ການນຳພັກ-ລັດຂັ້ນສູງ ຮ່ວມກິດຈະກຳປູກຕົ້ນໄມ້ທີ່ວັງເຍົາວະຊົນ

510 07 ມິ.ນ. 2018 ຂ່າວໜ້າ​ໜຶ່ງ
ການນຳພັກ-ລັດຂັ້ນສູງ ຮ່ວມກິດຈະກຳປູກຕົ້ນໄມ້ທີ່ວັງເຍົາວະຊົນ

ໃນ​ໂອກາດ​ສະເຫຼີມສະຫຼອງ ​ວັນ​ສ້າງຕັ້ງ​ອົງ​ການຈັດຕັ້ງ​ຊາວ​ໜຸ່ມ​ປະຊາຊົນ ປະຕິວັດ​ລາວ (​ຄຊປປລ) ຄົບຮອບ 63 ປີ ສູນ​ກາງ ​ຊປປລ ໄດ້​ຈັດ​ໃຫ້​ມີ​ຫຼາຍ​ກິດຈະກຳ​ທີ່​ມີ​ບັນຍາກາດ ແລະ ເນື້ອ​ໃນ ເປັນຕົ້ນ​ຂະ​ບວນ​ການ​ເຜີຍແຜ່​ໂຄສະນາ​ຕາມ​ຫົວຂໍ້​ຕ່າງໆ ຂະ​ບວນ​ການ 4 ບຸກຂອງ​ຊາວ​ໜຸ່ມ ຂະ​ບວນ​ການ 3 ດີ 4 ຮູ້ຂອງ​ເຍົາວະ​ຊົນ ຂະ​ບວນ​ການ​ລົງ​ຮາກ​ຖານ ຂະ​ບວນ​ການ​ປັບປຸງ​ການຈັດຕັ້ງ ຂະ​ບວນ​ການ​ຮ່ຳຮຽນ-ສ້າງ​ວຽກ​ເຮັດ​ງານ​ທຳ​ໃຫ້​ແກ່​ຊາວ​ໜຸ່ມ ຂະ​ບວນ​ການ​ຕອບ​ບຸນ​ແທນ​ຄຸນ ຂະ​ບວນ​ການ​ອາສາ​ສະໝັກ​ຕະລຸມບອນ ແລະ ຂະ​ບວນ​ການ​ອື່ນໆ.

