ເບີ່ງບ້ານເຂົາເອົາບົດຮຽນ 24/05/2018

319 24 ພ.ພ. 2018 ຫົວຂໍ້ຂ່າວອື່ນໆ

ເນື້ອ​ໃນ​ສຳຄັນ​ຂອງ​ບົດ​ປະຈຳ​ວັນ​ນີ້​ ປະກອບ​ດ້ວຍຂ່າວ​ທາງ​ການ​ຝຣັ່ງ​ອອກ​ກົດໝາຍ​ຄວບ​ຄຸມ​ຜູ້​ອົບພະ​ຍົບ ແລະ ການ​ຕັດສິນ​ລົງໂທດ​ຜູ້​ສໍ້​ລາດ​ບັງ​ຫຼວງ ຢູ່​ອິນ​ໂດ​ເນ​ເຊຍ.

ທີ່​ປະເທດ​ຝຣັ່ງ: ບັນຫາ​ຜູ້​ອົບ​ພະ​ຍົບ​ຫຼັ່ງໄຫຼ​ເຂົ້າໄປ​ເອີ​ຣົບ​ນັ້ນ ໄດ້​ຍູ້​ໃຫ້​ຫຼາຍ​ປະເທດ​ອອກ​ກົດໝາຍຄວບ​ຄຸມ​ຜູ້​ອົບ​ພະ​ຍົບ ເຊັ່ນ: ໃນ​ເດືອນ​ເມສາ​ປີ​ນີ້ ສະພາ​ຕ່ຳ (ສະພາ​ຜູ້​ແທນ​ລາຊະ​ດອນ) ຂອງ​ຝຣັ່ງ ໄດ້ລົງມະຕິ​ດ້ວຍ​ສຽງ​ສ່ວນ​ຫຼາຍ​ຮັບຮອງ​ເອົາ​ກົດໝາຍ ​ເພີ່ມ​ຄວາມ​ເຂັ້ມ​ງວດ​ຕໍ່​ຊາວ​ອົບ​ພະ​ຍົບ ກົດໝາຍເກົ່າ​ໃນ​ເມື່ອ​ກ່ອນ​ກຳນົດ​ການ​ຄວບ​ຄຸມ​ຕົວ​ອົບ​ພະຍົບ​ພຽງ 45 ວັນ ແລະ ໄດ້​ເພີ່ມ​ຂຶ້ນ​ເປັນ 90 ວັນ ແຕ່​ພ້ອມ​ດຽວ​ກັນ​ນັ້ນ ກໍ່​ມີ​ການ​ຜ່ອນຜັນ​ຂັ້ນ​ຕອນການ​ພິຈາລະນາ​ຄຳ​ຮ້ອງ​ຂອງ​ອົບ​ພະ​ຍົບ​ ເພື່ອ​ຂໍຖານະ​ຜູ້​ລີ້​ໄພ​ຈາກ 120 ວັນ ໃນ​ເມື່ອ​ກ່ອນ ລົງ​ມາເປັນ 90 ວັນ ພ້ອມ​ດຽວ​ກັນ​ນັ້ນ ຍັງ​ໃຫ້​ເວລາ​ສຳລັບ​ອຸທອນ​ພາຍ​ໃນ 2 ອາທິດ ໃນ​ກໍລະນີ​ຄຳ​ຮ້ອງຖືກ​ປະຕິເສດ ກົດໝາຍ​ໄດ້​ກຳນົດ​ນະໂຍບາຍ​ພິເສດ ອີກ​ຂໍ້​ໜຶ່ງຄື: ເພີ່ມ​ຄວາມ​ສະດວກ​ສຳລັບ​ການ​ອອກວີ​ຊາ​ໃຫ້​ແຮງ​ງານ​ທີ່​ມີ​ຄວາມ​ຊຳນານ​ງານ ເຊິ່ງເອີ້ນ​ກັນ​ວ່າ ວີ​ຊາ​ພອນ​ສະຫວັນ ເພື່ອ​ດຶງ​ເອົາ​ແຮງງານ​ທີ່​ມີ​ຂັ້ນ​ຫົວ​ກະທິ ​ເຂົ້າ​ໄປ​ພັດທະນາ​ເສດຖະກິດ-ສັງຄົມ​ຝຣັ່ງ ແນວໃດ​ກໍ່​ດີ ການ​ຜ່ານ​ກົດໝາຍ​ສະບັບ​ນີ້ ​ຍັງ​ບໍ່​ໄດ້​ຮັບ​ຄວາມ​ເປັນ​ເອກະ​ພາບ​ສູງ​ພໍ​ປານໃດ ເພາະ​ມີ​ຜູ້​ແທນ​ຈຳນວນ​ໜຶ່ງ​ຕ້ອງການ​ໃຫ້​ແກ້ໄຂ​ເນື້ອ​ໃນ​ຂອງ​ກົດໝາຍ​ຫຼາຍ​ກວ່າ 1.000 ຈຸດ ຕົ້ນຕໍ​ແມ່ນ​ກ່ຽວ​ກັບ​ການ​ກຳນົດ​ເວລາ​ສູງ​ສຸດ ​ໃນການ​ຄວບ​ຄຸມ​ຕົວ​ຜູ້​ອົບ​ພະ​ຍົບ.

