ຂ່າວຫຼ້າສຸດ

ຫວນຄືນມູນເຊື້ອວັນປະຫວັດສາດ

430 25 ພ.ພ. 2018 ຂ່າວໜ້າ​ໜຶ່ງ

ເພື່ອ​ລະນຶກ​ເຖິງ​ຄຸນງາມຄວາມດີ ຄວາມ​ສະຫຼຽວ​ສະຫຼາດ​ຂອງ​ບັນດາ​ຜູ້ນຳ​ ໃນ​ການ​ຜ່າ​ວົງ​ປິດ​ລ້ອມ​ກອງພັນ​ທີ​ສອງ ແລະ ໂຕນ​ຄຸກ​ຢ່າງ​ມະຫັດສະຈັນ ໃນ​ວັນ​ທີ 24 ພຶດສະພາ 2018 ໂຮງຮຽນ​ການເມືອງ​ການ​ປົກຄອງ ນະຄອນຫຼວງ​ວຽງ​ຈັນ ຈັດ​ພິທີ​ປາຖະກະຖາ​ໃນ​ໂອກາດ​ລະນຶກ​ວັນ​ຜ່າ​ວົງ​ປິດ​ລ້ອມ​ຂອງ​ກອງພັນ​ທີ​ສອງ ວິລະ​ຊົນ​ທີ່​ທົ່ງ​ໄຫ​ຫີນ​ຊຽງ​ຂວາງ ຄົບຮອບ 59 ປີ (18.5.1959-18.5.2018) ແລະ ວີລະ​ກຳ​ໂຕນ​ຄຸກ​ຢ່າງ​ມະຫັດສະຈັນ​ຂອງ​ຜູ້ນຳ​ພັກ ແລະ ແນວ​ລາວ​ຮັກ​ຊາດ ຄົບຮອບ 58 ປີ (24.5.1960-24.5.2018) ແລະ ຈັດ​ເຜີຍແຜ່​ເອກະສານ​ສະພາບ​ການ​ຊາຍ​ແດນ​ລາວ-ກຳປູເຈຍ ທີ່​ສະໂມສອນ​ຂອງ​ຕົນ ເປັນ​ກຽດ​ປາຖະກະຖາ​ໂດຍທ່ານ ອຸດອນ ໄຊ​ມຸນຕີ ຫົວໜ້າ​ໂຮງຮຽນ​ການເມືອງ-ການ​ປົກຄອງ ນະຄອນຫຼວງ​ວຽງ​ຈັນ ມີ​ຫົວໜ້າ ຄະນະ​ພັກ ຄະນະ​ນຳ ຄູ-ອາຈານ ນັກ​ສຶກ​ສາ ພະນັກງານ​ຫຼັກ​ແຫຼ່ງ ໂຮງຮຽນ​ ເຂົ້າ​ຮ່ວມ.

ທ່ານ ອຸດອນ ໄຊ​ມຸນຕີ ໄດ້​ຍົກ​ໃຫ້​ເຫັນ​ປະຫວັດ​ຄວາມ​ເປັນ​ມາ ສະພາບ​ການ​ປິດ​ລ້ອມ​ຂອງ​ກອງພັນ​ທີ 2 ເຊິ່ງ​ບັນດາ​ຜູ້ນຳ​ໄດ້​ຊອກ​ວິທີ​ທາງ​ເພື່ອ​ຜ່າ​ວົງ​ປິດ​ລ້ອມ​ໄປ​ໄດ້​ຢ່າງ​ປອດ​ໄພ ຕໍ່​ກັບ​ສະພາບ​ການ​ຜັນ​ແປ​ຢ່າງ​ຂ້ຽວຂາດ​ ແຕ່​ບັນດາ​ຜູ້ນຳ​ກໍ່​ບໍ່​ລົດ​ລະ​ຄວາມ​ພະຍາຍາມ ​ໃນ​ການ​ປຸກລະດົມ​ຂົນຂວາຍ​ກຳລັງ​ທະຫານ ​ເພື່ອ​ຕິດຕາມ​ສະພາບ​ການ​ຕ່າງໆ​ ດ້ວຍ​ຄວາມ​ອົດທົນ​ພະຍາຍາມ ຄວາມ​ສາມັກຄີ​ປອງ​ດອງ ຄວາມ​ສະຫຼຽວ​ສະຫຼາດ​ຂອງ​ບັນດາ​ຜູ້ນຳ ກຳລັງ​ປະກອບ​ອາວຸດ​ຈົນ​ສາມາດ​ຜ່າ​ວົງ​ປິດ​ລ້ອມ​ໄດ້​ຢ່າງ​ປອດ​ໄພ.