ສຳລັບ​ກິດຈະກຳ​ສະເຫຼີມສະຫຼອງ​ ວັນ​ປູກ​ຕົ້ນໄມ້​ແຫ່ງ​ຊາດ ແລະ ວັນເດັກນ້ອຍ​ສາກົນ ທີ່​ຈັດ​ຂຶ້ນ​ໃນ​ວັນ​ທີ 1 ມິຖຸນາ​ຂອງ​ທຸກ​ປີ ພິເສດ​ປີ 2018 ສູນ​ກາງ ​ຊປປລ ໄດ້​ຈັດ​ຂະ​ບວນ​ການ​ດັ່ງກ່າວ​ເປັນ 2 ຈຸດ​ຄື: ຈຸດ​ທີ 1 ໃນ​ວັນ​ທີ 4 ມິຖຸນາ 2018 ທີ່​ສຳນັກງານ​ສູນ​ກາງ ​ຊປປລ ໄດ້​ຈັດ​ສະເຫຼີມສະຫຼອງ​ວັນ​ເດັກນ້ອຍ​ສາກົນ​ຂຶ້ນ ພາຍ​ໃຕ້​ຫົວຂໍ້ “ເຍົາວະ​ຊົນ​ຍຸກ​ໃໝ່​ໃສ່ໃຈ​ວັດທະນະທຳ ຕ້ອນຮັບ​ປີ​ທ່ອງ​ທ່ຽວ​ລາວ 2018” ພາຍ​ໃນ​ງານ​ມີ​ຫຼາຍ​ກິດຈະກຳ​ແຂ່ງຂັນ​ຂອງ​ເຍົາວະ​ຊົນ ເປັນຕົ້ນ ແຂ່ງຂັນ​ການ​ຕີ​ກອງ​ດຸ​ລິ​ຍາງ​ຕາມ​ສຽງ​ເພງ​ປະຕິວັດ ແຂ່ງຂັນ​ສວນສະໜາມ​ແປ​ຕົວ​ອັກສອນ ສະແດງ​ລະຄອນ ກິດຈະກຳ​ອື່ນໆ​ທີ່​ມີ​ເນື້ອ​ໃນ ແລະ ຟົດຟື້ນ ສຳລັບ​ຈຸດ​ທີ 2 ໃນ​ວັນ​ທີ 6 ມິຖຸນາ 2018 ທີ່​ສະຖານທີ່​ປຸກ​ສ້າງ​ວັງ​ເຍົາວະ​ຊົນ ບ້ານ​ດົງ​ໝາກຄາຍ ເມືອງ​ໄຊ​ທານີ ນະຄອນຫຼວງ​ວຽງ​ຈັນ ສູນ​ກາງ ​ຊປປລ ໄດ້​ຈັດ​ຂະ​ບວນ​ການ​ປູກ​ຕົ້ນໄມ້​ພາຍ​ໃຕ້​ຫົວຂໍ້ “ສິ່ງແວດລ້ອມ​ທີ່​ດີ​ໃນ​ວັນ​ນີ້ ຈະ​ໄດ້​ຜູ້​ສືບ​ທອດ​ທີ່​ດີ​ໃນ​ອະນາຄົດ” ໂດຍ​ເປັນ​ປະທານ​ຂອງ​ທ່ານ​ ອາ​ລຸນ​ໄຊ ສູນ​ນະລາດ ເລຂາ​ຄະນະ​ບໍລິຫານ​ງານ​ສູນ​ກາງ ​ຊປປລ ມີ​ທ່ານ ບຸນ​ຍັງ ວໍລະ​ຈິດ ເລຂາທິການ​ໃຫຍ່ ​ຄະນະ​ບໍລິຫານ​ງານ​ສູນ​ກາງ​ພັກ ປະທານ​ປະເທດ  ບັນດາ​ກຳມະການ​ກົມ​ການເມືອງ​ສູນ​ກາງ​ພັກ ເຈົ້າ​ຄອງ​ນະຄອນຫຼວງ ອົງ​ການຈັດຕັ້ງ​ມະຫາຊົນ​ຂັ້ນ​ສູນ​ກາງ ລັດຖະມົນຕີ ອະດີດ​ເລຂາ​ຄະນະ​ບໍລິຫານ​ງານ​ສູນ​ກາງ ​ຊປປລ ຕະຫຼອດ​ຮອດ​ການ​ນຳ​ຊາວ​ໜຸ່ມ​ອ້ອມ​ຂ້າງ​ສູນ​ກາງ ນະຄອນຫຼວງ ກະຊວງ ອົງການ ແລະ ສະມາຊິກ​ຊາວ​ໜຸ່ມ ເຍົາວະ​ຊົນ-ອະນຸຊົນ ​ເຂົ້າ​ຮ່ວມ.

