ຂ່າວຫຼ້າສຸດ

ແດດ​ຮ້ອນ​ກວ່າ 40 ອົງສາ C ຢູ່​ໃນ​ປາ​ກິດ​ສະຖານ; ມີ​ຜູ້​ເສຍ​ຊີວິດ​ຈຳນວນ​ຫຼາຍ

503 24 ພ.ພ. 2018 ຂ່າວຕ່າງປະເທດ
ແດດ​ຮ້ອນ​ກວ່າ 40 ອົງສາ C ຢູ່​ໃນ​ປາ​ກິດ​ສະຖານ; ມີ​ຜູ້​ເສຍ​ຊີວິດ​ຈຳນວນ​ຫຼາຍ

    ແດດ​ຮ້ອນ​ແກ່ຍາວ ໂດຍ​ມີ​ອຸ່ນ​ຫະ​ພູມ​ສູງ​ກວ່າ 40 ອົງສາ C ຢ່າງ​ຕໍ່​ເນື່ອງ​ເປັນ​ເວລາ​ຫຼາຍ​ວັນ ເປັນ​ສາເຫດ​ເຮັດ​ໃຫ້​ມີ​ຜູ້​ເສຍ​ຊີວິດ​ຫຼາຍ​ສິບ​ຄົນ ຢູ່​ໃນ​ພື້ນ​ທີ່​ນະຄອນ ກາ​ຣາ​ຈີ ທີ່​ເປັນ​ນະຄອນ​ໃຫຍ່​ສຸດ ຂອງ​ປາ​ກິດ​ສະຖານ.

    ອົງການ Edhi Foundation ຊຶ່ງ​ເປັນ​ອົງການ​ສັງຄົມ​ທີ່​ບໍ່​ຫວັງ​ຜົນ​ຕອບ​ແທນ​ຢູ່​ໃນ ປາ​ກິດ​ສະຖານ ແຈ້ງ​ໃຫ້​ຮູ້ເມື່ອ​ວັນ​ທີ 22 ພຶດສະພາ​ນີ້​ວ່າ ຈຳນວນ​ຜູ້​ເສຍ​ຊີວິດ​ຢູ່​ໃນ​ພື້ນ​ທີ່ ນະຄອນ​ກາ​ຣາ​ຈີ ໃນ​ຮອບ 4 ວັນ​ທີ່​ຜ່ານ​ມາ ໄດ້​ເພີ່ມ​ຂຶ້ນ​ທົບ​ສອງ​ເທົ່າ​ຕົວ ເມື່ອ​ທຽບໃສ່​ຕົວ​ເລກ​ສະເລ່ຍ ໂດຍ​ຂຶ້ນ​ເປັນ 180 ຄົນ.

    ທ່ານ ຟາຍ​ຊາ​​ລ ເອ​ດີ ຫົວໜ້າ​ຂອງ​ອົງການ​ດັ່ງກ່າວ​ເວົ້າ​ວ່າ ເຖິງ​ວ່າ​ຍັງ​ບໍ່​ທັນ​ສາມາດ ໄດ້​ຮັບ​ການ​ຢັ້ງຢືນ​ກໍ​ຕາມ ແຕ່​ຄົນ​ໃນ​ຄອບ​​​ຄົວ​ຂອງ​ຜູ້​ເສຍ​ຊີວິດ​ເຫຼົ່ານັ້ນ​ເວົ້າ​ວ່າ ສາເຫດ​ໃຫຍ່​ສຸດ ທີ່​ເຮັດ​ໃຫ້​ເກີດ​ການ​ເສຍ​ຊີວິດ​ກໍ​ແມ່ນ​ເປັນ​ຍ້ອນ​ອາກາດ​ຮ້ອນ ໃນ​ຂະນະ​ດຽວ​ກັນ ເຈົ້າ​ໜ້າທີ່​ກ່ຽວຂ້ອງ ເວົ້າ​ວ່າ​ມາ​ຮອດ​ເວລາ​ນີ້​ມີ​ພຽງ 1 ກໍລະນີ​ເທົ່າ​ນັ້ນ ທີ່​ໄດ້​ຮັບ​ການ​ຢັ້ງຢືນ​ວ່າ​ເສຍ​ຊີວິດ​ຍ້ອນ​ເມົາ​ແດດ.

   ອົງການ​ອຸຕຸນິຍົມ​ຂອງ​ປາ​ກິດ​ສະຖານ ໃຫ້ການ​ພະຍາກອນ​ວ່າ ແດດ​ຮ້ອນ​ອົບເອົ້າ ຍັງ​ຈະ​ສືບຕໍ່ ເກີດ​ຂຶ້ນ​ຢູ່​ໃນ​ນະຄອນ​ກາ​ຣາ​ຈີ ໃນ​ອີກ 2-3 ວັນ​ຕໍ່ໜ້າ ໂດຍ​ທີ່​ມີ​ລະດັບ​ອຸ່ນ​ຫະ​ພູມ​ສູງ​ເຖິງ 44 ອົງສາ C.

    ກ່ອນ​ໜ້າ​ນີ້ ເມື່ອ​ເດືອນ​ມິຖຸນາ ປີ 2015 ໄດ້​ມີ​ຜູ້​ເສຍ​ຊີວິດ​ປະມານ 1.200 ຄົນ ໃນ​ໄລຍະ​ທີ່​ມີ​ແດດ​ຮ້ອນ​ອົບເອົ້າ ຢູ່​ໃນ​ເຂດ​ພາກ​ໃຕ້​ປາ​ກິດ​ສະຖານ ເກືອບ 2/3 ໃນ​ຈຳນວນ​ຜູ້ ເສຍ​ຊີວິດ​ນັ້ນ ເປັນ​ຜູ້​ທີ່​ບໍ່​ມີ​ບ່ອນຢູ່​ອາ​ໃສ.

 

ຂ່າວທີ່ກ່ຽວຂ້ອງ