ການຂີ່ລົດຖີບ ມີຄຸນປະໂຫຍດ ຫຼາຍກວ່າທີ່ທ່ານຄິດ

373 01 ມິ.ນ. 2018 ຫົວຂໍ້ຂ່າວອື່ນໆ
ການຂີ່ລົດຖີບ ມີຄຸນປະໂຫຍດ ຫຼາຍກວ່າທີ່ທ່ານຄິດ

    ການ​ຂີ່​ລົດຖີບ ໃນ​ປັດຈຸບັນ ໄດ້​ຮັບ​ຄວາມ​ນິຍົມ​ຢ່າງ​ກວ້າງຂວາງ ເພາະ​ເປັນ​ການ​ອອກກຳລັງ​ກາຍ​ທີ່​ງ່າຍ ແລະ ສາມາດ​ເຮັດ​ໄດ້ ທັງ​ຜູ້​ໃຫຍ່ ແລະ ເດັກນ້ອຍ ນອກ​ນັ້ນ ຍັງ​ເຮັດ​ໃຫ້​ສຸຂະພາບ​ດີ ແລະ ແຂງແຮງ ສະນັ້ນ ໃນ​ຄໍ​ລຳ​ສິ່ງ​ຄວນ​ຮູ້​ໜັງ ສື​ພິມ​ວຽງ​ຈັນ​ໃໝ່​ສະບັບ​ນີ້ ຈຶ່ງ​ໄດ້​ຮວບ​ຮວມ​ຂໍ້​ດີ​ໃນ​ການ​ປັ່ນ​ລົດຖີບ 10 ຂໍ້ ເພື່ອ​ຢືນ​ຍັນ​ວ່າການ​ປັ່ນ​ລົດຖີບ​ນັ້ນ​ມີ​ຄຸນ​ປະໂຫຍດ​ແທ້ ດັ່ງນີ້:

   1. ຊ່ວຍ​ໃຫ້​ນອນ​ຫຼັບ​ດີ: ການ​ປັ່ນ​ລົດຖີບ​ຕອນ ເຊົ້າໆ ຊ່ວຍ​ໃຫ້​ເຮົາ​ນອນ​ຫຼັບ​ໄດ້​ດີ​ກວ່າ​ເກົ່າ ເນື່ອງ​ຈາກ​ວ່າການ​ຂີ່​ລົດຖີບ​ອອກກຳລັງ​ກາຍ​ໃນ​ຍາມ ເຊົ້າ​ຍັງ​ຊ່ວຍ​ໃຫ້​ຮ່າງກາຍ​ໄດ້​ຮັບ​ແສງ​ແດດ​ຕາມ​ເວລາ ຊ່ວຍ​ໃຫ້​ຮ່າງກາຍ​ຜ່ອນຄາຍ ແລະ ນອນ​ຫຼັບ​ງ່າຍ​ຂຶ້ນ​ໃນ​ຍາມ​ກາງຄືນ.

   2. ລົດ​ຄວາມ​ອ້ວນ: ການ​ຂີ່​ລົດຖີບ​ຊ່ວຍ​ເພີ່ມ​ອັດ ຕາ​ການ​ເຜົາ​ຜານ​ໄຂມັນ​ສ່ວນ​ເກີນ​ໃນ​ຮ່າງກາຍ ແຕ່​ມັນ​ບໍ່​ໄດ້​ເຜົາ​ຜານ​ສະເພາະ​ແຕ່​ຕອນ​ຖີບ​ເທົ່າ​ນັ້ນ ຜູ້​ຊ່ຽວຊານ​ບອກ​ວ່າ: ຮ່າງກາຍ​ຄົນ​ເຮົາ​ທີ່​ຂີ່​ລົດຖີບ ເປັນ​ປະຈຳ​ຈະ​ມີ​ພາວະ “After Burner”  ຫຼື ເຜົາ​ຜານ​ໄຂມັນ​ສ່ວນ​ເກີນ​ຕໍ່​ເນື່ອງ​ຫຼັງ​ຈາກ​ການ​ເຊົາ​ຖີບ ຕໍ່​ໄປ​ອີກ 2-3 ຊົ່ວໂມງ ໂດຍ​ລວມ​ແລ້ວ ການ​ເຜົາ​ຜານ​ຫຼັງ​ຈາກ​ເຊົາ​ຖີບ​ຈະ​ຫຼາຍ​ກວ່າ​ຕອນ​ກຳລັງ​ຖີບ ແລະ ການ​ຖີບ​ໄວ ສະຫຼັບ​ຊ້າ ຈະ​ເຮັດ​ໃຫ້​ໄດ້ຜົນ​ຫຼາຍ​ກວ່າ​ຄົນ​ທີ່​ຖີບ​ໃນ​ລະດັບ​ຄວາມ​ໄວ​ຄົງ​ທີ່.

