ຄະນະຜູ້ແທນພັກ ສປປ ລາວ ສຳເລັດການຢ້ຽມຢາມ ຣັດເຊຍ-ເບລາຣຸສ ແລະ ອາແຊັກໄບຊານ

401 24 ພ.ພ. 2018 ຂ່າວໜ້າ​ໜຶ່ງ

ໂດຍ​ຕອບ​ສະໜອງ​ຄຳ​ເຊີນ​ຂອງ​ບັນດາ​ພັກ​ໃນ​ຣັດ​ເຊຍ ເບ​ລາ​ຣຸສ ແລະ ອາ​ແຊັກ​ໄບ​ຊານ ຄະນະ​ຜູ້​ແທນ​ພັກ ​ສປປ ລາວ ນຳ​ໂດຍ​ທ່ານ​ນາງ ສູນ​ທອນ ໄຊ​ຍະ​ຈັກ ກຳມະການ​ສູນ​ກາງ​ພັກ ຫົວໜ້າ​ຄະນະ​ພົວພັນ​ຕ່າງປະເທດ​ສູນ​ກາງ​ພັກ ໄດ້​ຢ້ຽມຢາມ 3 ປະເທດ​ດັ່ງກ່າວ ແຕ່​ວັນ​ທີ 13-23 ພຶດສະພາ 2018 ແລະ ໃນ​ໄລຍະ​ຢ້ຽມຢາມຄະນະ​ຜູ້​ແທນ​ໄດ້​ມີ​ການ​ພົບ​ປະ​ກັບ​ການ​ນຳ​ຂອງ​ບັນດາ​ພັກ ເປັນຕົ້ນ ທີ່​ປະເທດ​ຣັດ​ເຊຍ ຄະນະ​ໄດ້​ພົບ​ກັບ​ການ​ນຳ​ຂອງ​ພັກ​ຣັດ​ເຊຍ​ເອກະ​ພາບພັກ​ກອມ​ມູ​ນິດ ສະຫະພັນ​ຣັດ​ເຊຍ ການ​ນຳ​ສະພາ​ດູ​ມາ ສະພາ​ສູງ ແລະ ໄດ້​ຢ້ຽມຢາມ​ນິຄົມ​ການ​ກະເສດ​ເລ​ນິນ ທີ່​ຂຶ້ນ​ກັບ​ພັກ​ກອມ​ມູ​ນິດ​ສະຫະພັນ​ຣັດ​ເຊຍ ທີ່​ປະເທດ​ເບ​ລາ​ຣຸສ ໄດ້​ພົບ​ກັບ​ການ​ນຳ​ພັກ​ກອມ​ມູ​ນິດ​ເບ​ລາ​ຣຸສ ການ​ນຳ​ອົງ​ການຈັດຕັ້ງ​ມະຫາຊົນ​ເບຍ​ລາ​ຢາ​ລຸສ ການ​ນຳ​ກະຊວງ​ສຶກ​ສາ​ທິ​ການ ແລະ ກະຊວງ​ການ​ຕ່າງປະເທດ ແລະ ທີ່​ປະເທດ​ອາ​ແຊັກ​ໄບ​ຊານ ໄດ້​ພົບ​ປະ​ກັບ​ຮອງ​ນາຍົກລັດຖະມົນຕີ ຮອງ​ປະທານ​ພັກ​ອາ​ແຊັກ​ໄບ​ຊານ​ໃໝ່ ຮອງ​ປະທານ​ສະພາ​ອາ​ແຊັກ​ໄບ​ຊານ ປະທານ​ຄະນະ​ກຳມະການ​ຮັບຜິດຊອບ​ວຽກ​ງານ​ຄອບຄົວ ແມ່ຍິງ ແລະ ເດັກນ້ອຍ ຮອງ​ລັດຖະມົນຕີ​ກະຊວງ​ການ​ຕ່າງປະເທດ ແລະ ໄດ້​ຢ້ຽມຢາມ​ສູນ​ອາ​ຊານ ເຊິ່ງ​ເປັນ​ບ່ອນ​ບໍລິການ​ປະຊາຊົນ​ຈຸດ​ດຽວ​ທີ່​ນະຄອນຫຼວງ​ບາ​ກູ.

