ຂ່າວຫຼ້າສຸດ

ປະເມີນວຽກການເດີນສຳຫຼວດຫົວໜ່ວຍທຸລະກິດ

85 14 ມິ.ນ. 2018 ຂ່າວໜ້າ​ໜຶ່ງ
ປະເມີນວຽກການເດີນສຳຫຼວດຫົວໜ່ວຍທຸລະກິດ

ວັນ​ທີ 13 ມິຖຸນາ 2018 ທີ່​ກະຊວງ​ການ​ເງິນ ມີ​ກອງ​ປະຊຸມ​ລາຍ​ງານ ແລະ ສະຫຼຸບ​ຜົນສຳເລັດ​ການ​ເຮັດ​ວຽກ​ເດີນ​ສຳ​ຫຼວດ​ບັນດາ​ຫົວໜ່ວຍ​ທຸລະ​ກິດ​ຢູ່ 4 ເມືອງ​ໃນ ແລະ ລາຍ​ງານ​ຜົນ​ການ​ນຳ​ໃຊ້​ເຄື່ອງ​ບັນທຶກ​ການ​ຂາຍ​ສິນຄ້າ ແລະ ການ​ບໍລິການ POS TMIS-EASY TAX ຢູ່ 5 ເມືອງ​ໃນ​ນະຄອນຫຼວງ​ວຽງ​ຈັນ ເປັນ​ປະທານ​ໂດຍ​ທ່ານ ສົມ​ດີ ດວງ​ດີ ຮອງ​ນາຍົກລັດຖະມົນຕີ ລັດຖະມົນຕີ​ກະຊວງ​ການ​ເງິນ ມີ​ຕາງໜ້າ​ຈາກ​ກະຊວງ​ກ່ຽວຂ້ອງ ສູນ​ສະຖິຕິ​ແຫ່ງ​ຊາດ ແລະ ສ່ວຍ​ສາ​ອາກອນ​ເມືອງ​ເຂົ້າ​ຮ່ວມ.

ທ່ານ​ນາງ ເພັດ​ສະໝອນ ສອນ ຮອງ​ຫົວໜ້າ​ສູນ​ສະຖິຕິ​ແຫ່ງ​ຊາດ ກ່າວ​ວ່າ: ໂຄງການ​ສຳ​ຫຼວດ​ເກັບ​ກຳ​ຂໍ້​ມູນ​ຫົວໜ່ວຍ​ທຸລະ​ກິດ​ ແມ່ນ​ເພື່ອ​ຮັບ​ໃຊ້​ໃຫ້​ແກ່​ການ​ວາງ​ແຜນ​ນະໂຍບາຍ​ເກັບ​ລາຍ​ຮັບ​ເຂົ້າ​ງົບປະມານ​ໄດ້​ຖືກຕ້ອງ​ຊັດ​ເຈນ ແລະ ສອດຄ່ອງ​ກັບ​ຕົວ​ຈິງ​ໃນ​ໄລຍະ​ໃໝ່ ເຊິ່ງ​ສອດຄ່ອງ​ກັບ​ຄຳ​ສັ່ງ​ຂອງ​ນາຍົກລັດຖະມົນຕີ ກ່ຽວ​ກັບ​ການ​ລົງ​ສຳ​ຫຼວດ​ເກັບ​ກຳ​ຖານ​ລາຍ​ຮັບ​ຄືນໃໝ່ ເພື່ອ​ເຮັດ​ໃຫ້​ວຽກ​ງານ​ນີ້ ​ໄດ້​ດຳເນີນ​ໄປ​ຖືກຕ້ອງ​ຕາມ​ລະບຽບ​ຫຼັກການ​ທີ່​ໄດ້​ກຳນົດ​ໃນ​ກົດໝາຍ​ວ່າ​ດ້ວຍ​ສະຖິຕິ (ສະບັບ​ປັບປຸງ) ແລະ ໄດ້​ຮັບ​ຜົນ​ຕາມ​ຈຸດປະສົງ​ຄາດໝາຍ​ທີ່​ກຳນົດ​ໄວ້ ກະຊວງ​ການ​ເງິນ​ຈຶ່ງ​ໄດ້​ສົມທົບ​ກັບ​ສູນ​ສະຖິຕິ​ແຫ່ງ​ຊາດ ກະຊວງ​ແຜນການ ແລະ ການ​ລົງທຶນ ແລະ ພາກສ່ວນ​ກ່ຽວຂ້ອງ​ອື່ນໆ ພ້ອມ​ກັນ​ຄົ້ນຄວ້າ​ສ້າງ​ແຜນ​ໂຄງ

ການ​ສຳ​ຫຼວດ​ນີ້​ຂຶ້ນ​ມາ.

ເປົ້າ​ໝາຍ​ຂອງ​ການ​ສຳ​ຫຼວດ​ຄັ້ງ​ນີ້ ແມ່ນ​ຫົວໜ່ວຍ​ພື້ນຖານ​ເສດຖະກິດ ຫົວໜ່ວຍ​ທຸລະ​ກິດ ແລະ ຫ້າງ​ຮ້ານ​ຂະໜາດ​ນ້ອຍ ແລະ ກາງ ທີ່​ຄຸ້ມ​ຄອງ​ໃນ​ລະບົບ​ແຂວງ ແລະ ເມືອງ ທີ່​ພວມ​ດຳເນີນ​ການເຄື່ອນໄຫວ​ທຸລະ​ກິດ ການ​ຜະລິດ​ສິນຄ້າ ແລະ ບໍລິການ​ຢູ່​ໃນ 4 ເມືອງ​ໃນ​ນະຄອນຫຼວງ​ວຽງ​ຈັນ ຄື: ເມືອງ​ຈັນທະ​ບູ​ລີ ສີ​ສັດຕະ​ນາກ ໄຊ​ເຊດ​ຖາ ແລະ ເມືອງ​ສີ​ໂຄດ​ຕະບອງ ເຊິ່ງ​ຄາດ​ວ່າ​ມີ​ທັງ​ໝົດ 175 ບ້ານ ໃນ​ນີ້ ມີ​ຫົວໜ່ວຍ​ທຸລະ​ກິດ​ປະມານ 23.632 ຫົວໜ່ວຍ ນອກ​ນັ້ນ ການ​ສຳ​ຫຼວດ​ຍັງ​ໄດ້​ແນໃສ່​ສຳ​ຫຼວດ​ບ້ານ ແລະ ບາງ​ຄອບຄົວ​ທີ່​ມີ​ການ​ເຊົ່າ​ອາຄານ ເຮືອນ ແລະ ຫ້ອງ​ແຖວ ເພື່ອ​ເບິ່ງ​ການ​ເກັບ​ລາຍ​ຮັບ​ດ້ານ​ການ​ເຊົ່າ​ຊັບ​ສິນ ທັງ​ນີ້ ກໍ່​ເພື່ອ​ເຮັດ​ໃຫ້ການ​ຈັດ​ເກັບ​ລາຍ​ຮັບ​ເຂົ້າ​ງົບປະມານ​ໄດ້​ຕາມ​ແຜນການ ແລະ ເພີ່ມ​ຂຶ້ນ​ໃນ​ແຕ່​ລະ​ປີ.

ຂ່າວທີ່ກ່ຽວຂ້ອງ