ຂ່າວສັ້ນ

116 24 ພ.ພ. 2018 ຂ່າວຕ່າງປະເທດ

    ອິນ​ເດຍ - ການ​ປະ​ທ້ວງ: ແຫຼ່ງ​ຂ່າວ Sputnik ລາຍ​ງານ​ວ່າ ມີ​ຜູ້​ເສຍ​ຊີວິດ 10 ຄົນ ແລະ ​ບາດເຈັບ​ອີກ​ຫຼາຍ​ຮ້ອຍ​ຄົນ ຈາກ​ການ​ປະ​ທະ​ກັນ​ຄັ້ງ​ໃຫຍ່ ລະຫວ່າງ​ຜູ້​ປະ​ທ້ວງ​ຫຼາຍ​ພັນ​ຄົນ ກັບ​ຕຳຫຼວດ ເມື່ອ​ການ​ປະ​ທ້ວງ​ທວງ​ໃຫ້​ປິດ​ໂຮງງານ​ຜະລິດ​ແຮ່​ທອງ Sterlite ຢູ່​ໃນ​ນະຄອນ​ທ່າ ຕຸດ​ຕີ​ກໍ​ຣິນ ໃນ​ລັດ ທະມິນ ນາ​ດູ (ພາກ​ໃຕ້​ອິນ​ເດຍ) ກ້າວ​ເຂົ້າ​ສູ່​ວັນ​ທີ 100 ໃນ​ວັນ​ທີ 22 ພຶດສະພາ​ນີ້.

    ຂ່າວ​ແຈ້ງວ່າ ໃນ​ຫຼາຍ​ປີ​ທີ່​ຜ່ານ​ມາ ຜູ້​ປະ​ທ້ວງ​ໄດ້​ສະເໜີ​ໃຫ້​ປິດ​ໂຮງງານ​ດັ່ງກ່າວ ຍ້ອນ​ວ່າ ປະລິມານ​ການ​ປ່ອຍ​ແກ​​ັສ​ອັນ​ມະຫາສານ ເຮັດ​ໃຫ້​ເກີດ​ມົນ​ລະ​ພິດ​ຕໍ່​ທີ່​ດິນ ແລະ​ແຫຼ່ງ​ນ້ຳ​ຢູ່​ໃນ​ທ້ອງຖິ່ນ.

    ອາ​ຣາ​ບີ ຊາ​ອຸ​ດິດ: ແຫຼ່ງ​ຂ່າວ​ຈາກ​ກົມ​ສືບສວນ​ດ້ານ​ການບິນ​ຂອງ​ອາ​ຣາ​ບີ ຊາ​ອຸ​ດິດ (AIB) ໃຫ້​ຮູ້​ວ່າ ເຮືອບິນ Airbus A330 ລຳ​ໜຶ່ງ ຊຶ່ງ​ບັນທຸກ​ຜູ້ໂດຍສານ 151 ຄົນ ຕ້ອງ​ໄດ້​ບິນ​ລົງ​ຈອດ​ສຸກ​ເສີນ ຢູ່​ທີ່​ນະຄອນ ເຈດ​ດາ (ພາກ​ຕາເວັນຕົກ ອາ​ຣາ​ບີ ຊາ​ອຸ​ດິດ) ເມື່ອ​ວັນ​ທີ 21 ພຶດສະພາ​ນີ້ ໃນ​ຂະນະ​ທີ່​ພວມ​ຢູ່​ລະຫວ່າງ​ເສັ້ນທາງ​ບິນ​ຈາກ​ນະຄອນ ເມ​ດີ​ນາ ໄປ​ຍັງ ດາ​ກາ ເຮັດ​ໃຫ້​ມີ​ຜູ້​ໄດ້​ຮັບ​ບາດເຈັບ​ຢ່າງ​ໜ້ອຍ 53 ຄົນ ສາເຫດ​ທີ່​ພາໃຫ້​ເຮືອບິນ​ນັ້ນ​ບິນ​ລົງ​ຈອດ​ສຸກ​ເສີນ ກໍ​ແມ່ນ​ເປັນ​ຍ້ອນ​ເກີດ​ຄວາມ​ຂັດຂ້ອງ​ຢູ່​ໃນ​ລະບົບ​ກຳລັງ​ນ້ຳ.

 

ຂ່າວທີ່ກ່ຽວຂ້ອງ