ພິເສດ​ໃນ​ການ​ຢ້ຽມຢາມ​ຄັ້ງ​ນີ້ ພັກ ​ປປ ລາວ ແລະ ພັກ​ອາ​ແຊັກ​ໄບ​ຊານ​ໃໝ່ ໄດ້​ສັນຍາ​ການ​ຮ່ວມ​ມື​ລະຫວ່າງ​ສອງ​ພັກ​ໃນ​ໄລຍະ 5 ປີ​ຕໍ່ໜ້າ ໂດຍ​ມີ​ຮອງ​ນາຍົກລັດຖະມົນຕີ​ອາ​ແຊັກ​ໄບ​ຊານ ທັງ​ເປັນ​ຮອງ​ປະທານ​ພັກ​ອາ​ແຊັກ​ໄບ​ຊານ​ໃໝ່ ແລະ ເອກ​ອັກ​ຄະ​ລັດ​ຖະ​ທູດ​ລາວ ປະຈຳ​ມົດ​ສະ​ກູ ເຂົ້າ​ຮ່ວມ​ເປັນ​ສັກຂີ​ພິຍານ ເຊິ່ງ​ເປັນ​ພື້ນຖານ​ໃຫ້​ແກ່​ການ​ພົວພັນ​ລະຫວ່າງ​ສອງ​ພັກ ສອງ​ລັດ ແລະ ບັນດາ​ອົງ​ການຈັດຕັ້ງ​ນິຕິບັນຍັດ​ຂອງ​ສອງ​ປະເທດ.

ໃນ​ການ​ພົບ​ປະ​ກັບ​ການ​ນຳ​ຂອງ 3 ປະເທດ​ດັ່ງກ່າວ ຫົວໜ້າ​ຄະນະ​ຜູ້​ແທນ​ພັກ ​ປປ ລາວ ໄດ້​ຕີ​ລາຄາ​ສູງ​ຕໍ່​ມູນເຊື້ອ​ການ​ພົວພັນ​ລະຫວ່າງ​ພັກ ລັດຖະບານ ແລະ ປະຊາຊົນ​ລາວ ກັບ ພັກ ລັດຖະບານ ແລະ ປະຊາຊົນ​ຂອງ 3 ປະເທດ​ດັ່ງກ່າວ ໄດ້​ແຈ້ງ​ສະພາບ​ການ​ພົ້ນ​ເດັ່ນ​ຂອງ ​ສປປ ລາວ ປຶກສາ​ຫາລື​ກັບ​ທິດ​ທາງ​ການ​ຮ່ວມ​ມື​ໃນຕໍ່ໜ້າ ສະແດງ​ຄວາມ​ຂອບໃຈ​ຢ່າງ​ຈິງ​ໃຈ​ຕໍ່​ການ​ສະໜັບສະໜູນ ແລະ ການ​ຊ່ວຍເຫຼືອ​ຕໍ່​ພາລະກິດ​ການ​ປະຕິວັດ​ຂອງ​ປະຊາຊົນ​ລາວ​ໃນ​ເມື່ອ​ກ່ອນ ກໍ່​ຄືໄລຍະ​ປັດຈຸບັນ ຂະນະ​ທີ່​ການ​ນຳ​ຂອງ 3 ປະເທດ​ດັ່ງກ່າວ ໄດ້​ເນັ້ນ​ເຖິງ​ຄວາມ​ສຳຄັນ ​ໃນ​ການ​ສືບຕໍ່​ພົວພັນ​ຮ່ວມ​ມື​ນຳ​ກັນ​ໃນ​ຂົງເຂດ​ຕ່າງໆ​ນຳ​ກັນ ເຊັ່ນ: ການ​ຮ່ວມ​ມື​ດ້ານ​ການເມືອງ ອົງ​ການຈັດຕັ້ງ​ມະຫາຊົນ ເສດຖະກິດ​ການ​ຄ້າ ການ​ລົງທຶນ ແລະ ການ​ກໍ່ສ້າງ​ຊັບພະຍາກອນ​ມະນຸດ​ ຕາມ​ເງື່ອນໄຂ​ສະດວກ​ຂອງ​ແຕ່​ລະ​ຝ່າຍ ແລະ ຫວັງ​ວ່າ​ລາວ​ຈະ​ຮ່ວມ​ມື​ເພື່ອ​ປະຕິບັດ​ຕາມ​ສັນຍາ​ລະຫວ່າງ​ພັກ ​ປປ ລາວ ​ສປປ ລາວ ໃຫ້​ເປັນ​ຮູບ​ປະ​ທຳ​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