ເປີດຂະບວນການປູກເຂົ້າ ຕາມທິດຫັນເປັນທັນສະໄໝ ຫຼຸດຜ່ອນແຮງງານ

357 11 ມິ.ຖ. 2018 ຂ່າວໜ້າ​ໜຶ່ງ
ເປີດຂະບວນການປູກເຂົ້າ ຕາມທິດຫັນເປັນທັນສະໄໝ ຫຼຸດຜ່ອນແຮງງານ

ຂະແໜງ​ປູກຝັງ ພະ​ແນກ​ກະສິກຳ ແລະ ປ່າໄມ້ ນະຄອນຫຼວງ​ວຽງ​ຈັນ ຮ່ວມ​ກັບ​ຫ້ອງການ​ກະສິກຳ ແລະ ປ່າໄມ້ ເມືອງ​ໄຊ​ທານີ ແລະ ບໍລິສັດ ອິນ​ຊີ​ທອງ​ມໍ​ເຕີ ຈຳກັດ​ຜູ້​ດຽວ ໄດ້​ເປີດ​ຂະ​ບວນ​ການ​ປູກ​ເຂົ້າ​ຕາມ​ທິດ​ຫັນ​ເປັນ​ທັນ​ສະໄໝ ແລະ ຫຼຸດຜ່ອນ​ແຮງ​ງານ​ຊາວນາ ຂຶ້ນ​ວັນ​ທີ 8 ມິຖຸນາ 2018 ທີ່​ສູນ​ສົ່ງເສີມ​ກະສິກຳ​ທົ່ງ​ຮາບ-ທ່າ​ງ່ອນ ເມືອງ​ໄຊ​ທານີ ມີ​ທ່ານ ຫຼ້າ​ສາຍ ນວນ​ທາ​ສິງ ຫົວໜ້າ​ພະ​ແນກກະສິກຳ ແລະ ປ່າໄມ້ ນະຄອນຫຼວງ​ວຽງ​ຈັນ ທ່ານ ໜູ​ກີ ສີ​ຫາ​ລາດ ຮອງ​ເຈົ້າເມືອງ​ໄຊ​ທານີ ທ່ານ​ອຳນວຍ​ການ​ບໍລິສັດ ​ອິນ​ຊີ​ທອງ ມໍ​ເຕີ​ຈຳກັດ​ຜູ້​ດຽວ ທ່ານ​ຫົວໜ້າ​ກຸ່ມ​ທ່າ​ງ່ອນ ພະນັກງານ​ວິຊາ​ການ ແລະ ຊາວ​ກະສິກອນ​ເຂົ້າ​ຮ່ວມ.

