ສົ່ງເສີມການຮ່ວມມືດ້ານພະລັງງານ ຜ່ານລະບົບສາຍສົ່ງແຮງສູງອາຊຽນ

310 23 ພ.ພ. 2018 ຂ່າວໜ້າ​ໜຶ່ງ
ສົ່ງເສີມການຮ່ວມມືດ້ານພະລັງງານ ຜ່ານລະບົບສາຍສົ່ງແຮງສູງອາຊຽນ

ກອງ​ປະຊຸມ​ສຸດ​ຍອດ​ສາຍ​ສົ່ງ​ແຮງ​ສູງ​ອາ​ຊຽນ ປະຈຳ​ປີ 2018 ຈັດ​ຂຶ້ນ​ວັນ​ທີ 22 ພຶດສະພາ 2018 ຢູ່​ໂຮງແຮມ​ຄຣາວ​ພລາ​ຊາ ​ໂດຍ​ເປັນ​ປະທານ​ຂອງ​ທ່ານ ຄຳ​ມະນີ ອິນ​ທິ​ລາດ ລັດຖະມົນຕີ​ກະຊວງ​ພະລັງງານ ແລະ ບໍ່​ແຮ່ ມີ​ທ່ານ Sanjayan Velautham ຜູ້ອຳນວຍການ​ສູນ​ພະລັງງານ​ອາ​ຊຽນ ທ່ານ Twarath Sutabutr ປະທານ​ຄະນະ​ກຳມະການ​ທີ່​ປຶກສາ​ໂຄງການ​ເສື່ອມ​ໂຍງ​ສາຍ​ສົ່ງ​ໄຟຟ້າ ຫົວໜ້າ​ກົມ​ນະໂຍບາຍ ແລະ ແຜນ​ພະລັງງານ ກະຊວງ​ພະລັງງານ​ແຫ່ງ​ປະເທດ​ໄທ ທ່ານIgnatius Rendroyoko ກອງ​ເລຂາ HAPAU ພ້ອມ​ດ້ວຍ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ທ່ານ ຄຳ​ມະນີ ອິນ​ທິ​ລາດ ກ່າວ​ວ່າ: ອາ​ຊຽນ ຖືກ​ເອີ້ນ​ໃນ​ລະດັບ​ສາກົນ​ຢູ່​ເລື້ອຍໆ​ວ່າ​ແມ່ນ​ສູນ​ກາງ​ຄວາມ​ເປັນ​ພາກ​ພື້ນ​ຂອງ​ອາຊີ ຖ້າ​ອາ​ຊຽນ​ມີ​ເສດຖະກິດ​ໜຶ່ງ​ດຽວ ຂະໜາດ​ເສດຖະກິດ​ຈະ​ຈັດ​ຢູ່​ອັນ​ດັບ 4 ຂອງ​ໂລກ​ແຜນ​ວິໄສ​ທັດ​ຂອງ​ອາ​ຊຽນ ປີ 2020 ໄດ້​ຮຽກຮ້ອງ​ໃຫ້​ປະເທດ​ສະມາຊິກ ​ຈົ່ງ​ຮ່ວມ​ກັນ​ພັດທະນາ​ແບບ Dynamic Development ໂດຍ​ເນັ້ນ​ສ້າງ​ການ​ເສື່ອມ​ໂຍງ​ດ້ານ​ເສດຖະກິດ​ຢ່າງ​ແໜ້ນ​ແຟ້ນ​ຢູ່​ພາກ​ພື້ນ ເປັນຕົ້ນ ຂະແໜງ​ພະລັງງານ ແລະ ໂຄງ​ລ່າງ​ພື້ນຖານ ເຊິ່ງ​ຜູ້ນຳ​ອາ​ຊຽນ​ໄດ້​ເຫັນ​ຄວາມ​ສຳຄັນ​ຂອງ​ພື້ນຖານ​ໂຄງ​ລ່າງ​ໄຟຟ້າ​ທີ່​ມີ​ປະ​ສິດທິ​ຜົນ ມີ​ຄວາມ​ໜ້າ​ເຊື່ອ​ຖື ແລະ ສາມາດ​ເພິ່ງ​ຕົນ​ເອງ​ໄດ້ ເພື່ອ​ຕອບ​ສະໜອງ​ຄວາມ​ຕ້ອງການ​ພະລັງງານ​ໄຟຟ້າ​ທີ່​ນັບ​ມື້​ເພີ່ມ​ຂຶ້ນ ແລະ ຄວາມ​ໄດ້​ປຽບ​ທີ່​ຈະ​ເກີດ​ຂຶ້ນ​ຂອງ​ການ​ເສື່ອມ​ຈອດ​ລະບົບ ປະເທດ​ສະມາຊິກ​ອາ​ຊຽນ​ໄດ້​ມີ​ພັນທະ​ໃນ​ການ​ເສື່ອມ​ໂຍງ​ລະບົບ​ໄຟຟ້າ​ໃນ​ພາກ​ພື້ນ ໂດຍ​ຜ່ານ​ລະບົບ​ສາຍ​ສົ່ງ​ອາ​ຊຽນ ເພື່ອ​ສົ່ງເສີມ​ການ​ຮ່ວມ​ມື​ດ້ານ​ປະ​ສິດທິ​ຜົນ​ພະລັງງານ ແລະ ການ​ອະນຸ​ຮັກ​ພະລັງງານ ລວມ​ເຖິງ​ການ​ພັດທະນາ​ແຫຼ່ງ​ພະລັງງານ​ທົດ​ແທນ​ໃໝ່ ເຊິ່ງ​ລະບົບ​ເສື່ອມ​ໂຍງ​ດັ່ງກ່າວ ຈະ​ຊ່ວຍ​ສົ່ງເສີມ​ການ​ຊື້-ຂາຍ​ພະລັງງານ​ຂ້າມ​ຊາຍ​ແດນ​ຂອງ​ປະເທດ​ເພື່ອນ​ບ້ານ​ເພີ່ມ​ຂຶ້ນ ແລະ ຈະ​ປະກອບສ່ວນ​ໃນ​ການ​ເສີມ​ສ້າງ​ຄວາມ​ໝັ້ນຄົງ​ດ້ານ​ພະລັງງານ ແລະ ຍົກ​ສູງ​ຄວາມ​ຮັ່ງມີ​ດ້ານ​ເສດຖະກິດ​ເຊິ່ງ​ກັນ ແລະ ກັນ.

