ເບີ່ງບ້ານເຂົາເອົາບົດຮຽນ 23/05/2018

215 23 ພ.ພ. 2018 ຫົວຂໍ້ຂ່າວອື່ນໆ

ຄໍລຳປະຈຳວັນນີ້ ສະເໜີກ່ຽວກັບແຜນພັດທະນາ ການທ່ອງທ່ຽວຢູ່ເກາະໄຮນານຂອງຈີນ ແລະ ເລື່ອງ ກົດລະບຽບຄວບຄຸມໂດຼນໃນອາຣັບບີ ຊາອຸດິດ.

   ທີ່ ສປ ຈີນ: ມີຂ່າວຍ່ອຍໆ ແຕ່ຄວນເບິ່ງໄວ້ເປັນບົດຮຽນໃນການສົ່ງເສີມການທ່ອງທ່ຽວຢູ່ບ້ານເຮົານັ້ນກໍ່ຄືທາງການ ສປ ຈີນ ໄດ້ພັດທະນາແຫຼ່ງທ່ອງທ່ຽວຢູ່ເກາະໄຮນານ ທາງພາກໃຕ້ ເຊິ່ງມີຫຼາຍຄົນ ສົມທຽບໃສ່ເກາະຮາວາຍ ຂອງສະຫະລັດອາເມຣິກາ ເພາະມີອາກາດ ແລະ ສະພາບແວດລ້ອມ ຄ້າຍໆກັບເກາະຮາວາຍ ເຊິ່ງເປັນໜຶ່ງຂອງແດນສະຫວັນສຳລັບນັກທ່ອງທ່ຽວທີ່ນິຍົມຫາດຊາຍ ແລະ ນ້ຳທະເລສີຂຽວເຢືອກເຢັນ ເກາະໄຮນານ ຕັ້ງຢູ່ເຂດຮ້ອນ ອຸດົມໄປດ້ວຍພັນໄມ້ພັນສັດຂອງເຂດຮ້ອນ ການພັດທະນາເກາະແຫ່ງນີ້ໃຫ້ເປັນແດນສະຫວັນເມືອງຄົນທີ່ສາມາດດຶງດູດທັບນັກທ່ອງທ່ຽວຈາກຕ່າງປະເທດໄປທ່ຽວນັ້ນ ທາງການຈີນໄດ້ວາງນະໂຍບາຍພິເສດໃນການອອກວີຊາ ຄື ມີທັງຄວາມສະດວກສະບາຍ ແລະ ທັງມີອາຍຸ ການນຳໃຊ້ຍາວຂຶ້ນ ຄືໃຜທີ່ໄປທ່ອງທ່ຽວເປັນເວລາ 30 ວັນ ຈະບໍ່ຈຳເປັນຂໍວີຊາ ນະໂຍບາຍວີຊາມະຫາສະດວກນີ້ເລີ່ມປະຕິບັດແຕ່ເດືອນພຶດສະພາປີນີ້ ຂ່າວບອກວ່າ ວີຊານີ້ມີກຳນົດອອກໃຫ້ພົນລະເມືອງຂອງ 59 ປະເທດ ໃນນັ້ນ ລວມມີ ຣັດເຊຍ ສະຫະລັດອາເມຣິກາ ຝຣັ່ງ ອັງກິດ ແລະ ເຢຍລະມັນ ເຊິ່ງລ້ວນແຕ່ເປັນນັກທ່ອງທ່ຽວຖົງຕື່ງທັງນັ້ນ.

   ປະເທດອາຣັບບີ ຊາອຸດິດ: ນັບແຕ່ເດືອນເມສາ ປີນີ້ເປັນຕົ້ນມາ ທາງການຂອງປະເທດອາຣັບບີ ຊາອຸດິດ ໄດ້ອອກກົດລະບຽບຄວບຄຸມເຄື່ອງບິນທີ່ບໍ່ມີຄົນຂັບ ເອີ້ນວ່າ ໂດຼນ (Drone) ລວມທັງໂດຼນປະເພດເຄື່ອງຫຼິ້ນ ກົດລະບຽບນີ້ອອກມາໃນບັນຍາ ກາດທີ່ມີເຫດຮ້າຍເກີດຂຶ້ນຄັ້ງໜຶ່ງກັບການປ່ອຍ ໂດຼນຂຶ້ນສູ່ທ້ອງຟ້າ ເຊິ່ງເຈົ້າໜ້າທີ່ຈຳເປັນຕ້ອງໄດ້ ໃຊ້ປືນຍິງແໜ້ນລົງດິນ ຍ້ອນວ່າໂດຼນທີ່ວ່ານັ້ນບິນ ຮ່ອນໄປຮ່ອນມາຢູ່ໃກ້ກັບລາຊະວັງຂອງເຈົ້າຊີວິດ ໃນນະຄອນຫຼວງຣິຢາດ ໃຕ້ກົດລະບຽບ ເຊິ່ງກະຊວງພາຍໃນໄດ້ຮ່າງຂຶ້ນນີ້ ການປ່ອຍໂດຼນຂຶ້ນຟ້າ ເພື່ອຈຸດປະສົງໃດກໍ່ຕາມ ລວມທັງໂດຼນປະເພດ ເຄື່ອງຫຼິ້ນຕ້ອງໄດ້ຂໍອະນຸຍາດຈາກທາງການກ່ອນ ແລະ ສາມາດປ່ອຍໂດຼນໄດ້ໃນເຂດທີ່ທາງການອະນຸຍາດເທົ່ານັ້ນ ຂ່າວບອກວ່າໂດຼນທີ່ບິນເວີ່ນຢູ່ໃກ້ໆ ລາຊະວັງນັ້ນ ເປັນໂດຼນເຄື່ອງຫຼິ້ນຊື່ໆ ບໍ່ໄດ້ບິນເພື່ອ ຈຸດປະສົງອື່ນໆ ແນວໃດກໍ່ດີ ໄດ້ມີຫາງສຽງຈາກ ຜູ້ສັງເກດຈຳນວນໜຶ່ງວ່າ ການປະກາດນຳໃຊ້ກົດລະບຽບຄວບຄຸມໂດຼນຄັ້ງນີ້ ແມ່ນເນື່ອງຈາກເຈົ້າຊີວິດອົງໃໝ່ໄດ້ສະເໜີໃຫ້ມີການປ່ຽນແປງຫຼາຍໆ ນະໂຍບາຍເພື່ອເປີດກວ້າງ ແລະ ໃຫ້ເສລີພາບແກ່ພົນລະເມືອງ ເຊັ່ນ: ອະນຸຍາດໃຫ້ແມ່ຍິງຂັບລົດ ແລະ ເຂົ້າຊົມກີລາໄດ້ ນອກຈາກນັ້ນ ເຈົ້າຊີວິດທີ່ ຂຶ້ນຄອງລາດໃໝ່ຍັງກຳນົດນະໂຍບາຍຫັນປະເທດ ອອກຈາກການເພິ່ງບໍ່ນ້ຳມັນເປັນຫຼັກໄປພັດທະນາດ້ານອື່ນໆ ເຊິ່ງເປັນການຂັດໃຈສຳລັບກຸ່ມຫົວອະນຸຮັກນິຍົມຈຳນວນໜຶ່ງ.

ຂ່າວທີ່ກ່ຽວຂ້ອງ