ຂ່າວຫຼ້າສຸດ

ເທສະການບຸນລາວ ທີ່ຍີ່ປຸ່ນ ຈັດຂຶ້ນຢ່າງຄຶກຄື້ນ

413 28 ພ.ພ. 2018 ຂ່າວໜ້າ​ໜຶ່ງ

ເທ​ສະການ​ບຸນ​ລາວ 2018 ທີ່​ນະຄອນຫຼວງ​ໂຕ​ກຽວ ປະເທດ​ຍີ່ປຸ່ນ ເພື່ອ​ເຜີຍແຜ່​ວັດທະນະທຳ​ລາວ ກໍ່​ຄືໂຄສະນາ​ປີ​ທ່ອງ​ທ່ຽວ​ລາວ 2018 ໄດ້​ຈັດ​ຂຶ້ນ​ຢ່າງ​ຄຶກຄື້ນ ເຊິ່ງ​ພິທີ​ເປີດ​ຢ່າງ​ເປັນ​ທາງ​ການ​ ໄດ້​ຈັດ​ຂຶ້ນ​ໃນ​ວັນ​ທີ 26 ພຶດສະພາ 2018 ໂດຍ​ການ​ເປັນ​ປະທານ ແລະ ກ່າວ​ເປີດ​ງານ​ຂອງ​ທ່ານ ບໍ່​ແສງ​ຄຳ ວົງ​ດາລາ ລັດຖະມົນຕີກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ມີ​ທ່ານ ອິ​ວາ​ໂອ ໂຮ​ຣິ​ອິ ຮອງ​ລັດຖະມົນຕີກະຊວງ​ການ​ຕ່າງປະເທດ​ຍີ່ປຸ່ນ ທ່ານ ວີ​ໂຣດ ສຸນ​ດາ​ຣາ ເອກ​ອັກ​ຄະ​ລັດ​ຖະ​ທູດ ແຫ່ງ ​ສປປ ລາວ ປະຈຳຍີ່ປຸ່ນ ແລະ ຊາວ​ຍີ່ປຸ່ນ ໃຫ້​ຄວາມ​ສົນໃຈ​ເຂົ້າ​ຮ່ວມ​ຢ່າງ​ຫຼວງຫຼາຍ.

ໃນ​ໂອກາດ​ກ່າວ​ປາ​ໄສ ທ່ານ ບໍ່​ແສງ​ຄຳ ວົງ​ດາລາ ລັດຖະມົນຕີກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ໄດ້​ຕີ​ລາຄາ​ສູງ​ການ​ຈັດ​ເທ​ສະການ​ບຸນ​ລາວ ເຊິ່ງ​ເປັນ​ເທ​ສະການ​ປະຈຳ​ປີ​ທາງ​ດ້ານ​ວັດທະນະທຳ ທີ່​ຊາວ​ຍີ່ປຸ່ນ​ຮັບ​ຮູ້​ຢ່າງ​ກວ້າງຂວາງ ໂດຍ​ໄດ້​ລິ​ເລີ່ມ​ມາ​ເປັນ​ເວລາ​ເກືອບ 10 ປີ (ນັບ​ແຕ່​ປີ 2007) ເປັນ​ການ​ປະກອບ​ສ່ວນ​ສຳຄັນ ​ເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ​ມິດຕະພາບລະຫວ່າງ ລາວ-ຍີ່ປຸ່ນ ໃຫ້​ນັບ​ມື້​ມີ​ຄວາມສະໜິດ​ແໜ້ນ​ຍິ່ງ​ຂຶ້ນ ສ້າງ​ຄວາມ​ເຂົ້າໃຈ​ເຊິ່ງ​ກັນ ແລະ ກັນລະຫວ່າງ​ປະຊາຊົນ​ຂອງ​ສອງ​ຊາດ ໂດຍ​ຜ່ານ​ການສະແດງ​ສິລະ​ປະ ວັດທະນະທຳ​ຫຼາກ​ຫຼາຍ​ຮູບ​ແບບ​ທີ່​ໜ້າ​ຊື່ນ​ຊົມ.

