ຄອນເຕ ຍອມພັກຍາວ ກະເອົາເງິນຊົດເຊີຍ ຖ້າເຊວຊີໄລ່

192 25 ພ.ພ. 2018 ວົງຈອນກີລາ
ຄອນເຕ ຍອມພັກຍາວ ກະເອົາເງິນຊົດເຊີຍ ຖ້າເຊວຊີໄລ່

          ກາຍເປັນສະຖານະການຍືດເຍື້ອຫຼືແນວໃດບໍ່ຊາບໄດ້ ເມື່ອ ເຊວຊີ ຢາກໄລ່ອອກໃຈຈະຂາດ ແຕ່ເສຍດາຍເງິນກ້ອນໃຫຍ່ ເປີດເຜີຍວ່າ ຜູ້ຈັດການ ອັນໂຕນິໂອ ຄອນເຕ ຫຼິ້ນບົດນັ່ງລໍຖ້າຊະຕາກໍາສຸດສະບາຍ ເຖິງຈະຖືກໄລ່ອອກກໍບໍ່ສົນໃຈ ພ້ອມພັກຍາວ 1 ປີ ຮັບເງິນຊົດເຊີຍ 9 ລ້ານປອນເຕັມໆໄປເລີຍ.

          ອັນໂຕນິໂອ ຄອນເຕ ຜູ້ຈັດການທີມ ເຊວຊີ ອາດພິຈາລະນາພັກວຽກເລື່ອງເຕະບານຍາວໄປເລີຍ ກ່ອນຮັບວຽກງານໃໝ່ຕໍ່ໄປ ຫາກຖືກໄລ່ອອກຈາກຕຳແໜ່ງໃນບັ້ນປາຍ ທ່າມກາງກະແສຂ່າວອາດຖືກປົດອອກໃນອີກບໍ່ເທົ່າໃດອຶດໃຈຂ້າງໜ້ານີ້ເຕັມທີແລ້ວ ຕາມລາຍງານຂ່າວຈາກ ເດລີ່ ເທເລກຣາຟ ສື່ດັງຂອງອັງກິດ ເມື່ອວັນພຸດທີ 23 ພຶດສະພາທີ່ຜ່ານມາ.

           ໂຄ໊ຊຊາວອິຕາລີທີ່ຫາກໍດົນບັນດານແຊັມ ເອຟເອ ຄັບ ໃຫ້ກັບເຊວຊີມາໝາດໆ ສະແດງທ່າທີຈະແຈ້ງວ່າຈະບໍ່ລາອອກຈາກຕໍາແໜ່ງຜູ້ຈັດການໃຫຍ່ໃນຖິ່ນ ສະແຕມຟອດ ບຣິດ ຢ່າງແນ່ນອນ ສົ່ງຜົນເຮັດໃຫ້ຫາກສະໂມສອນຕ້ອງການຈະໄລ່ອອກໄປ ກໍຕ້ອງຍອມຈ່າຍຄ່າຊົດເຊີຍປະມານ 9 ລ້ານປອນດ້ວຍກັນ ໃນຖານະທີ່ຍັງເຫຼືອສັນຍາຜູກມັດກັນຢູ່ອີກ 1 ປີ.

          ເຊວຊີ ຫວັງຈະຫຼີກລ່ຽງການຈ່າຍເງິນກ້ອນໃຫຍ່ດັ່ງກ່າວ ໂດຍພະຍາຍາມຈະມອບຕຳແໜ່ງອື່ນໃຫ້ ຄອນເຕ ໃນໄລຍະພັກຮ້ອນນີ້ ແຕ່ຂໍ້ສະເໜີດັ່ງກ່າວບໍ່ໄດ້ຮັບການຕອບສະໜອງຈາກຜູ້ກ່ຽວ ແລະ ຫາກ ຄອນເຕ ວ່າງງານໄປຈົນເຖິງໄລຍະພັກຮ້ອນປີ 2019 ທີມເຊວຊີ ກໍຈະຕ້ອງຈ່າຍຄ່າຈ້າງທີ່ເຫຼືອອີກ 12 ເດືອນຕາມສັນຍາໄປໂດຍປະລິຍາຍ.

ຂ່າວທີ່ກ່ຽວຂ້ອງ