ອະນຸຮັກວັດທະນະທຳຂອງຊົນເຜົ່າ ປະດິດເປັນຜ້າແພທີ່ມີລາຄາ

113 14 ມິ.ນ. 2018 ຂ່າວໜ້າ​ໜຶ່ງ
ອະນຸຮັກວັດທະນະທຳຂອງຊົນເຜົ່າ ປະດິດເປັນຜ້າແພທີ່ມີລາຄາ

ສິນຄ້າ​ສີມື​ຫັດຖະກຳ​ລາວ ເປັນ​ຜະລິດ​ຕະ​ພັນ​ທີ່​ຍ້ອມ​ສີ​ທຳ​ມະ​ຊາດ ໂດຍ​ມີ​ການ​ອະນຸ​ຮັກ​ວັດທະນະທຳ​ຂອງ​ຊົນເຜົ່າ​ແງະ ຫຼື ກຼຽງ ທີ່​ມີ​ຮູບຊົງ​ລວດລາຍ​ແຕກ​ຕ່າງ​ກັນ ເຊິ່ງ​ປັດຈຸບັນ​ໄດ້​ຮັບ​ຄວາມ​ສົນໃຈ​ຈາກ​ແຂກ​ທັງ​ພາຍ​ໃນ ແລະ ຕ່າງປະເທດ ອັນ​ໄດ້​ສ້າງ​ລາຍ​ຮັບ​ໃຫ້​ແກ່​ຄອບຄົວ.

ທ່ານ ຄຳ​ໄລ ນອງ​ລາວ ຜູ້​ຜະລິດ​ຕະ​ພັນ​ເປັນ​ສິນຄ້າ​ສີມື​ຫັດຖະກຳ​ລາວ ໂດຍ​ຍ້ອມ​ສີ​ທຳ​ມະ​ຊາດ 100% ບ້ານໃໝ່​ຫົວ​ເມືອງ ເມືອງ​ລະ​ມານ ແຂວງ​ເຊ​ກອງ ໃຫ້​ສຳພາດ​ວ່າ: ເມື່ອ​ກ່ອນ​ຄອບຄົວ​ຂອງ​ຕົນ ​ໄດ້​ຕ່ຳ​ຜ້າແພ​ທີ່​ມີ​ລວດລາຍ​ສ່ອງ​ແສງ​ໃຫ້​ເຫັນ​ເຖິງ​ວັດທະນະທຳ ແລະ ຮີດຄອງ​ປະເພນີ​ຂອງ​ຊົນເຜົ່າ​ແງະ ແບບ​ປະຖົມ​ປະ​ຖານ​ຈາກ​ນັ້ນ ປີ 2013 ອົງການ​ໄຈ​ກາ​ໄດ້​ສະໜັບສະໜູນ​ໃຫ້​ຕົນ​ ເຂົ້າ​ຮ່ວມ​ເຝິກອົບຮົມ​ວິຊາ​ການ​ຍ້ອມ​ສີ​ທຳ​ມະ​ຊາດ​ໃຫ້​ຖືກຕ້ອງ​ຂັ້ນ​ຕອນ ​ແລະ ໄດ້​ມາດຕະຖານ ໄລຍະ 9 ວັນ ພາຍຫຼັງ​ທີ່​ເຝິກອົບຮົມ​ມາ​ແລ້ວ ​ກໍ່​ເລີ່ມ​ລົງມື​ຈັດ​ຕັ້ງ​ປະຕິບັດ​ໂດຍ​ໄດ້​ນຳ​ໃຊ້​ເປືອກ​ໄມ້​ຊະນິດ​ຕ່າງໆ​ ເປັນຕົ້ນ​ແມ່ນ​ ໄມ້​ດູ່​ຕົ້ນ​ຫວ້າ​ຕົ້ນ​ກະໂດນ ແລະ ຕົ້ນໄມ້​ອື່ນໆ​ມາ​ປະສົມ​ປະສານ​ກັນ​ເຮັດ​ໃຫ້​ຜ້າແພ​ມີ​ສີສັນ​ສວຍ​ງາມ ເຊິ່ງ​ປັດຈຸ​ບັນ​ຜະລິດ​ຕະ​ພັນ​ປະກອບມີ ສິ້ນ ຜ້າ​ຕັດ​ເສື້ອ ແພ​ປູ​ໂຕະ ເຊື່ອ​ນ້ອຍ ແລະ ແພ​ຫຍິບ​ກະ​ໂທງ ທີ່​ມີ​ລວດລາຍ​ຫຼາຍ​ຮູບ​ແບບ​ສະແດງ​ເຖິງ​ເອກະລັກ​ສະເພາະ​ຂອງ​ຊົນເຜົ່າ​ແງະ ​ເຊັ່ນ: ຄົນ​ຕຳ​ເຂົ້າ ເຫຼົ້າ​ໄຫ​ໄກ່​ໂຕ ແລະ ສັດຊະນິດ​ຕ່າງໆ ມີ​ລາຄາ​ຂາຍ​ແຕ່ 30 ພັນ​ກີບ ຫາ 250.000 ກີບ ສ່ວນ​ຕະຫຼາດ​ຈຳໜ່າຍ​ແມ່ນ​ຂາຍ​ກັບ​ທີ່ ນອກຈາກ​ນັ້ນ​ຍັງ​ມີ​ຕົວ​ແທນ​ຈຳໜ່າຍ​ຢູ່​ແຂວງ​ຫຼວງ​ພະ​ບາງ​ ແລະ ນະຄອນຫຼວງ​ວຽງ​ຈັນ ສະເລ່ຍ​ລາຍ​ຮັບ​ແຕ່​ລະ​ເດືອນ​ແມ່ນ​ຂຶ້ນ​ກັບ​ການ​ສັ່ງ​ຈອງ​ຂອງ​ລູກ​ຄ້າ.

ສິນຄ້າ​ສີມື​ຫັດຖະກຳ​ລາວ ເປັນ​ຜະລິດ​ຕະ​ພັນ​ທີ່​ຍ້ອມ​ສີ​ທຳ​ມະ​ຊາດ ເປັນ​ຜະລິດ​ຕະ​ພັນ​ທີ່​ເຮັດ​ແບບ​ຄອບຄົວ ປັດ​ຈຸບັນ​ໄດ້​ອອກ​ເຄືອ​ໃຫ້​ຄົນ​ຕ່ຳ​ປະມານ 15 ຄົນ ໃນ​ນີ້​ແມ່ນ​ທ່ານ ຄຳ​ໄລ ນອງ​ລາວ ເປັນ​ຄົນ​ອອກທຶນ​ໃຫ້​ໝົດ ພາຍຫຼັງ​ທີ່​ຕ່ຳ​ແລ້ວ​ຈະ​ໃຫ້​ຄ່າ​ແຮງ​ງານ​ຜືນ​ລະ 50 ພັນ​ກີບ​ຂຶ້ນ​ໄປ ນອກ​ນັ້ນ ຜະລິດ​ຕະ​ພັນ​ດັ່ງກ່າວ​ແມ່ນ​ໄດ້​ຮັບ​ເປັນ​ຜະລິດ​ຕະ​ພັນ​ຄອບຄົວ​ຕົວ​ແບບ ໃນ​ປີ 2017 ແລະ ຄາດ​ວ່າ​ຈະ​ໄດ້​ຮັບ​ເປັນ​ສິນຄ້າ​ໂອ​ດ໋ອບ​ໃນ​ໄວໆ​ນີ້.

ຂ່າວທີ່ກ່ຽວຂ້ອງ