ໂອກາດ​ດັ່ງກ່າວ ທ່ານ ບໍ່​ແສງ​ຄຳ ວົງ​ດາລາ ຍັງ​ໄດ້​ກ່າວ​ສະແດງ​ຄວາມ​ຂອບໃຈ​ເປັນ​ຢ່າງ​ສູງ​ຕໍ່​ລັດຖະບານ ແລະ ປະຊາຊົນ​ຍີ່ປຸ່ນ ທີ່​ໄດ້​ໃຫ້ການ​ຊ່ວຍເຫຼືອ ແລະ ສະໜັບສະໜູນ ສປປ ລາວ ຕະຫຼອດ​ມາ ກໍ່​ຄືທຸກ​ພາກສ່ວນ​ທີ່​ໄດ້​ໃຫ້​ຄວາມ​ຮ່ວມ​ມື​ຢ່າງ​ໃກ້ຊິດ ແລະ ມີ​ປະ​ສິດທິ​ຜົນ ເຮັດ​ໃຫ້ການ​ຈັດ​ເທ​ສະການ​ບຸນ​ລາວ​ ໄດ້ຜົນ​ດີ​ຕາມ​ລະດັບ​ຄາດໝາຍ​ທີ່​ວາງ​ໄວ້.

ບຸນ​ລາວ 2018 ທີ່​ຍີ່ປຸ່ນ ມີ​ຫຼາຍ​ກິດຈະກຳ​ທີ່​ໜ້າ​ສົນໃຈ ເປັນຕົ້ນແມ່ນ​ການສະແດງ​ສິລະ​ປະ​ຂອງ​ລາວ​ຫຼາກ​ຫຼາຍ​ສີສັນ ມີ​ກາ​ນວາງ​ສະແດງ​ການທ່ອງທ່ຽວ ຈັດ​ຊຸ້ມ​ອາຫານ-ເຄື່ອງ​ດື່ມ ແລະ ແຈກ​ຢາຍ​ເຄື່ອງ​ທີ່​ລະນຶກ​ຕ່າງໆ​ຂອງ​ລາວ​ ໃຫ້​ຜູ້​ເຂົ້າ​ຮ່ວມ​ບຸນ​ເຕັມ​ໄປ​ດ້ວຍ​ບັນຍາກາດ​ອັນ​ຄຶກຄື້ນ​ມ່ວນຊື່ນ​ທີ່​ສຸດ ນອກ​ນັ້ນຍັງ​ຈະ​ມີ​ການ​ຈັດ​ສຳ​ມະ​ນາ​ສົ່ງເສີມ​ການທ່ອງທ່ຽວ​ລາວ​ຕື່ມ​ອີກ.

ບຸນ​ລາວ 2018 ທີ່​ນະຄອນຫຼວງ​ໂຕ​ກຽວ ປະເທດ​ຍີ່ປຸ່ນ ຈະ​ດຳເນີນ​ໄປ​ຈົນ​ເຖິງ​ວັນ​ທີ 29 ພຶດສະພາ 2018 ເຊິ່ງ​ເປັນ​ກິດຈະກຳ​ສຳຄັນ ​ໃນ​ການ​ສົ່ງເສີມ​ວັດທະນະທຳ​ຂອງ​ລາວ ພິເສດແມ່ນ​ເປັນ​ການ​ໂຄສະນາ​ປີ​ທ່ອງ​ທ່ຽວ​ລາວ 2018 ຕໍ່​ຕ່າງປະເທດ​ ໃຫ້​ມີ​ບັນຍາກາດ​ຄຶກຄື້ນ ດຶງ​ດູດ​ເອົາ​ນັກ​ທ່ອງ​ທຽວ​ເຂົ້າ​ມາ​ທ່ອງ​ທ່ຽວ​ລາວ​ໃຫ້​ນັບ​ມື້​ຫຼາຍ​ຂຶ້ນ ປີ 2018 ເປັນ​ປີ​ທ່ອງ​ທ່ຽວ​ລາວ ລັດຖະບານ​ວາງ​ຄາດໝາຍ​ສູ້​ຊົນ​ດຶງ​ດູດ​ນັກ​ທ່ອງ​ທ່ຽວ​ຈາກ​ຕ່າງປະເທດ​ໃຫ້​ໄດ້ 5 ລ້ານ​ເທື່ອ​ຄົນ ສ້າງ​ລາຍ​ຮັບ​ໃຫ້​ໄດ້ 9 ລ້ານ​ໂດ​ລາ ສະເພາະ​ນັກ​ທ່ອງ​ທ່ຽວ​ຈາກ​ຍີ່ປຸ່ນ ເຂົ້າ​ມາ​ທ່ອງ​ທ່ຽວ​ລາວ​ໃນ​ປີ 2017 ຜ່ານ​ມາ​ມີ​ຈຳນວນ 32.000 ກວ່າ​ເທື່ອ​ຄົນ.

ຂ່າວທີ່ກ່ຽວຂ້ອງ