ການ​ເສື່ອມ​ໂຍງ​ດັ່ງກ່າວ ຈະ​ເພີ່ມ​ຄວາມ​ເຂັ້ມແຂງ​ໃຫ້ການ​ຮ່ວມ​ມື​ດ້ານ​ເສດຖະກິດ ໃນ​ເວລາ​ດຽວ​ກັນ ​ກໍ່​ຈະ​ເຮັດ​ໃຫ້​ປະເທດ​ທີ່​ມີ​ຊັບພະຍາກອນ​ທຳ​ມະ​ຊາດ​ອຸດົມສົມບູນ ແຕ່​ມີ​ຄວາມ​ຕ້ອງການ​ພະລັງງານ​ໄຟຟ້າ​ຕ່ຳ ສາມາດ​ສ້າງ​ລາຍ​ຮັບ​ຈາກ​ການ​ສະໜອງ​ຊັບພະຍາກອນ ເຊິ່ງ ​ສປປ ລາວ ແມ່ນ​ໜຶ່ງ​ໃນ​ບັນດາ​ປະເທດ​ດັ່ງກ່າວ ກົງ​ກັນຂ້າມ ​ປະເທດ​ທີ່​ຕ້ອງການ​ພະລັງງານ​ໄຟຟ້າ​ສູງ ສາມາດ​ຕອບ​ສະໜອງ​ໄຟຟ້າ​ທີ່​ບໍ່​ພຽງພໍ ໂດຍ​ການ​ນຳ​ເຂົ້າ​ພະລັງງານ​ໄຟຟ້າ​ຈາກ​ປະເທດ​ເພື່ອນ​ບ້ານ ​ໃນ​ລາຄາ​ສົມ​ເຫດ​ສົມ​ຜົນ ການ​ເສື່ອມ​ຕໍ່​ດັ່ງກ່າວ​ນີ້ ​ຈະ​ຊ່ວຍ​ຫຼຸດຜ່ອນ​ການ​ລົງທຶນ​ຂອງ​ລັດ​ໃນ​ການ​ກັກ​ເກັບ​ພະລັງງານ ເພື່ອ​ຕອບ​ສະໜອງ​ຄວາມ​ຕ້ອງການ​ພະລັງງານ​ໄຟຟ້າ​ໃນ​ໄລຍະ​ທີ່​ມີ​ການ​ຊົມໃຊ້​ສູງ ການ​ສະໜອງ​ພະລັງງານ​ມີ​ຄວາມ​ໜ້າ​ເຊື່ອ​ຖື ແລະ ​ເພີ່ມ​ອັດຕາ​ການ​ເຂົ້າ​ເຖິງ​ໄຟຟ້າ​ໃນ​ພາກ​ພື້ນ ເພື່ອ​ເຮັດ​ໃຫ້​ມີ​ການ​ເຊື່ອມ​ຈອດ​ດັ່ງກ່າວ ຍັງ​ມີ​ຫຼາຍ​ໜ້າ​ວຽກ​ທີ່​ຕິດ​ພັນ​ກັບ​ການ​ກໍ່ສ້າງ​ພື້ນຖານ​ໂຄງ​ລ່າງ​ດ້ານ​ພະລັງງານ​ທີ່​ຈະ​ຕ້ອງ​ໄດ້​ປະຕິບັດ ໂດຍ​ອີງໃສ່​ຂໍ້​ມູນ​ຈາກ​ສູນ​ພະລັງງານ​ອາ​ຊຽນ ອາ​ຊຽນ​ຕ້ອງການ​ທຶນ 100 ຕື້​ໂດ​ລາ​ສະຫະລັດ ຫຼື ປະມານ 800.000 ຕື້​ກີບ ເພື່ອ​ຕອບ​ສະໜອງ​ຄວາມ​ຕ້ອງການ​ພະລັງງານ​ໄຟຟ້າ​ທີ່​ນັບ​ມື້​ເພີ່ມ​ຂຶ້ນ ແລະ ອີກ 7 ຕື້​ໂດ​ລາ​ສະຫະລັດ ຫຼື ປະມານ 56.000 ຕື້​ກີບ ເພື່ອ​ພັດທະນາ​ທໍ່​ສົ່ງ​ແກັສ ເຊິ່ງ​ບັນດາ​ໂຄງການ​ນັ້ນ ​ຕ້ອງການ​ແຮງ​ສະໜັບສະໜູນ​ຈາກ​ພາກ​ລັດ ແລະ ການ​ມີ​ສ່ວນ​ຮ່ວມ​ຂອງ​ພາກ​ເອກະ​ຊົນ ເພື່ອ​ຮັບປະກັນ​ວ່າ​ໂຄງການ​ຕ່າງໆ​ຈະ​ສາມາດ​ປະຕິບັດ​ໄດ້.

ຂ່າວທີ່ກ່ຽວຂ້ອງ