   3. ຊ່ວຍ​ໃຫ້​ອາລົມ​ດີ​ຂຶ້ນ: ໃນ​ເວລາ​ທີ່​ເຮົາ​ປັ່ນ​ລົດຖີບ​ຈະ​ຮູ້ສຶກ​ໄດ້​ເຖິງ​ຄວາມ​ຮູ້ສຶກ​ຜ່ອນຄາຍ ບວກ​ກັບ​ລົມ​ເຢັນໆ​ປະ​ທະ​ໃບ​ໜ້າ​ເບົາໆ ຍັງ​ຊ່ວຍ​ໃຫ້​ຮູ້ສຶກ​ໂລ່ງ ໂດຍ​ສະເພາະ ຖ້າ​ເຮົາ​ປັ່ນ​ໃນ​ຍາມ​ເຊົ້າ.

   4.      ຮັກສາ​ສິ່ງແວດລ້ອມ: ລົດຖີບ​ເປັນ​ພາຫາ​ນະ​ທີ່​ຮັກສາ​ສິ່ງແວດລ້ອມ​ໄດ້​ດີ​ທີ່​ສຸດ ບໍ່​ມີ​ມົນ​ລະ​ພິດ ບໍ່​ຈຳເປັນ​ຕ້ອງ​ໃຊ້​ຊັບພະຍາກອນ​ນຳ​ເຂົ້າ ເຊັ່ນ: ນ້ຳມັນ​ເຊື້ອ​ໄຟ ບໍ່ເກີດ​ການ​ເຜົາ​ໄໝ້​ໃຫ້​ລົບ​ກວນ​ສິ່ງ ແວດ​ລ້ອມ ເວົ້າ​ໄດ້​ວ່າ​ເປັນ​ພາຫາ​ນະ​ທີ່​ຮັກ​ໂລກ ຮັກ​ສິ່ງແວດລ້ອມ​ທີ່​ສົມບູນ​ແບບ.

   5. ການ​ເຮັດ​ວຽກ​ໄດ້​ດີ​ຂຶ້ນ: ການ​ສຶກ​ສາ​ຈາກ​ມະຫາວິທະຍາໄລ Bristol ພົບ​ວ່າ ພະນັກງານ​ທີ່​ອອກກຳລັງ​ກາຍ​ຕອນ​ເຊົ້າ ຫຼື ຫຼັງ​ເຮັດ​ວຽກ ມັກ​ຈະ​ເຮັດ​ວຽກ​ໄດ້​ດີ​ມີ​ປະສິດ​ຕິ​ພາບ​ກວ່າ​ຄົນ​ປົກກະຕິ​ທີ່​ບໍ່ ອອກກຳລັງ​ກາຍ ການ​ອອກກຳລັງ​ກາຍ​ຈະ​ຊ່ວຍ​ເພີ່ມ​ຄວາມ​ໝັ້ນ​ໃຈ ຄວາມ​ມຸ້ງ​ໝັ້ນ​ໃນ​ການ​ເຮັດ​ວຽກ ແລະ ຊ່ວຍ​ໃຫ້​ຮັບ​ຄວາມ​ຄຽດ​ຈາກ​ການ​ເຮັດ​ວຽກ​ໄດ້​ດີ​ຂຶ້ນ ນອກຈາກ​ນີ້ ພະນັກງານ​ທີ່​ອອກກຳລັງ​ກາຍເປັນ​ປະຈຳ ມັກ​ຈະ​ໃຊ້​ເວລາ​ພັກ​ໜ້ອຍ​ກວ່າ​ຄົນ​ອື່ນ ແລະ ມີ​ອັດທະຍາໄສ​ດີ​ກວ່າ​ຄົນ​ອື່ນໆ​ອີກ​ດ້ວຍ.

   6. ຊ່ວຍ​ໃຫ້​ໜ້າ​ຕາ​ດູ​ອອ່ນ​ກວ່າ​ໄວ: ການ​ຂີ່​ລົດ ຖີບ​ຊ່ວຍ​ໃຫ້​ຮ່າງກາຍ​ລຳລຽງ​ອົກ​ຊີ​ແຊນ ແລະ ສານ​ອາຫານ​ໄດ້​ດີ​ຂຶ້ນ ຊ່ວຍ​ໃຫ້​ຂັບ​ຖ່າຍ​ສານພິດ ໃນ​ຮ່າງກາຍ​ມີ​ປະສິດ​ຕິ​ພາບ​ຫຼາຍ​ຂຶ້ນ ນອກຈາກ​ນີ້ ການ​ປັ່ນ​ລົດຖີບ​ເປັນ​ປະຈຳ ຈຶ່ງ​ເຮັດ​ໃຫ້​ໜ້າ​ຕາ​ສົດ ຊື່ນ ແລະ ຜິວ​ພັນ​ສົດໃສ

