ​ເຂົ້າ​ຫຼາຍ​ຊັ້ນ​ຄົນ​ໃນ​ສັງຄົມ ເຊິ່ງ​ປີ 2018 ເຈົ້າ​ໜ້າທີ່​ຕຳຫຼວດ ແລະ ພາກສ່ວນ​ກ່ຽວຂ້ອງ​ໄດ້​ດຳເນີນ​ການ​ປາບ​ປາມ ແລະ ເອົາ​ຜິດ​ຕໍ່​ຂະ​ບວນ​ການ​ຢາ​ເສບ​ຕິດ ສາມາດ​ຢຶດ​ຂອງ​ກາງ​ເປັນ​ຢາ​ເສບ​ຕິດ​ໄດ້​ຈຳນວນ​ຫຼວງຫຼາຍ ​ເປັນຕົ້ນ ໃນ​ເດືອນ​ກຸມພາ ທະຫານ​ກອງຮ້ອຍ​ຊາຍ​ແດນ 112 ໄດ້​ຈັບ​ຕົວ​ຜູ້​ກະທຳ​ຜິດ ແລະ ຢຶດ​ຢາ​ບ້າ​ໄດ້ 3 ແສນ​ເມັດ ໃນ​ເດືອນ​ຕໍ່​ມາ ເຈົ້າ​ໜ້າທີ່​ຕຳຫຼວດ​ແຂວງ​ຫຼວງ​ນ້ຳ​ທາ ສາມາດ​ຈັບ​ຕົວ ແລະ ຢຶດ​ຢາ​ບ້າ​ໄດ້ 1 ແສນ​ເມັດ ເຈົ້າ​ໜ້າທີ່ ​ປກສ ເມືອງ​ຂວາ ແຂວງ​ຜົ້ງ​ສາລີ ຢຶດ​ເຮ​ໂລ​ອິນ​ໄດ້ 58 ແທ່ງ ຢາ​ບ້າ​ເກືອບ 4.000 ເມັດ ​ປກສ ແຂວງ​ຊຽງ​ຂວາງ ​ຢຶດ​ເຮ​ໂລ​ອິນ​ໄດ້ 10 ແທ່ງ ​ປກສ ແຂວງ​ຫົວພັນ ຢຶດ​ເຮ​ໂລ​ອິນ​ໄດ້ 33 ແທ່ງ ນ້ຳໜັກ 13,7 ກິ​ໂລ ກົມ​ໃຫຍ່​ຕຳຫຼວດ ຢຶດ​ຢາ​ບ້າ​ໄດ້ 1 ແສນ​ກວ່າ​ເມັດ ແລະ ​ປກສ ແຂວງ​ບໍ່​ແກ້ວ ຢຶດ​ຢາ​ໄອ​ໄດ້ 25 ເປົາ ມີ 651 ຫໍ່ ແລະ ຍັງ​ມີ​ຫຼາຍ​ກົມ​ກອງທ້ອງຖິ່ນ ໂດຍ​ສະເພາະໜ່ວຍ​ງານ​ສະກັດ​ກັ້ນ ແລະ ຕ້ານ​ຢາ​ເສບ​ຕິດ​ຂອງ​ສູນ​ກາງແຂວງ ເມືອງ​ຕ່າງໆ ກໍ່​ສາມາດ​ປາບ​ປາມ​ຈັບ​ກຸມ​ຜູ້​ກະທຳ​ຜິດ ຢຶດ​ຢາ​ເສບ​ຕິດ ແລະ ວັດຖຸ​ອຸປະກອນ ພາຫະນະ​ໃນ​ການ​ກໍ່​ເຫດ​ໄດ້​ຈຳນວນ​ຫຼວງຫຼາຍ.

