ເບີ່ງບ້ານເຂົາເອົາບົດຮຽນ 22/05/2018

338 22 ພ.ພ. 2018 ຫົວຂໍ້ຂ່າວອື່ນໆ

     ມື້ນີ້ມີຂ່າວທາງການຮົງກົງອອກກົດລະບຽບລົງໂທດຜູ້ບໍ່ສະແດງຄວາມເຄົາລົບເພງຊາດ ເລື່ອງແມ່ຍິງເຢຍລະມັນຕິດຄຸກຍ້ອນຂ້າລູກໃນໄສ້ຂອງຕົນເອງ ແລະ ປິດທ້າຍກັບມາດຕະການຄວບຄຸມສື່ສັງຄົມອອນລາຍໃນອີຣານ.

   ທີ່ຮົງກົງ: ມີຂ່າວອອກມາຈາກຮົງກົງ ເຂດປົກຄອງພິເສດຂອງ ສປ ຈີນ ໃນເດືອນມີນາປີນີ້ວ່າ ທາງການຂອງເຂດມີແຜນຜ່ານກົດໝາຍທີ່ກຳນົດລົງໂທດຜູ້ທີ່ບໍ່ສະແດງຄວາມເຄົາລົບຕໍ່ເພງຊາດ ສປ ຈີນ ດ້ວຍການຈຳຄຸກສູງສຸດເຖິງ 3 ປີ ທີ່ຕ້ອງ ມີການກຳນົດມາດຕະການນີ້ກໍ່ເພາະວ່າ ຍັງມີຊາວເກາະຮົງກົງຫົວດື້ຈຳນວນໜຶ່ງ ໂດຍສະເພາະ ແມ່ນຜູ້ຊົມກີລາບານເຕະ ມັກຈະບໍ່ໃຫ້ກຽດເພງຊາດຈີນ ແຕ່ໄປສົນໃຈຄຳຂວັນເພື່ອແຍກຮົງກົງ ອອກເປັນເອກະລາດຈາກແຜ່ນດິນໃຫຍ່ ພາຍໃຕ້ ອິດທິພົນຂອງຄົນບໍ່ດີຈຳນວນໜຶ່ງ ກ່ອນໜ້ານັ້ນ ຄືໃນເດືອນພະຈິກ ປີ 2017 ສປ ຈີນ ກໍ່ໄດ້ປັບປຸງກົດໝາຍອາຍາເພີ່ມໂທດຕໍ່ຜູ້ມີການປະພຶດທີ່ເປັນການໝິ່ນປະໝາດທຸງຊາດ ຄືມີໂທດຈຳຄຸກແຕ່ 15 ວັນ ເຖິງສູງສຸດ 3 ປີ ໃນກໍລະນີທີ່ມີຄວາມຜິດຮຸນແຮງ ກົດໝາຍດັ່ງກ່າວໄດ້ກຳນົດຫ້າມບັນເລງ ຫຼື ຮ້ອງເພງຊາດໃນງານລ້ຽງສັງສັນງານແຕ່ງດອງງານຊາປະນະກິດສົບ ແລະ ອື່ນໆ ທີ່ບໍ່ເໝາະສົມ ການສ້າງກົດໝາຍກ່ຽວກັບທຸງຊາດສະເພາະຢູ່ຮົງກົງນີ້ ແມ່ນເພື່ອໃຫ້ສອດຄ່ອງກັບກົດໝາຍກ່ຽວຂ້ອງຂອງ ສປ ຈີນ ທີ່ໄດ້ຮັບການປັບປຸງໃນທ້າຍປີ 2017 ນັ້ນເອງ ແຫຼ່ງຂ່າວ (The nation 29/03/2018).