ທ່ານ ວາດ​ສະໜາ ສີ​ຈະເລີນ ຫົວໜ້າ​ຂະແໜງ​ປູກຝັງ ໄດ້​ກ່າວ​ວ່າ: ການ​ເປີດ​ຂະ​ບວນ​ການ​ປູກ​ເຂົ້າ​ດ້ວຍ​ກົນ​ຈັກ​ຄັ້ງ​ນີ້ ໄດ້​ນຳ​ໃຊ້​ເຄື່ອງ​ຈັກ​ຢອດ​ເຂົ້າ​ຢູ່​ໃນ​ເນື້ອທີ່ 2 ເຮັກຕາ ເຊິ່ງ​ເປັນ​ຕົວ​ແບບ​ໜຶ່ງ ເພື່ອ​ຢາກ​ໃຫ້​ຊາວ​ກະສິກອນ​ມີ​ທາງ​ເລືອກ​ໃນ​ການ​ຫຼຸດຜ່ອນ​ແຮງ​ງານ​ຄົນ​ໃນ​ການ​ປັກ​ດຳ​ເຂົ້າ ແລະ ຍັງ​ມີ​ຫຼາຍ​ວິທີ​ການ ໂດຍ​ສະເພາະແມ່ນ​ການ​ນຳ​ໃຊ້​ເຄື່ອງ​ດຳນາ ນາຫວ່ານ ນາ​ໂຍນ ທີ່​ເປັນ​ເຕັກນິກ​ໜຶ່ງ​ທີ່​ຫຼຸດຜ່ອນ​ແຮງ​ງານ​ຂອງ​ຊາວ​ກະສິກອນ​ໃນ​ການ​ຜະລິດ​ກະສິກຳ ແລະ ການ​ເປີດ​ຂະ​ບວນ​ການ​ປູກ​ເຂົ້າ​ຢອດ​ຄັ້ງ​ນີ້​ ຕາມ​ແຜນການ​ແມ່ນ​ຊ້າ​ຍ້ອນ​ວ່າ​ພະ​ແນກ​ກະສິກຳ ແລະ ປ່າໄມ້​ນະຄອນຫຼວງ​ໄດ້​ຮັບ​ເຄື່ອງ​ຈັກ​ຊ້າ ຕາມ​ປົກກະຕິ​ແລ້ວ​ ກິດຈະກຳ​ນີ້​ແມ່ນ​ເລີ່ມ​ແຕ່​ຕົ້ນ​ເດືອນ​ເມສາ ​ເຊິ່ງ​ເປັນ​ໄລຍະ​ທີ່​ຊາວ​ກະສິກອນ​ເລີ່ມກະກຽມ​ການ​ຜະລິດ​ລະດູຝົນ ແຕ່​ເຖິງ​ແນວໃດ​ກໍ່​ຕາມ​ເພື່ອ​ໃຫ້​ເປັນ​ຂະ​ບວນ​ການ ແລະ ສາທິດ​ໃຫ້​ຊາວ​ກະສິກອນ ກໍ່​ຄືປະຊາຊົນ​ເບິ່ງ​ວິທີ​ການ​ເຮັດ ແລະ ເພື່ອ​ເຮັດ​ໃຫ້​ຊາວ​ນະຄອນຫຼວງ ກໍ່​ຄືຊາວນາ​ຢູ່​ກຸ່ມ​ທ່າ​ງ່ອນ​ໄດ້​ເຫັນ ແລະ ຮຽນ​ຮູ້​ກ່ຽວ​ກັບ​ວິທີ​ການ​ຢອດ​ເຂົ້າ ເພື່ອ​ນຳໄປ​ຈັດ​ຕັ້ງ​ປະຕິບັດ​ໃນ​ການ​ປະຢັດ​ຕົ້ນ​ທຶນ ປະຢັດ​ເວລາ ແລະ ປະຢັດ​ແຮງ​ງານ​ນຳ​ອີກ ເມື່ອ​ທຽບໃສ່​ການ​ຫວ່ານ ແລະ ຈຸດ​ດີ​ໜຶ່ງ​ອີກ​ການ​ໃຊ້​ເຄື່ອງ​ຈັກ​ຢອດ​ນີ້ ​ຈະ​ເປັນ​ແຖວ​ຈົບງາມ​ດີ​ກວ່າ​ວິທີ​ຫວ່ານ ເມື່ອ​ເວລາ​ຕົ້ນ​ເຂົ້າ​ໃຫຍ່​ຂຶ້ນ​ມາ ແລະ ງ່າຍ​ຕໍ່​ການ​ໃສ່​ຝຸ່ນ ເວລາ​ຫຼົກ​ຫຍ້າ​ກໍ່​ງ່າຍ ແລະ ສາມາດ​ຮັກສາ​ໄດ້​ສະມັດຖະພາບ​ການ​ຜະລິດ​ກໍ່​ດີ​ກວ່າ​ນາຫວ່ານ ດັ່ງນັ້ນ ຈຶ່ງ​ຢາກ​ໃຫ້​ຊາວນາ​ພ້ອມ​ກັນ​ຫັນ​ມາ​ໃຊ້​ການ​ປັກ​ດຳ​ເຂົ້າ​ດ້ວຍ​ເຄື່ອງ​ຈັກ​ຢອດ ເພື່ອ​ກ້າວ​ໄປ​ສູ່​ການ​ຫັນ​ໄປ​ເປັນ​ທັນ​ສະໄໝ​ເທື່ອ​ລະ​ກ້າວ ແລະ ເຮັດ​ໃຫ້ການ​ຜະລິດ​ທັນ​ຕາມ​ລະດູ​ການ ເຊິ່ງ​ກິດຈະກຳ​ດັ່ງກ່າວ​ນີ້​ ຍັງ​ຈະ​ໄດ້​ຈັດ​ໄປ​ເລື້ອຍໆ​ໃນ​ຂອບ​ເຂດ​ທົ່ວ​ນະຄອນຫຼວງ​ວຽງ​ຈັນ.

ຂ່າວທີ່ກ່ຽວຂ້ອງ