ຂ່າວຫຼ້າສຸດ

ການລ້ຽງນົກກະຈອກເທດໃນເບື້ອງຕົ້ນ

430 24 ພ.ພ. 2018 ຂ່າວໜ້າ​ໜຶ່ງ
ການລ້ຽງນົກກະຈອກເທດໃນເບື້ອງຕົ້ນ

ສະຖານີ​ຄົ້ນຄວ້າ​ແນວ​ພັນ​ສັດ​ປີກ ເປັນ​ສະຖານີ​ໜຶ່ງທີ່​ຂຶ້ນ​ກັບ​ກະຊວງ​ກະສິກຳ ແລະ ປ່າໄມ້ ສະ​ຖາ​ບັນ​ຄົ້ນຄວ້າ​ກະສິກຳ ແລະ ປ່າໄມ້ ແລະ ພັດທະນາ​ຊົນນະບົດ ສູນ​ຄົ້ນຄວ້າ​ການ​ລ້ຽງສັດ ໃນ​ທຸກໆ​ປີ​ສະຖານີ​ຄົ້ນຄວ້າ​ແນວ​ພັນ​ສັດ​ປີກ ມີ​ພາລະ​ບົດບາດ​ໃນ​ການ​ຂະຫຍາຍ​ຜະລິດ​ແນວ​ພັນ​ສັດ​ປີກ​ເຊິ່ງ​ມີ 4 ສາຍ​ພັນ​ຫຼັກ ປະກອບ​ດ້ວຍເປັດ​ເທບ ໄກ່​ລາຍ​ໜອງ​ແຕ່ງ (ນຳ​ເຂົ້າ​ມາ​ແຕ່​ປະເທດ​ເອ​ຢິບ) ໄກ່​ຕ໋ອກ ໄກ່ລາດ ແມ່ນ​ນຳ​ມາ​ເພື່ອ​ມາ​ປັບປຸງ​ພັນ​ກັບ​ໄກ່​ລາຍ ເພື່ອ​ໃຫ້​ອອກ​ມາ​ເປັນ​ລູກຊອດ ພ້ອມ​ທັງ​ຮັບ​ສຳ​ມະ​ນາ​ກອນ​ມາ​ເຝິກອົບຮົມ​ການ​ລ້ຽງສັດ​ປີກ ທີ່​ມາ​ຈາກ​ໂຮງຮຽນ​ເຕັກນິກ​ທົ່ວ​ປະເທດ ທີ່​ມີ​ຄວາມ​ສົນໃຈ​ຢາກ​ລ້ຽງສັດ​ປີກ ເພື່ອ​ສ້າງ​ລາຍ​ເພີ່ມ​ໃຫ້​ກັບ​ຄອບຄົວໃຫ້​ນັບ​ມື້​ນັບ​ດີ​ຂຶ້ນ​ເປັນ​ກ້າວໆ.

ທ່ານ ແກ້ວ​ສັນຕິ​ສຸກ ໄຊ​ຄຳ​ວົງ ຫົວໜ້າ​ສະຖານີ​ຄົ້ນຄວ້າ​ແນວ​ພັນ​ສັດ​ປີກ ກ່າວ​ວ່າ: ການ​ຄົ້ນຄວ້າ​ຄວາມ​ເປັນ​ໄປ​ໄດ້​ໃນ​ການ​ຂະຫຍາຍ​ພັນ​ນົກ​ກະຈອກ​ເທດ​ຢູ່​ບ້ານ​ເຮົາ​ນີ້ ໄດ້​ຮັບ​ການ​ຍອມຮັບ​ແລ້ວ 70% ມາ​ຮອດ​ປັດຈຸບັນ ທາງ​ສະຖານີ​ຄົ້ນຄວ້າ​ແນວ​ພັນ​ສັດ​ປີກ​ພວມ​ລິ​ເລີ່ມ​ສຶກ​ສາ​ຂະຫຍາຍ​ພັນ ນົກ​ກະຈອກ​ເທດ ເຊິ່ງ​ໄດ້​ສຶກ​ສາ​ມາ​ໄດ້ 1 ປີ ກັບ 6 ເດືອນ​ແລ້ວ ສຳລັບ​ເຕັກນິກ​ການ​ລ້ຽງ​ນົກ​ກະຈອກ​ເທດ ແມ່ນ​ລິ​ເລີ່ມ​ຈາກການ​ຟັກ​ໄຂ່​ກ່ອນ ຂັ້ນ​ຕອນ​ທຳ​ອິດ​ແມ່ນ​ຄັດ​ເລືອກ​ໄຂ່ ອີງ​ຕາມ​ມາດຕະຖານ​ຂອງ​ໄຂ່ ຫຼັງ​ຈາກ​ນັ້ນແລ້ວ ກໍ່​ເລີ່ມ​ເອົາ​ເຂົ້າ​ຕູ້​ຟັກ ແຕ່​ວ່າ​ໄຂ່​ທີ່​ເອົາ​ເຂົ້າ​ຕູ້​ຟັກ​ນີ້​ ຕ້ອງ​ມີ​ໄລຍະ​ເວລາ​ໄຂ່​ປະສົມ​ພັນ​ຈາກ​ເພດ​ຜູ້​ອອກ​ຈາກ​ແມ່​ມາ ບໍ່​ໃຫ້​ເກີນ 7 ວັນ ແລະ ເກັບ​ໄຂ່​ໄວ້​ບໍ່​ໃຫ້​ເກີນ 1 ອາທິດ ໃນ​ອຸນຫະພູມປະມານ 15-20 ອົງສາ ແລະ ຕ້ອງ​ຫຼີກ​ລ່ຽງ​ບໍ່​ໃຫ້​ຖືກ​ນ້ຳ ໄຂ​ບໍ່​ຕາກແດດ ເອົາ​ເຂົ້າ​ຕູ້​ຟັກ​ນັບ​ແຕ່​ເລີ່ມ​ຕົ້ນ​ຈົນ​ຮອດ​ມື້​ເບາະ​ໃຊ້​ເວລາ 42 ວັນ ເວລາ​ຟັກ​ຕ້ອງການ​ຄວາມ​ຊຸ່ມ​ສະເລ່ຍ​ຢູ່​ລະຫວ່າງ 30% ຂອງ​ຄວາມ​ຊຸ່ມ ອຸນຫະພູມ​ຢູ່​ໃນ​ລະດັບ 37-37,5 ອົງສາ.