ນອກຈາກ​ນີ້ ກໍ່​ໄດ້​ຍົກ​ໃຫ້​ເຫັນ​ຄວາມ​ອົດທົນ​ພະຍາຍາມ ​ໃນ​ການ​ເຕົ້າໂຮມ​ກຳລັງ​ທະຫານ ​ເພື່ອ​ຄັດ​ເລືອກ​ເອົາ​ພະນັກງານ​ຂັ້ນ​ສູງ​ສຸດ​ຂອງ​ແນວ​ລາວ​ຮັກ​ຊາດ ຜ່ານ​ການເຄື່ອນໄຫວ​ໄດ້​ຄວາມ​ຫຍຸ້ງຍາກ ລະ​ອິດ​ລະ​ອ້ຽວ ​ໃນ​ການ​ຫຼອກ​ລວງ ຕີ​ຕ້ານ​ພວກ​ສັດຕູ ລູກແຫຼ້ງ​ຕີນ​ມື​ຂອງ​ພວກ​ຈັກກະພັດ​ຕ່າງ​ດ້າວ​ດ້ວຍ​ຫຼາຍ​ຮູບ​ການ ຈົນ​ສາມາດ​ໂຕນ​ຄຸກ​ແລ້ວ​ກັບ​ຄືນ​ເຂດ​ທີ່​ໝັ້ນ​ໄດ້.

ສ່ວນ​ສະພາບ​ການ​ຊາຍ​ແດນ​ລາວ-ກຳປູເຈຍ ປັດຈຸບັນ ສຳເລັດ​ການ​ສຳ​ຫຼວດ ແລະ ປັກ​ຫຼັກ​ໝາຍ​ຊາຍ​ແດນ​ຮ່ວມ​ກັນ​ແລ້ວ 87% ຍັງ​ເຫຼືອ 13% ທີ່​ຍັງ​ບໍ່​ທັນ​ໄດ້​ສຳ​ຫຼວດ ແລະ ປັກ​ຫຼັກ​ໝາຍ ເຊິ່ງ​ບໍລິເວນ​ດັ່ງກ່າວ ນັບ​ແຕ່​ຫຼັກໝາຍ​ຊາຍ​ແດນ​ທີ 087 ລຽບ​ແມ່ນ້ຳ​ເຊ​ກອງ​ຂຶ້ນ​ໄປ​ຫາ​ແກ້ງ​ຕໍ​ມໍ​ຄອຍ-ຫ້ວຍ​ຕະ​ເງົາ ຍາວ 24 ກິໂລແມັດ ແລະ ຈາກ​ແກ້ງ​ຕໍ​ມໍ​ຄອຍ-ແກ້ງ​ກະ​ໂຕມ ຍາວ 16 ກິໂລແມັດ ເນື້ອທີ່​ປະມານ 550 ກິ​ໂລ​ຕາ​ແມັດ ທີ່​ສອງ​ປະເທດ​ໄດ້​ເປັນ​ເອກະ​ພາບ​ກັນ​ວ່າ ​ບໍລິເວນ​ນີ້​ເປັນ​ຈຸດ​ຄົງ​ຄ້າງ​ມິດຕະພາບ ແລະ ຫ້າມ​ບໍ່​ໃຫ້​ມີ​ການ​ດຳເນີນ​ກິດຈະການ​ໃດໆ ໃຫ້​ຮັກສາ​ສະພາບ​ເດີມ​ຢູ່​ບໍລິເວນ​ນີ້​ຈົນ​ກວ່າ​ມີ​ການ​ສຳ​ຫຼວດ ແລະ ປັກ​ຫຼັກ​ໝາຍ​ຊາຍ​ແດນ​ສຳເລັດ.

ຂ່າວທີ່ກ່ຽວຂ້ອງ