ຂ່າວຫຼ້າສຸດ

ລາວ-ອີຢູ ໃຫ້ຄວາມສຳຄັນການຄ້າໄມ້ທີ່ຖືກກົດໝາຍ

186 12 ມິ.ນ. 2018 ຂ່າວໜ້າ​ໜຶ່ງ

ກອງ​ປະຊຸມ​ເຈລະຈາ​ຄັ້ງ​ທີ 2 ຂອງ​ແຜນ​ງານ​ການ​ປະຕິບັດ​ກົດໝາຍ​ປ່າໄມ້ ການ​ຄຸ້ມ​ຄອງ ແລະ ການ​ຄ້າ ເພື່ອ​ຈະ​ເປັນ​ຄູ່​ຮ່ວມ​ສັນຍາ​ການ​ຄ້າ​ໄມ້​ແບບ​ສະໝັກ​ໃຈ​ ລະຫວ່າງ ລາວ ແລະ ສະຫະພາບ​ເອີ​ຣົບ ຈັດ​ຂຶ້ນ​ວັນ​ທີ 7 ມິຖຸນາ 2018 ເປັນ​ປະທານ​ຮ່ວມ​ຂອງ​ທ່ານ ​ພວງ​ປາ​ຣິ​ສັກ ປຣະ​ວົງ​ວຽງ​ຄຳ ຮອງ​ລັດຖະມົນຕີ​ກະຊວງ​ກະສິກຳ ແລະ ປ່າໄມ້ ແລະ ທ່ານ ໂຣ​ເຮ ຣອດ​ຣີ​ເກັດສ໌ ຮອງ​ຫົວໜ້າ​ໜ່ວຍ​ງານ ທັງ​ເປັນ​ຫົວໜ້າ​ຮັບຜິດຊອບ​ວຽກ​ງານ​ດ້ານ​ສິ່ງແວດລ້ອມ ຄະນະ​ກຳມາ​ທິ​ການ​ສະຫະພາບ​ເອີ​ຣົບ ມີ​ທ່ານ​ຫົວໜ້າ​ກົມ​ປ່າໄມ້ ເຈົ້າ​ໜ້າທີ່​ນະໂຍບາຍ ຫົວໜ້າ​ຮັບຜິດຊອບ​ວຽກ​ງານ​ດ້ານ​ສິ່ງແວດລ້ອມ ຄະນະ​ກຳມາ​ທິ​ການ​ສະຫະພາບ​ເອີ​ຣົບ ແລະ ຂະແໜງການ​ກ່ຽວຂ້ອງ​ເຂົ້າ​ຮ່ວມ.

ການ​ເຈລະຈາ​ຄັ້ງ​ນີ້ ທັງ​ສອງ​ຝ່າຍ​ໄດ້​ປຶກສາ​ຫາລື​ຄວາມ​ຄືບ​ໜ້າ​ຂອງ​ການ​ສ້າງ ແລະ ການ​ປັບປຸງ​ລະບົບ​ຄ້ຳປະກັນ​ໄມ້​ທີ່​ຖືກຕ້ອງ​ຕາມ​ກົດໝາຍ ເຊິ່ງ​ຈະ​ເປັນ​ລະບົບ​ທີ່​ນຳ​ໃຊ້​ເພື່ອ​ຢັ້ງຢືນ​ກວດກາ​ຄວາມ​ຖືກຕ້ອງ​ຂອງ​ໄມ້ ແລະ ຜະລິດ​ຕະ​ພັນ​ໄມ້​ຕາມ​ລະບຽບ ແລະ ກົດໝາຍ​ຢູ່​ລາວ ພາຍຫຼັງ​ທີ່​ກອງ​ປະຊຸມ​ເຈລະຈາ​ຄັ້ງ​ທີ 1 ທີ່​ຈັດ​ຂຶ້ນ​ໃນ​ປີຜ່ານມາ ລາວ​ໄດ້​ສຸມ​ໃສ່​ປັບປຸງ​ບັນດາ​ອົງ​ປະກອບ​ຂອງ​ລະບົບ​ດັ່ງກ່າວ ແລະ ມີ​ຄວາມ​ຄືບ​ໜ້າ​ໃນ​ການ​ປັບປຸງ​ນິ​ຍາມ​ໄມ້​ທີ່​ຖືກຕ້ອງ​ຕາມ​ກົດໝາຍ ເຊິ່ງ​ເປັນ​ການ​ວິເຄາະ​ໄຈ້​ແຍກ​ບັນດາ​ນິຕິ​ກຳ​ທີ່​ກ່ຽວຂ້ອງ​ໃນ​ລາວ​ ເພື່ອ​ເລືອກເຟັ້ນ​ເອົາ​ເນື້ອ​ໃນ​ສຳຄັນ​ທີ່​ກ່ຽວຂ້ອງ​ໃນ​ການ​ກຳນົດ ອ້າງ​ອີງ​ເຖິງ​ຄວາມ​ຖືກຕ້ອງ​ຕາມ​ກົດໝາຍ​ຂອງ​ໄມ້ ການ​ປັບປຸງ​ລະບົບ​ຄຸ້ມ​ຄອງ​ຕ່ອງ​ໂສ້​ການ​ສະໜອງ​ໄມ້ ການ​ສ້າງ​ລະບົບ​ຢັ້ງຢືນ​ກວດກາ​ຄວາມ​ຖືກຕ້ອງ​ຂອງ​ໄມ້ ແລະ ອື່ນໆ.

ພາຍຫຼັງ​ສຳເລັດ​ການ​ເຈລະຈາ​ຄັ້ງ​ນີ້​ແລ້ວ ຈະ​ໄດ້​ສືບຕໍ່​ປັບປຸງ​ນິ​ຍາມ​ໄມ້​ທີ່​ຖືກຕ້ອງ​ຕາມ​ກົດໝາຍ​ ໂດຍ​ສະເພາະ ໄມ້​ທີ່​ມາ​ຈາກ​ເຂດ​ຫັນປ່ຽນ​ທີ່​ດິນ ປ່າໄມ້ ສວນ​ປູກ ປ່າໄມ້​ບ້ານ ໄມ້​ຖືກ​ຮິບ ໄມ້​ນຳ​ເຂົ້າ​ຈາກ​ຕ່າງປະເທດ ແລະ ອົງ​ປະກອບ​ອື່ນໆ​ຂອງ​ລະບົບ​ຄ້ຳປະກັນ​ໄມ້​ທີ່​ຖືກຕ້ອງ​ຕາມ​ກົດໝາຍ ພ້ອມ​ນີ້​ຍັງ​ເປັນ​ການ​ສ້າງ​ເງື່ອນໄຂ ໂອກາດ​ອັນ​ດີ​ແກ່​ລາວ ​ໃນ​ການ​ປະກອບສ່ວນ ແລະ ຮ່ວມ​ມື​ກັບ​ຫຼາຍ​ປະເທດ ​ທີ່​ມີ​ເປົ້າ​ໝາຍ​ໃນ​ການ​ສະກັດ​ກັ້ນ​ຕ້ານ​ການ​ຄ້າ​ໄມ້​ທີ່​ຜິດ​ກົດໝາຍ.

ຂ່າວທີ່ກ່ຽວຂ້ອງ