ຫຼາຍປະເທດ ໃຫ້ຄວາມສຳຄັນການປົກປ້ອງສິດ ແລະ ຜົນປະໂຫຍດແຮງງານ

301 11 ມິ.ນ. 2018 ຂ່າວໜ້າ​ໜຶ່ງ
ຫຼາຍປະເທດ ໃຫ້ຄວາມສຳຄັນການປົກປ້ອງສິດ ແລະ ຜົນປະໂຫຍດແຮງງານ

ກອງ​ປະຊຸມ​ສະມັດຊາ​ໃຫຍ່​ຂອງ​ອົງການ​ແຮງ​ງານ​ສາກົນ ສະໄໝ 107 ປີ 2018 ຈັດ​ຂຶ້ນ​ທີ່​ເມືອງ​ເຊີ​ແນວ ປະເທດ​ສະ​ວິດ​ແຕ່​ວັນ​ທີ 28 ພຶດສະພາ ຫາ 8 ມິຖຸນາ 2018 ໂດຍ​ເປັນ​ປະທານ​ຂອງ​ທ່ານ​ຊາ​ນີ ໂມ​ຣາດ ລັດຖະມົນຕີກະຊວງ​ແຮງ​ງານ ປະເທດ​ຈໍ​ແດນ ກອງ​ປະຊຸມ​ດັ່ງກ່າວ​ເປັນ​ເວທີ​ປຶກສາ​ຫລື ແລະ ແລກປ່ຽນ​ຄວາມ​ຄິດ​ຄວາມ​ເຫັນ​ຂອງ​ອົງ​ການຈັດຕັ້ງ​ສາມ​ຝ່າຍ ລັດຖະບານຕາງໜ້າ​ຜູ້​ໃຊ້​ແຮງ​ງານ ແລະ ຕາງໜ້າ​ຜູ້​ອອກແຮງ​ງານ ເພື່ອ​ປົກ​ປ້ອງ​ສິດ ແລະ ຜົນ​ປະໂຫຍດ​ຂອງ​ແຮງ​ງານ ແລະ ເປັນ​ກອງ​ປະຊຸມ​ທີ່​ມີ​ຄວາມ​ໝາຍ​ສຳຄັນ ເນື່ອງ​ຈາກ​ເປັນ​ປີ​ກະກຽມ​ການ​ສະເຫຼີມສະຫຼອງ​ການ​ສ້າງຕັ້ງ​ອົງການ​ແຮງ​ງານ​ສາກົນ ຄົບຮອບ 100 ປີ (1919-2019) ແລະ ມີ​ບັນດາ​ກອງ​ປະຊຸມ​ປິ່ນ​ອ້ອມ​ທີ່​ສຳຄັນ​ເຊັ່ນ: ກອງ​ປະຊຸມ​ສຸດ​ຍອດ​ກ່ຽວ​ກັບ​ວຽກ​ຂອງ​ໂລກ ກອງ​ປະຊຸມ​ຄະນະ​ກຳ​ມະ​ການຈັດຕັ້ງ​ປະຕິບັດ​ສົນທິສັນຍາ​ຂອງ​ອົງການ​ແຮງ​ງານ​ສາກົນ ກອງ​ປະຊຸມ​ລັດຖະມົນຕີ​ແຮງ​ງານ​ອາຊີ-ປາ​ຊີ​ຟິກ ກອງ​ປະຊຸມ​ລັດຖະມົນຕີ​ແຮງ​ງານ​ຂອງ​ບັນດາ​ປະເທດ​ບໍ່​ຮ່ວມ​ກຸ່ມ ແລະ ກອງ​ປະຊຸມ​ອື່ນໆ.