   ທີ່ເຢຍລະມັນ: ມີຂ່າວເສົ້າທີ່ເກີດຈາກຜູ້ເປັນແມ່ ໃຈອຳມະຫິດ ຂ້າລູກໃນໄສ້ຂອງຕົນເອງຕັ້ງແຕ່ຍັງເປັນເດັກແດງໆ ຂ້າແລ້ວກໍ່ເອົາແຊ່ແຂງໄວ້ໃນຕູ້ເຢັນເປັນເວລາ 10-14 ປີ ແຕ່ສຸດທ້າຍຂ່າວຄວາມຊົ່ວຮ້າຍດັ່ງກ່າວກໍ່ໂປໂລຫົວອອກມາ ແລະ ແມ່ໃຈ ໂຫດຊື່ນາງ ສະເຕັບຟີ (SteffiS) ອາຍຸ 49 ປີ ຄົນນີ້ ຖືກສານເຢຍລະມັນຕັດສິນໃຫ້ນອນຢູ່ໃນກົ້ນຄຸກເປັນເວລາ 9 ປີເຄິ່ງ ຂ່າວບໍ່ໄດ້ໃຫ້ລາຍລະ ອຽດວ່າລູກທັງສອງທີ່ຖືກຂ້າຕາຍນັ້ນມີກັບໃຜ ? ແຕ່ບອກວ່າຜູ້ລາຍງານເຫດການນີ້ເປັນເຈົ້າໜ້າທີ່ ຊາບແມ່ນຜູ້ຊາຍທີ່ເປັນຄູ່ກັບນາງໃນປັດຈຸບັນເຫດສະເທືອນຂວັນນີ້ເກີດຂຶ້ນຢູ່ເມືອງຮານເລີ ທີ່ບ້ານ ເບັນດອບ (Benndorf) ທາງພາກຕາເວັນອອກ ຂອງເຢຍລະມັນ.

   ທີ່ອີຣານ: ມີຂ່າວຈາກປະເທດອີຣານ ເມື່ອ 4 ເດືອນຜ່ານມານີ້ວ່າທາງການໄດ້ກຳນົດຫ້າມໃຊ້ ເຄືອຄ່າຍຂ່າວສັງຄົມອອນລາຍຂອງຕ່າງປະເທດ ພາຍໃນໂຮງຮຽນທົ່ວປະເທດ ເຈົ້າການອອກຂໍ້ກຳນົດຫ້າມແມ່ນກະຊວງສຶກສາ ໂດຍໄດ້ບອກວ່າ ໂຮງຮຽນທຸກໆແຫ່ງຕ້ອງນຳໃຊ້ເຄືອຄ່າຍຂ່າວສັງຄົມຂອງພາຍໃນປະເທດເທົ່ານັ້ນ ອີຣານ ເປັນປະເທດໜຶ່ງທີ່ມີຄົນໃຊ້ເຄືອຄ່າຍສັງຄົມອອນລາຍ ຫຼາຍຕົວຢ່າງ ສະເພາະຜູ້ທີ່ໃຊ້ແອັບ (APP) ໃນປີ 2017 ນັ້ນມີເຖິງ 40 ລ້ານຄົນຕໍ່ເດືອນ ສ່ວນຂະແໜງອຸດສາຫະກຳນັ້ນນິຍົມໃຊ້ເຄືອຄ່າຍ ອິນສະຕາແກຼມ ສ່ວນ ເຟສບຸກ ແລະ ທະວິດເຕີນັ້ນຖືກສະກັດກັ້ນໂດຍທາງການ ແຕ່ກໍ່ສາມາດເຂົ້າເຖິງໄດ້ຜ່ານເຄືອຄ່າຍເອກະຊົນ ໃນຕົ້ນປີນີ້ ຢູ່ອີຣານໄດ້ເກີດມີກະແສປະທ້ວງຫຼາຍຂຶ້ນ ເຊິ່ງທາງການໄດ້ກ່າວຫາວ່າ ຖືກຍຸຍົງສົ່ງເສີມຈາກອິດທິພົນພາຍນອກ ພ້ອມໆດຽວກັນນີ້ທາງການອີຣານ ກໍ່ໄດ້ພັດທະນາເຄືອຄ່າຍຂ່າວສານສັງຄົມພາຍໃນເພື່ອຫຼຸດຜ່ອນການເພິ່ງພາເຄືອຄ່າຍຕ່າງປະເທດ.

ຂ່າວທີ່ກ່ຽວຂ້ອງ