ຂ່າວຫຼ້າສຸດ

ແມນຢູ ເສີມໜັກ ກຽມຄວ້າ “ເຟຣດ-ອັນເດີໄວເຣວ” ກ່ອນເປິດບານໂລກ

195 28 ພ.ພ. 2018 ວົງຈອນກີລາ
ແມນຢູ ເສີມໜັກ ກຽມຄວ້າ “ເຟຣດ-ອັນເດີໄວເຣວ” ກ່ອນເປິດບານໂລກ

          ແມນເຊສເຕີ ຢູໄນເຕັດ ຮອງແຊັມ ພຣີເມຍ ລີກ ອັງກິດ ເລັ່ງດຳເນີນການເຈລະຈາຄວ້າ ເຟຣດ ກອງກາງຊາວບຣາຊິນ ຈາກ ຊັກຕາ ໂດເນັດ ມູນຄ່າລວມ 52,5 ລ້ານປອນ ຕາມລາຍງານຈາກ “ເດລີ ເມວ” ໜັງສືພິມຊື່ດັງຂອງອັງກິດ.

          ຄວາມເຄື່ອນໄຫວດັ່ງກ່າວ ເກີດຂຶ້ນຫຼັງມີການຢືນຢັນວ່າ ແມນຯ ຢູໄນເຕັດ ກຳລັງຕິດຕໍ່ ໂທບີ ອັນເດີໄວເຣວ ກອງຫຼັງສາລະພັດປະໂຫຍດ ຈາກ ທັອດແນມ ຮັອດສະເປີ ມາເປັນສະມາຊິກໃໝ່ຄົນທໍາອິດຂອງຖິ່ນ ໂອລ ແທຣບຟອດ.

          ໂຈເຊ ມູຣິນໂຢ່ ຜູ້ຈັດການຊາວປອກຕຸຍການ ຕ້ອງການຈະປິດການຊື້-ຂາຍ ເຟຣດ ກັບ ອັນເດີໄວເຣວ ກ່ອນທັງຄູ່ແຍກຍ້າຍກັນເຂົ້າແຄັມທີມຊາດບຣາຊິນ ແລະ ແບນຊິກ ຕາມລຳດັບ ເພື່ອລຸຍເສິກເຕະບານໂລກ 2018 ທີ່ປະເທດຣັດເຊຍ ວັນທີ 14 ມິຖຸນາ - 15 ກໍລະກົດ.

          ກອງກາງຊາວບຣາຊິນ ສະແດງຈຸດຢືນຈະແຈ້ງວ່າຢາກມາພິສູດຝີຕີນເທິງສັງວຽນ ລີກສູງສຸດຂອງອັງກິດ ຄາດວ່າ ຄ່າຕົວໜ້າຈະຢູ່ທີ່ 43 ລ້ານປອນ ແຖມເງື່ອນໄຂພິເສດ ແລະ ຍັງໄດ້ຮັບການຍົກຍ້ອງຈາກ ມູຣິນໂຢ່ວ່າ ເປັນກອງກາງຕົວຮັບ ຊຶ່ງ ແມນຯ ຢູໄນເຕັດ ໄຝ່ຫາມານານ.

          ນັກເຕະໄວ 25 ປີ ເກືອບຈະມາຮ່ວມທີມ ແມນເຊສເຕີ ຊິຕີ ຄູ່ແຂ່ງຮ່ວມເມືອງ ຕັ້ງແຕ່ເດືອນມັງກອນ 2018 ກ່ອນ ແມນຯ ຢູໄນເຕັດ ຈະເຂົ້າມາຕັດໜ້າ ແຖມ ແມນຯ ຊີຕີ ຍັງຢ້ານວ່າລາຄາຈະແພງເກິນເຫດ ຊ້ຳຮອຍ ອະເລັກຊິສ ຊານເຊຊ ກອງໜ້າຊາວຊິລີ ຈຶງເບນເປົ້າໝາຍມາຍັງ ຈໍຈິນໂຢ່ ຂອງ ນາໂປລີ.

          ຂະນະທີ່ ອັນເດີໄວເຣວ ໄວ 29 ປີ ເປັນນັກເຕະກອງຫຼັງທີ່ສາມາດຂັບເຄື່ອນເກມບຸກແດນຫຼັງ ແລະ ກຳລັງຈະໝົດສັນຍາ ປີ 2019 ຢ່າງໃດກໍຕາມ ສະເປີ ອາດຕັ້ງຄ່າຕົວປະມານ 75 ລ້ານປອນ ຫາກປະສົບຄວາມສຳເລັດ ເທົ່າກັບວ່າ ຊະຕາຂອງ ຄຣິສ ສະມໍລິງ, ຟິວ ໂຈນ, ເອຣິກ ໄບຢີ ແລະ ວິກເຕີ ລິນເດລອຟ ຕ່າງແຂວນຢູ່ເທິງເສັ້ນດ້າຍ.

          ນອກຈາກນີ້ ມູຣິນໂຢ່ ຍັງຕ້ອງການຕັນຊ່ອງໂຫວ່ຕຳແໜ່ງກອງຫຼັງ ໂດຍສະເພາະຝັ່ງຂວາ ຊຶ່ງກໍມີທັງ ຊິເມ ເວີຊັນໂກ ຂອງ ແອດເລຕິໂກ ມາດຣິດ, ຊິບຣິວ ຊິດິເບ ຂອງ ໂມນາໂກ ແລະ ເຈົາ ຄານເຊໂລ ທີ່ຍ້າຍຈາກ ບາເລນເຊຍ ມາຢູ່ ອິນເຕີ ມິລານ ແບບຢືມຕົວ ຢູ່ໃນບັນຊີລາຍຊື່.

ຂ່າວທີ່ກ່ຽວຂ້ອງ