   7. ຂັບ​ຖາຍ​ສະດວກ: ການ​ຂີ່​ລົດຖີບ​ຈະ​ຊ່ວຍ​ກະ​ຕຸ້ນ​ໃຫ້​ອາຫານ​ໄຫຼ​ຜ່ານ​ລຳ​ໄສ້​ໃດ້​ໄວ​ກວ່າ ເຊິ່ງ​ຊ່ວຍ​ຫຼຸດ​ການ​ດູດ​ຊຶມ​ນ້ຳ​ໃນ​ລຳ​ໄສ້​ໃຫຍ່ ໝາຍ​ຄວາມ​ວ່າ ກ້ອນ​ອຸດ​ຈະ​ຣະ​ຈະ​ບໍ່​ແຫ້ງ ເຮັດ​ໃຫ້​ຂັບ​ຖ່າຍ​ໄດ້​ສະດວກ ນອກ​ນີ້ ຍັງ​ຊ່ວຍ​ກະ​ຕຸ້ນ​ການ​ຫາຍໃຈ ແລະ ອັດຕາ​ການ​ເຕັ້ນ ຊ່ວຍ​ໃນ​ການບີບ​ຫັດ​ຕົວ​ຂອງ​ລຳ​ໄສ້ ແລະ ບໍ່​ຮູ້ສຶກ​ອຶດ​ອັດ​ຫຼັງ​ການ​ກິນ​ອາຫານ ທັງ​ປ້ອງ​ກັນ​ໂຣກ​ມະ​ເຮັງ​ລຳ​ໄສ້​ອີກ​ດ້ວຍ.

   8. ເພີ່ມ​ປະສິດ​ຕິ​ພາບ​ຂອງ​ສະໝອງ: ຜົນ​ຈາກ​ການ​ວິໄຈ​ພົບ​ວ່າ ຄົນ​ທີ່​ປັ່ນ​ລົດຖີບ​ເປັນ​ປະຈຳ​ມີ​ຄະແນນ​ໃນ​ການ​ທົດ​ສອບ​ສະໝອງ​ໄດ້​ດີ​ກວ່າ​ຄົນ​ປົກກະຕິ 15% ເພາະ​ການ​ປັ່ນ​ລົດຖີບ​ຈະ​ຊ່ວຍ​ກະ​ຕຸ້ນ​ໃຫ້​ສ້າງ​ແຊລ​ສະໝອງ​ໃນ​ສ່ວນ Hippocampus ເຊິ່ງ​ເປັນ​ສ່ວນ​ບັນທຶກ​ຄວາມ​ຈຳ ແລະ ຫຼຸດຜ່ອນ ຄວາມ​ສ່ຽງ​ເປັນ​ພະຍາດ​ອາມ​ໄຊ​ເມີ​ໄດ້​ອີກ​ດ້ວຍ.

   9. ສຸຂະພາບ​ແຂງແຮງ: ເປັນ​ທີ່​ຮູ້​ກັນ​ວ່າການ​ອອກກຳລັງ​ກາຍ​ຊ່ວຍ​ໃຫ້​ລະບົບ​ພູມ​ຕ້ານທານ ຂອງ​ເຮົາ​ແຂງແຮງ​ຂຶ້ນ ເຊື້ອ​ໂຣກ​ຕ່າງໆ​ກໍ່​ບໍ່​ສາມາດ​ແຊກ​ແຊງ​ໄດ້​ງ່າຍ ຄົນ​ທີ່​ປັ່ນ​ລົດຖີບ​ຢ່າງ​ໜ້ອຍ 30 ນາທີ ເປັນ​ເວລາ 5 ມື້​ຕໍ່​ອາທິດ ມີ​ໂອກາດ​ໃນ​ການ​ເຈັບ​ປ່ວຍ​ໜ້ອຍ​ກວ່າ​ຄົນ​ທີ່​ບໍ່​ອອກກຳລັງ​ກາຍ​ເລີຍ.

   10. ອາຍຸ​ຍືນ​ຍາວ: ການ​ປັ່ນ​ລົດຖີບ​ຈະ​ຊ່ວຍ​ໃຫ້​ອາຍຸ​ຍືນ​ຂຶ້ນ ເພາະ​ມັນ​ຈະ​ໄປ​ພັດທະນາ​ລະບົບ​ເລືອດ ແລະ ຫົວໃຈ ຊ່ວຍ​ຫຼຸດ​ໂຣກ​ຄວາມດັນ ໂຣກ​ອ້ວນ ມະ​ເຮັງ​ປະເພດ​ຕ່າງໆ ໂດຍ​ລວມ ຮ່າງກາຍ​ຈະ​ມີ ປະສິດ​ຕິ​ພາບ​ໃນ​ການ​ຟື້ນ​ຟູ​ຮັກສາ​ຕົວ​ເອງ​ໄດ້​ຫຼາຍ ຂຶ້ນ ຊ່ວຍ​ຫຼຸດ​ຄວາມ​ສ່ຽງ​ການ​ເປັນ​ໂຣກ​ຫົວໃຈ​ໄດ້ ກວ່າ 50%.

 

ຂ່າວທີ່ກ່ຽວຂ້ອງ