ກອງ​ປະຊຸມ​ໄດ້​ຄົ້ນຄວ້າ​ບັນດາ​ບັນຫາ ແລະ ຮັບຮອງ​ເອກະສານ​ທີ່​ສຳຄັນ​ຄື: ບົດ​ລາຍ​ງານ​ການ​ເງິນ ບົດ​ລາຍ​ງານ​ຄວາມ​ຄືບ​ໜ້າ​ການຈັດຕັ້ງ​ປະຕິບັດ ​ສົນທິສັນຍາ​ຂອງ​ອົງການ​ແຮງ​ງານ​ສາກົນ ຮັບຮອງ​ເອົາ​ບົດ​ລາຍ​ງານ​ການ​ປຶກສາ​ຫາລື​ເບື້ອງ​ຕົ້ນ​ ກ່ຽວ​ກັບ​ປະ​ສິດທິ​ຜົນ​ການ​ພັດທະນາ​ການ​ຮ່ວມ​ມື​ຂອງ​ອົງການ​ແຮງ​ງານ​ສາກົນ ເພື່ອ​ສະໜັບສະໜູນ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ ຍົກເລີກ 6 ສົນທິສັນຍາ ແລະ 3 ຂໍ້​ແນະນຳ​ຂອງ​ອົງການ​ແຮງ​ງານ​ສາກົນ​ເຊັ່ນ: ສົນທິສັນຍາເລກ​ທີ 21 (1926) ວ່າ​ດ້ວຍ​ການ​ກວດກາ​ການ​ນຳ​ເຂົ້າ​ແຮງ​ງານ ສົນທິສັນຍາ​ເລກ​ທີ 50 (1936) ວ່າ​ດ້ວຍ​ແຮງ​ງານ​ຊົນເຜົ່າ​ດັ້ງເດີມ ສົນທິສັນຍາ​ເລກ​ທີ 64 (1939) ວ່າ​ດ້ວຍ​ສັນຍາ​ການ​ຈ້າງ​ງານ​ຂອງ​ແຮງ​ງານ​ຊົນເຜົ່າ​ດັ່ງ​ເດີມ ສົນທິສັນຍາເລກ​ທີ 65 (1939) ວ່າ​ດ້ວຍ​ການ​ລົງໂທດ​ແຮງ​ງານ​ຊົນເຜົ່າ​ດັ່ງ​ເດີມ ສົນທິສັນຍາເລກ​ທີ 86 (1947) ວ່າ​ດ້ວຍ​ສັນຍາ​ການ​ຈ້າງ​ງານ​ແຮງ​ງານ​ຊົນເຜົ່າ​ດັ່ງ​ເດີມ ສົນທິສັນຍາເລກ​ທີ 104 (1955) ວ່າ​ດ້ວຍ​ການ​ລົບ​ລ້າງ​ການ​ລົງໂທດ​ແຮງ​ງານ​ຊົນເຜົ່າ​ດັ່ງ​ເດີມ ຂໍ້​ແນະນຳເລກ​ທີ 07 (1920) ວ່າ​ດ້ວຍ​ຊົ່ວໂມງ​ເຮັດ​ວຽກ​ຂອງ​ແຮງ​ງານ​ປະມົງ ຂໍ້​ແນະນຳເລກ​ທີ 61 (1939) ວ່າ​ດ້ວຍ​ການ​ເຄື່ອນ​ຍ້າຍ​ແຮງ​ງານ ເພື່ອ​ການ​ຊອກ​ຫາ​ວຽກ​ເຮັດ​ງານ​ທຳ ແລະ ຂໍ້​ແນະນຳ ເລກ​ທີ 62 (1939) ວ່າ​ດ້ວຍ​ການ​ຮ່ວມ​ມື​ລະຫວ່າງ​ລັດ​ຕໍ່​ກັບ​ການ​ເຄື່ອນ​ຍ້າຍ​ແຮງ​ງານ​ເພື່ອ​ການ​ຊອກ​ຫາ​ວຽກ​ເຮັດ​ງານ​ທຳ ນອກ​ນັ້ນຍັງ​ໄດ້​ລົງ​ຄະແນນ​ສຽງ​ຮັບຮອງ​ເອົາ​ນິຕິ​ກຳ​ຂອງ​ອົງການ​ແຮງ​ງານ​ສາກົນ ເຊັ່ນ: ການ​ໃຊ້​ຄວາມ​ຮຸນ​ແຮງ​ຕໍ່​ແມ່ຍິງ ແລະ ຜູ້​ຊາຍ​ໃນ​ສະຖານທີ່​ເຮັດ​ວຽກ.