ສະເພາະ​ຢູ່​ແຂວງ​ຫຼວງ​ພະ​ບາງ​ປີ 2017 ກໍ່​ໄດ້​ມ້າງ​ຄະດີ​ຢາ​ເສບ​ຕິດ​ໄດ້ 171 ເລື່ອງ ມີ​ຜູ້​ຕ້ອງ​ຫາ 280 ຄົນ ພວມ​ດຳເນີນ​ຄະດີ 104 ເລື່ອງ ຢຶດ​ຢາ​ບ້າ-ຢາ​ໄອ-ຢາຝິ່ນ​ໄດ້​ຈຳນວນ​ຫຼວງຫຼາຍ ແລະ ຢຶດ​ເຄື່ອງ​ຈັກ​ຜະລິດ​ຢາ​ບ້າ 136 ຫົວ​ສຳລັບ​ແຂວງ​ສະຫວັນ​ນະ​ເຂດ ສາມາດ​ແກ້​ໄຂ​ຄະດີ​ຢາ​ເສບ​ຕິດ​ໄດ້ 968 ກວ່າ​ເລື່ອງ ຜູ້​ຕ້ອງ​ຫາ 1.600 ກວ່າ​ຄົນ ທຽບໃສ່​ປີຜ່ານມາ​ເພີ່ມ​ຂຶ້ນ 343 ຄົນ ຢຶດ​ຢາ​ບ້າ​ໄດ້ 2 ແສນ​ກວ່າ​ເມັດ ແລະ ແຂວງ​ຄຳ​ມ່ວນ​ ສາມາດ​ມ້າງ​ຄະດີ​ຢາ​ເສບ​ຕິດ​ໄດ້​ເກືອບ 200 ເລື່ອງ ກັກ​ຕົວ​ຜູ້​ຕ້ອງ​ຫາ​ໄດ້ 310 ຄົນ ຢຶດ​ຢາ​ບ້າ​ໄດ້​ເກືອບ 1 ແສນ​ເມັດ ແລະ ແຂວງ​ອື່ນໆ ກໍ່​ໄດ້​ສະກັດ​ກັ້ນ ແລະ ຕ້ານ​ຢາ​ເສບ​ຕິດ​ໄດ້​ຈຳນວນ​ຫຼວງຫຼາຍ​ເຊັ່ນ​ດຽວ​ກັນ.

ຕໍ່​ກັບ​ໄພ​ອັນຕະລາຍ​ຈາກ​ຢາ​ເສບ​ຕິດ​ດັ່ງກ່າວ ຢູ່​ໃນ​ກອງ​ປະຊຸມ​ສະພາ​ແຫ່ງ​ຊາດ​ຊຸດ​ນີ້ ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ໄດ້​ກ່າວ​ຢ່າງ​ໜັກ​ແໜ້ນ​ວ່າ: ນັບ​ແຕ່​ປີ​ກາຍ​ນີ້​ເປັນຕົ້ນ​ມາ ​ລັດຖະບານ​ໄດ້​ປະກາດ​ຜະເດັດ​ເສິກ​ກັບ​ບັນຫາ​ຢາ​ເສບ​ຕິດ ແລະ ລັດຖະບານ​ໄດ້​ຊີ້​ນຳ​ໃຫ້​ກະຊວງ ​ປກສ ແລະ ພາກສ່ວນ​ກ່ຽວຂ້ອງ​ຈັດ​ຕັ້ງ​ປະຕິບັດ ແລະ ນັບ​ແຕ່​ປີ 2016 ເປັນຕົ້ນ​ມາ ໄດ້​ເລີ່ມ​ບຸກ​ໜັກ ແລະ ໄດ້​ຊອກ​ຫາ​ຈັບ​ກຸມ​ຜູ້​ເປັນ​ຫົວ​ໂປ່​ໂຕ​ການ ​ຜູ້​ກະທຳ​ຜິດ​ໃນ​ການ​ຊື້-ຂາຍ​ຢາ​ເສບ​ຕິດ ຫົວ​ໂປ່​ນຳ​ເອົາ​ທາດ​ຕ່າງໆ​ມາ​ຜະລິດ ເພື່ອ​ສົ່ງ​ອອກ ຫຼື ນຳ​ເຂົ້າ-ສົ່ງ​ອອກ ແລະ ໄດ້​ເປັນ​ຂ່າວ​ລາຍ​ວັນ​ທີ່​ເຈົ້າ​ໜ້າທີ່​ພວກ​ເຮົາ​ຈັບ​ໄດ້ ແລະ ເອົາ​ມາ​ສືບສວນ-ສອບ​ສວນ ແລະ ໄດ້​ນຳ​ໂຕ​ເຂົ້າ​ສູ່​ຂະ​ບວນ​ການ​ຍຸຕິ​ທຳ ແລະ ມີ​ຫຼາຍ​ລາຍ​ໄດ້​ຂຶ້ນ​ສານ​ຕັດສິນ ແຕ່​ມາ​ເຖິງ​ປັດຈຸ​ບັນ ຍັງ​ສືບຕໍ່​ແກ້​ໄຂ​ເພື່ອ​ນຳ​ເອົາ​ຫົວ​ໂປ່​ໃຫຍ່​ມາ​ລົງໂທດ ແລະ ກ່ຽວ​ກັບ​ການ​ຈັບ​ຕົວ ​ກັກ​ຕົວ ການ​ຢຶດ​ຊັບ ແມ່ນ​ໄດ້​ເປັນ​ໄປ​ຕາມ​ລະບຽບ​ກົດໝາຍ ແລະ ພວກ​ເຮົາ​ແມ່ນ​ບໍ່​ປະ​ໃຫ້​ບັນຫາ​ຢາ​ເສບ​ຕິດ​ນີ້​ໄວ້ ​ຢູ່​ປະເທດ​ຂອງ​ພວກ​ເຮົາ​ອີກ​ຕໍ່​ໄປ​ແລ້ວ.

ຂ່າວທີ່ກ່ຽວຂ້ອງ