ຂ່າວຫຼ້າສຸດ

ຊີເກມສ໌ ຟິລິບປິນ ບໍ່ຈັດເທນນິສ-ຟຸດຊອລ-ປິງປອງ

143 24 ພ.ພ. 2018 ວົງຈອນກີລາ
ຊີເກມສ໌ ຟິລິບປິນ ບໍ່ຈັດເທນນິສ-ຟຸດຊອລ-ປິງປອງ

          ຄະນະມົນຕີຊີເກມສ໌ 11 ຊາດ ໄດ້ເຂົ້າຮ່ວມກອງປະຊຸມມົນຕີຊີເກມສ໌ ທີ່ນະຄອນຫຼວງມະນິລາ ປະເທດຟິລິບປິນ ລະຫວ່າງວັນທີ່ 16-17 ພຶດສະພາ ເພື່ອຫາລືເຖິງການຄັດເລືອກຊະນິດກີລາໃນການແຂ່ງຂັນກີລາຊີເກມສ໌ ຄັ້ງທີ 30 ທີ່ຟິລິບປິນ ຈະເປັນເຈົ້າພາບ ລະຫວ່າງວັນທີ 30 ພະຈິກ  – 10 ທັນວາ ປີໜ້າ.

          ຜົນປາກົດວ່າ ຄະນະກໍາມະການອຳນວຍການຈັດການແຂ່ງຂັນຊີເກມສ໌ ຄັ້ງທີ 30 ໄດ້ເປີດເຜີຍຊະນິດກີລາທີ່ຈະບັນຈຸເຂົ້າໃສ່ການແຂ່ງຂັນ “ມະນິລາ 2019” ຈຳນວນ 30 ກີລາດັ່ງນີ້ ແລ່ນ ແລະ ລານ, ລອຍນ້ຳ ( ກະໂດດນ້ຳ, ]ະບຳໃຕ້ນ້ຳ, ໂປໂລນ້ຳ), ຢິງທະນູ, ຕີດອກປີກໄກ່, ເບສບອລ-ຊອຟບອລ, ບານບ້ວງ, ບິນລຽດ, ໂບລິ່ງ, ມວຍສາກົນສະໝັກຫຼິ້ນ, ຂີ່ລົດຖີບ, ຂີ່ມ້າ-ຂີ່ມ້າໂປໂລ, ຟັນດາບ, ເຕະບານ, ກ໊ອຟ, ຢິມນາສຕິກ, ຢູໂດ-ຢູຢິດສູ, ຄາຣາເຕ-ໂດ, ເຮືອໃບ, ກະຕໍ້, ຍິງປືນ, ສະຄວອຊ, ເທຄວັນໂດ, ໄຕຣກີລາ, ບານສົ່ງ, ຍົກນ້ຳໜັກ, ມວຍປໍ້າ-ຄູຣາຊ, ວູຊູ, ລີລາສ, ມວຍ ແລະ ອາຣ໌ນິສ ຊຶ່ງເປັນກີລາຕໍ່ສູ້ປະຈຳຊາດຟິລິບປິນ.

          ຢ່າງໃດກໍຕາມ ຍັງສາມາດປັບປ່ຽນຊະນິດກີລາໄດ້ ແລະ ຟິລິບປິນຈະເປິດຮັບໃຫ້ຊາດສະມາຊິກສະເໜີເພີ່ມເຕີມຊະນິດກີລາໄດ້ຈົນເຖິງວັນທີ່ 13 ມິຖຸນານີ້.

          ທ່ານ ຣິກກີ ວາກາສ ປະທານຄະນະກໍາມະການໂອລິມປິກຟິລິບປິນ ເປີດເຜີຍວ່າ ຟິລິບປິນຈະໃຊ້ສະໜາມທັງໃນນະຄອນຫຼວງມະນິລາ ແລະ ຄລາກ ຊິຕີ ເມືອງໃໝ່ທີ່ລັດຖະບານຕັ້ງຂຶ້ນຢູ່ທາງດ້ານເໜືອຂອງນະຄອນຫຼວງມະນິລາ ລວມທັງເມືອງທາງຜ່ານລະຫວ່າງສອງເມືອງນີ້ເປັນສັງວຽນແຂ່ງຂັນ ຂະນະທີ່ໝູ່ບ້ານນັກກີລາຫຼັກຈະຢູ່ທີ່ ຄລາກ ຊິຕີ.

ຂ່າວທີ່ກ່ຽວຂ້ອງ