ໃນ​ໂອກາດ​ເຂົ້າ​ຮ່ວມ​ກອງ​ປະຊຸມ​ຄັ້ງ​ນີ້ ຄະນະ​ຜູ້​ແທນ​ອົງ​ການຈັດຕັ້ງ​ສາມ​ຝ່າຍ​ຂອງ​ລາວ​ ໄດ້​ປະກອບ​ຄວາມ​ເຫັນ​ໂດຍທ່ານ ຄຳ​ແພງ ໄຊ​ສົມ​ແພງ ລັດຖະມົນຕີກະຊວງ​ແຮງ​ງານ ແລະ ສະຫວັດດີ​ການ​ສັງຄົມ ໄດ້​ກ່າວ​ວ່າ: “ສິດທິ​ຂອງ​ແມ່ຍິງ​ໃນ​ສະຖານທີ່​ເຮັດ​ວຽກ ເປັນ​ບັນຫາ​ທີ່​ສຳຄັນ​ໃນ​ການ​ກະກຽມ​ການ​ສະເຫຼີມສະຫຼອງ ​ວັນ​ສ້າງຕັ້ງ​ອົງການ​ແຮງ​ງານ​ສາກົນ ຄົບຮອບ 100 ປີ” ຄຽງ​ຄູ່​ກັນ​ນັ້ນ ທ່ານ​ຍັງ​ໄດ້​ແຈ້ງ​ໃຫ້​ກອງ​ປະຊຸມ​ຊາບ​ເຖິງ​ຄວາມ​ເອົາ​ໃສ່​ຂອງ​ລັດຖະບານ​ໃນ​ການ​ປົກ​ປ້ອງ​ສິດ ແລະ ຜົນ​ປະໂຫຍດ​ຂອງ​ແຮງ​ງານ ໂດຍ​ຈັດ​ຕັ້ງ​ຜັນ​ຂະຫຍາຍ​ສົນທິສັນຍາ​ສາກົນ​ທີ່​ໄດ້​ໃຫ້​ສັດຕະຍາບັນ ເຊັ່ນ: ສົນທິສັນຍາ​ວ່າ​ດ້ວຍ​ການລົບ​ລ້າງ​ຕໍ່​ການ​ຈຳແນກ​ແມ່ຍິງ​ທຸກ​ຮູບ​ແບບ (CEDAW) ແລະ ສົນທິສັນຍາ​ຂອງ​ອົງການ​ແຮງ​ງານ​ສາກົນ ໂດຍ​ກະຊວງ​ແຮງ​ງານ ແລະ ສະຫວັດດີ​ການ​ສັງຄົມ ໄດ້​ເປັນໃຈ​ກາງ​ປະສານ​ສົມທົບ​ກັບ​ອົງ​ການຈັດຕັ້ງ​ສາມ​ຝ່າຍ ແລະ ຂະແໜງການ​ທີ່​ກ່ຽວຂ້ອງ​ຜັນ​ຂະຫຍາຍ​ເນື້ອ​ໃນ​ສົນທິສັນຍາ​ເລົ່າ​ນັ້ນ​ມາ​ເປັນ​ກົດໝາຍ ແລະ ລະບຽບ​ການ​ຕ່າງໆ ແຮງ​ງານ​ເພດ​ຍິງ​ໄດ້​ຮັບ​ການ​ປົກ​ປ້ອງ ເພື່ອ​ໃຫ້​ມີ​ຄວາມ​ສະເໜີ​ພາບ​ກັບ​ແຮງ​ງານ​ເພດ​ຊາຍ​ໃນ​ການ​ເຮັດ​ວຽກ ການ​ໄດ້​ຮັບ​ໂອກາດ​ຍົກ​ລະດັບ​ສີມື​ແຮງ​ງານ ສະເໝີພາບ​ໃນ​ການ​ຮັບ​ເງິນເດືອນ ແລະ ຄ່າ​ແຮງ​ງານ ມີ​ສິດ​ທີ່​ຈະ​ພັກຜ່ອນ​ໃນ​ເວລາ​ຖືພາ ແລະ ໃນວ​ລາ​ເກີດ​ລູກ​ຢ່າງ​ເໝາະ​ສົມ ນອກ​ນັ້ນ ຍັງ​ໄດ້​ກຳນົດ​ໂຄງການ​ເຊິ່ງ​ລວມ​ຢູ່​ໃນ​ແຜນ​ວຽກ​ທີ່​ມີ​ຄຸນຄ່າ ແລະ ເປັນ​ທຳ.

ໃນ​ໂອກາດ​ນີ້​ ຄະນະ​ຜູ້​ແທນ​ລາວ ​ຍັງ​ໄດ້​ພົບ​ປະ​ສອງ​ຝ່າຍ​ກັບ ທ່ານ​ນາງ ໂທ​ໂມໂກະ ຜູ້ອຳນວຍການ​ຫ້ອງການ​ແຮງ​ງານ​ສາກົນ​ປະຈຳ​ພາກ​ພື້ນ​ອາຊີ-ປາ​ຊີ​ຟິກ ເພື່ອ​ເປັນ​ການ​ສົ່ງເສີມ​ການ​ຮ່ວມ​ມື​ສອງ​ຝ່າຍ​ທີ່​ດີ ແລະ ສືບຕໍ່​ເພີ່ມ​ທະວີ​ການ​ຮ່ວມ​ມື ໂດຍ​ສະເພາະ ການຈັດຕັ້ງ​ປະຕິບັດ​ແຜນ​ວຽກ​ທີ່​ມີ​ຄຸນຄ່າ ແລະ ເປັນ​ທຳ​ສະບັບ​ທີ​ສອງ​ຂອງ​ລາວ ແລະ ເຂົ້າ​ຮ່ວມ​ກອງ​ປະຊຸມ​ລັດຖະມົນຕີ​ແຮງ​ງານ​ອາ​ຊຽນ ເພື່ອ​ເປັນ​ການສະແດງ​ເຖິງ​ຄວາມ​ສາມັກຄີ ແລະ ສົ່ງເສີມ​ເຊິ່ງ​ກັນ ແລະ ກັນ​ຂອງ​ອາ​ຊຽນ​ສູ່​ເວທີ​ສາກົນ.

ຂ່າວທີ່ກ່ຽວຂ້ອງ