ບັນດາ​ການ​ນຳ​ພັກ-ລັດຂັ້ນ​ສູງ ​ທີ່​ໃຫ້​ກຽດ​ເຂົ້າ​ຮ່ວມ​ໃນ​ພິທີ​ປູກ​ຕົ້ນໄມ້​ກັບ​ການ​ນຳ​ຊາວ​ໜຸ່ມ ສະມາຊິກ​ຊາວ​ໜຸ່ມ ເຍົາວະ​ຊົນ-ອະນຸຊົນ ຄັ້ງ​ນີ້​ເປັນ​ຂີດ​ໝາຍ​ປະຫວັດສາດ​ໜຶ່ງ​ທີ່​ສຳຄັນ​ ໃນ​ມູນເຊື້ອ​ຂອງ​ຊາວ​ໜຸ່ມ ທັງ​ເປັນ​ການ​ສ້າງ​ຄວາມ​ເຊື່ອ​ໝັ້ນ ສ້າງ​ກຳລັງ​ໃຈ​ອັນ​ແຮງ​ກ້າ ແລະ ສ້າງ​ເງື່ອນໄຂ​ໃນ​ການເຄື່ອນໄຫວ​ວຽກ​ງານ​ຕາມ​ພາລະ​ບົດບາດ​ຂອງ ​ຄຊປປລ ໃນ​ໄລຍະ​ໃໝ່ ແລະ ຍັງ​ເປັນ​ການ​ສືບຕໍ່​ເພີ່ມ​ທະວີ​ການ​ນຳພາ​ຊີ້​ນຳໂດຍ​ກົງ​ຂອງ​ພັກ ແລະ ການ​ສ້າງ​ເງື່ອນໄຂ​ເອື້ອ​ອຳນວຍ​ຂອງ​ລັດ ​ໃນ​ການ​ເບິ່ງແຍງດູ​​ແລ ແລະ ພັດທະນາ​ຊາວ​ໜຸ່ມ-ເຍົາວະ​ຊົນ-ອະນຸຊົນ ໃນ​ວັນ​ນີ້​ ທີ່​ຈະ​ກາຍເປັນ​ຜູ້​ໃຫຍ່​ໃນ​ອະນາຄົດ ຊາວ​ໜຸ່ມ​ເວລາ​ໃດ​ກໍ່​ພ້ອມ​ແລ້ວ​ທີ່​ຈະ​ອຸທິດ​ຕົນ ​ຕໍ່​ພາລະກິດ​ປະຕິວັດ​ຢ່າງ​ສົມ​ກຽດ ແລະ ຕັ້ງໜ້າ​ເຝິກຝົນ​ຫຼໍ່​ຫຼອມ​ຕົນ​ເອງ​ໃນ​ຂະ​ບວນ​ການ​ຕົວ​ຈິງ​ຂອງ​ມະຫາຊົນ ສົມ​ກັບ​ຄຳ​ຂະໜານ​ນາມ​ຂອງ​ປະທານ ໄກສອນ ພົມວິຫານ ຜູ້ນຳ​ທີ່​ແສນ​ເຄົາລົບ​ຮັກ​ຂອງ​ປວງ​ຊົນ​ລາວ​ບັນດາເຜົ່າ ທີ່​ວ່າ: ຊາວ​ໜຸ່ມ​ຈົ່ງ​ເປັນ​ນົກ​ອິນ​ຊີ​ທີ່​ບໍ່​ຫວັ່ນ​ກົວ​ຕໍ່​ພະຍຸ​ລົມແດງ ຈົ່ງ​ກາຍເປັນ​ສິນ​ໄຊ​ແຫ່ງ​ຍຸກ​ສະໄໝ​ຂອງ​ພວກ​ເຮົາ ແລະ ຈະ​ຕັ້ງໜ້າ​ປະຕິບັດ​ຄຳ​ຂວັນ​ອຳ​ມະຕະ​ທີ່​ວ່າ: ບ່ອນ​ໃດ​ຍາກ​ຊາວ​ໜຸ່ມ​ບຸກ ບ່ອນ​ໃດ​ທຸກ​ຊາວ​ໜຸ່ມ​ຜ່ານ​ຜ່າ ເມື່ອ​ໃດ​ຊາດ​ຮຽກຮ້ອງ​ຕ້ອງການ​ຊາວ​ໜຸ່ມ​ຂານ​ອາສາ ເພື່ອ​ພາລະກິດ​ຂອງ​ຊາດ ເຍົາວະ​ຊົນ​ກຽມພ້ອມ.

ຂ່າວທີ່ກ່ຽວຂ້ອງ