ທີ່​ອິນ​ໂດ​ເນ​ເຊຍ: ການ​ປະຕິບັດ​ກົດໝາຍ​ໃນ​ອິນໂດ​ເນ​ເຊຍ​ມີ​ປະສິດທິພາບ​ອີ່ຫຼີ ຄື​ບໍ່​ອະນຸຍາດ​ໃຫ້​ໃຜຜູ້​ໜຶ່ງ ເຖິງ​ຈະ​ມີ​ອຳນາດ​ໃຫຍ່​ສູງ​ພຽງ​ຟ້າ ຫຼື ຄົນ​ທີ່ຕ້ອຍ​ຕ່ຳ​ຈຳ​ດິນ ​ລອດ​ບ່ວງ​ກົດໝາຍ​ໄດ້ ຖ້າ​ມີ​ຄວາມຜິດ ເວົ້າ​ໄດ້​ວ່າ​ກົດໝາຍ​ຂອງ​ປະເທດ​ນີ້​ບໍ່​ແມ່ນ​ກົດໝັນ ຫຼື ກົດ​ໝູ່ ຄື​ຢູ່​ໃນ​ບາງ​ປະເທດ ໃນ​ລະຫວ່າງກາງ​ເດືອນ​ເມສາ​ປີ​ນີ້ ສານ​ອິນ​ໂດ​ເນ​ເຊຍ ໄດ້​ຕັດສິນ​ຈຳ​ຄຸກ​ທ່ານ ເສດ​ເຕຍ ໂນ​ວັນ​ໂຕ (Setya Novanto) ປະທານ​ລັດ​ຖະ​ສະພາ​ເປັນ​ເວລາ 15 ປີ ຍ້ອນ​ໂທດ​ກຳ​ຈາກ​ການ​ສໍ້​ລາດ​ບັງ​ຫຼວງ ໃນ​ປີ 2015 ທ່ານ ເສດ​ເຕຍ ໂນ​ວັນ​ໂຕ ໄດ້​ຖືກ​ບັງຄັບ​ໃຫ້ລົງ​ຈາກ​ຕັ່ງ​ປະທານ​ລັດ​ຖະ​ສະພາ ແຕ່​ທ່ານ​ກໍ່​ສາມາດ​ແກ່ຍາວ​ຕຳແໜ່ງ​ນີ້​ມາ​ໄດ້​ເຖິງ​ປີ 2016 ນອກຈາກ​ໂທດ​ຈຳ​ຄຸກ​ແລ້ວ ຈຳເລີຍ​ຍັງ​ຖືກ​ປັບ​ໃໝ​ເປັນຈຳນວນ​ເງິນ 36 ພັນ​ໂດ​ລາ​ສະຫະລັດ ໃນ​ໜ້າທີ່ຕຳແໜ່ງ​ຜ່ານ​ມາ ທ່ານ ເສດ​ເຕຍ​ ໂນ​ວັນ​ໂຕ ໄດ້​ມີບົດບາດ​ໃນ​ຂະ​ບວນ​ການ​ໂກງ​ກິນ​ເງິນ​ຂອງ​ຊາດ ຈາກ​ໂຄງການ​ອອກ​ບັດປະຈຳຕົວ ເຊິ່ງ​ມີ​ມູນ​ຄ່າເຖິງ 440 ລ້ານ​ໂດ​ລາ​ສະຫະລັດ ພູດ​ທີ່​ຖືກ​ໂກງຈາກ​ຈຳນວນ​ເງິນ​ດັ່ງກ່າວ​ນັ້ນ​ມີ 170 ລ້ານ​ໂດ​ລາສະຫະລັດ ຂ່າວ​ບອກ​ວ່າ ອະດີດ​ປະທານ​ລັດ​ຖະສະພາ​ ຍັງ​ມີ​ບັນຫາ​ແປດ​ເປື້ອນ​ເລື່ອງ​ສໍ້​ລາດ​ບັງຫຼວງ​ອີກ​ໃນ​ຫຼາຍໆ​ກໍລະນີ (ແຫຼ່ງ​ຂໍ້​ມູນ The Nation 25/04/2018).

ຂ່າວທີ່ກ່ຽວຂ້ອງ