ຫຼັງ​ຈາກ​ນົກ​ກະຈອກ​ເທດແຕກ​ເບາະ​ອອກ​ມາ​ແລ້ວ ເອົາ​ລູກ​ນົກ​ກະຈອກ​ເທດ​ນີ້​ມາ​ອະນຸບານ ເຊິ່ງ​ຂັ້ນ​ຕອນ​ອະນຸບານ​ນົກ​ກະຈອກ​ເທດ​ເກີດ​ມາ​ໃໝ່​ ຈະ​ບໍ່​ຮູ້​ເລືອກ​ກິນ​ອາຫານ ຕ້ອງ​ໄດ້​ລະມັດລະວັງ ຫຼັງ​ຈາກ​ອາທິດ​ທຳ​ອິດ​ນີ້ ຕ້ອງ​ໄດ້​ໃຕ້​ດອກໄຟດອກ 100 ວັດ ເພື່ອ​ໃຫ້​ຄວາມ​ອົບ​ອຸ່ນອຸນຫະພູມ​ຢູ່​ຄອກ​ອະນຸບານ​ຢູ່​ໃນ​ລະດັບ 25-30 ອົງສາ ແຕ່​ວ່າ​ອຸນຫະພູມ​ທີ່​ເໝາະ​ແທ້​ແມ່ນ 28-32 ອົງສາ ໄລຍະ​ສາມ​ມື້​ທຳ​ອິດ ຫຼັງ​ຈາກ​ໄດ້ 7 ມື້​ແລ້ວ ອຸ​ຫະ​ພູມ​ແມ່ນ 28 ອົງສາ ແລະ ວິທີ​ການ​ໃຫ້​ນ້ຳ ໃຫ້​ອາຫານນີ້​ເຮົາ​ຕ້ອງ​ໃຫ້​ອາຫານ​ທີ່​ມີ​ທາດ​ໂປຼ​ຕີນ ປະມານ 21% ເປັນ​ອາຫານ​ໄກ່​ນ້ອຍ ໃນ​ໄລຍະ​ຍັງ​ນ້ອຍ​ນີ້ ນົກ​ກະຈອກ​ເທດ ມັນ​ມັກ​ກິນ​ທົ່ວທີບ ສະຖານ​ອະນຸບານ ຕ້ອງ​ແມ່ນ​ປາສະຈາກ​ສິ່ງ​ຂອງ​ແຂງ ເປັນຕົ້ນ​ແມ່ນ ເຫຼັກ ຢາງ ແລະ ເສດ​ແກ້ວ​ທີ່​ມີ​ຄວາມ​ຄົມ ແລະ ອື່ນໆ​ທີ່​ເປັນ​ຂອງ​ແຂງ ເພາະ​ມັນ​ກິນ​ເຂົ້າ​ໄປ​ແລ້ວ​ຈະ​ເຮັດ​ໃຫ້​ກະເພາະ​ບໍ່​ລະລາຍ ມີ​ໂອກາດ​ຕາຍ​ສູງ ແລະ ໃຫ້​ນ້ຳ​ທີ່​ສະອາດ ນອກຈາກ​ມັນ​ກິນ​ອາຫານ​ແລ້ວ ນົກ​ກະຈອກ​ເທດ ຍັງ​ກິນ​ພືດ​ເປັນ​ຫຼັກ ຄື​ກັບ​ງົວ ຄວາຍ ດັ່ງນັ້ນ​ ໃນ​ໄລຍະ​ຍັງ​ນ້ອຍ​ເຮົາ​ນຳ​ໃຊ້​ຜັກບົ້ງ ຜັກ​ກາດ ຜັກ​ສະຫຼັດ ແລະ ພືດ​ທີ່​ມີ​ຢູ່​ຕາມ​ຮົ້ວ ສວນ ​ກໍ່​ໄດ້ ແຕ່​ຕ້ອງ​ປາສະຈາກ​ສານ​ເຄ​ມີ.

ຂ່າວທີ່ກ່ຽວຂ້ອງ