ຂ່າວຫຼ້າສຸດ

ເບີ່ງບ້ານເຂົາເອົາບົດຮຽນ 17/05/2018

263 17 ພ.ພ. 2018 ຂ່າວໜ້າ​ໜຶ່ງ

    ມື້ນີ້​ມີ​ຂ່າວ​ການ​ຜະເດັດ​ເສິກ​ຈັບ​ກຸມ​ກຸ່ມ​ນັກເລງ ສັງຄົມ​ອອນ​ລາຍ​ຢູ່​ບຼາ​ຊິນ ແລະ ນະໂຍບາຍ​ຄຸ້ມ​ຄອງ​ນັກ​ທ່ອງ​ທ່ຽວ​ຈີນ.

   ທີ່​ປະເທດ​ບຼາ​ຊິນ: (ບາງ​ຄົນ​ອອກສຽງ-ເບຼ​ຊິນ): ມີ​ຂ່າວ​ກ່ຽວ​ກັບ​ບັນຫາ​ສັງຄົມ​ອອນ​ລາຍ​ທີ່​ບອກ​ວ່າ ກອງ​ກຳລັງ​ເຈົ້າ​ໜ້າທີ່​ຕຳຫຼວດ​ບຼາ​ຊິນ ໄດ້​ເປີດ​ບັ້ນ​ກວດ​ລ້າງ​ຜູ້​ໃຊ້​ສື່​ສັງຄົມ​ອອນ​ລາຍ​ເພື່ອ​ສ້າງ​ຄວາມ​ລັງ​ກຽດ​ຄຽດ​ຊັງ​ຄວາມ​ຮຸນ​ແຮງ ແລະ ເນື້ອ​ໃນ​ຂົ່ມຂູ່​ຕ່າງໆ ບັນດາ​ຕົວ​ເມືອງ​ໃຫຍ່​ທີ່​ເປັນ​ເປົ້າ ໝາຍ​ກວາດ​ລ້າງ​ກຸ່ມ​ນັກເລງ​ອອນ​ລາຍ​ນັ້ນ​ປະກອບ​ດ້ວຍ​ເມືອງ​ຣີ​ໂອ​ເດ ຮານ​ເນ​ໂຣ ຊາວ​ໂປ ເລ ເຣ​ຊີ​ເຟ ກູ​ຣິ​ຕິ​ບາ ຊານ​ຕາ​ມາ​ເຣຍ ແລະ ເມືອງ​ວິນ ລາ​ເວນ​ຮາ ໃນ​ບັ້ນ​ກວາດ​ລ້າງ​ຄັ້ງ​ຜ່ານ​ມາ​ສົດໆ​ຮ້ອນໆ​ນີ້ ເຈົ້າ​ໜ້າທີ່​ສາມາດ​ຈັບ​ກຸມ​ທ້າວ ມາກ​ເຊ​ໂລ ວາ​ເລ​ຊິນ​ເວ​ຣາ ເມ​ໂຢ ຢູ່​ເມືອງ​ກູ​ຣິ ຕິ​ບາ ທາງ​ພາກ​ໃຕ້ ທ້າວ ມາກ​ເຊ​ໂລ ເປັນ​ຫົວ​ໂປ່​ໂຕ​ການ​ໃຊ້​ສື່​ສັງຄົມ​ອອນ​ລາຍ ເພື່ອ​ທຳລາຍ​ຄວາມ​ເປັນ​ລະບຽບ ຮຽບ​ຮ້ອຍ​ຂອງ​ສັງຄົມ ແລະ ລະເມີດ​ສິດທິ​ມະນຸດ ໃນ​ທຸກໆ​ຮູບ​ແບບ ເມື່ອ​ປີ 2012 ເຂົາ​ຄົນ​ນີ້​ກໍ່​ເຄີຍ ຖືກ​ຈັບ​ກຸມ​ໃນ​ຄະດີ​ດຽວ​ກັນ​ນີ້ ແຕ່​ຍ້ອນ​ສັນດານ​ບໍ່ ເຂັດ​ບໍ່​ຫຼາບ ເຂົາ​ຈຶ່ງ​ຍັງ​ສືບຕໍ່​ລະເມີດ​ລະບຽບ​ກົດໝາຍ​ກ່ຽວ​ກັບ​ສັງຄົມ​ອອນ​ລາຍ ກຸ່ມ​ນັກເລງ​ສັງຄົມ​ອອນ​ລາຍ​ຢູ່​ບຼາ​ຊິນ​ນັ້ນ​ມີ​ຊື່ວ່າ ອອມ​ເບຼັດ ຊານ​ໂຕດ (Hombres santos) ແປ​ວ່າ ຊາຍ​ລູກ​ພະ​ເຈົ້າ ຫຼື ຜູ້​ຊາຍ​ສັກສິດ ແລະ ທ້າວ​ມາກ​ເຊ​ໂລ​ນີ້ ກໍ່​ເປັນ​ໜຶ່ງ​ໃນ​ບັນດາ​ຜູ້​ກໍ່​ຕັ້ງ​ກຸ່ມ​ການເຄື່ອນໄຫວ​ຂອງ​ກຸ່ມ​ອອມ ເບຼັດ​ຊານ​ໂຕດ​ນີ້ ກໍ່​ຄື ໃຊ້​ສື່​ສັງຄົມ​ອອນ​ລາຍ ເພື່ອ​ເຜີຍແຜ່​ແນວ​ຄິດ​ລັງ​ກຽດ​ເຊື້ອ​ຊາດ ຊັກ​ຊວນ​ອວນ ຜູ້​ຄົນ​ໃຫ້​ໃຊ້​ຄວາມ​ຮຸນ​ແຮງ ແບບ​ຟາດ​ຊິດ ປຸກລະດົມ​ໂຈມ​ຕີ​ພົນລະເມືອງ​ຜິວ​ດຳ ພວກ​ຮັກ​ຮ່ວມ​ເພດ ແລະ ແມ່ຍິງ​ຊຸກຍູ້​ອາ​ຊະ​ຍາ​ກຳ​ຂົ່ມຂືນ​ຜືນ​ໃຈ ແລະ ການ​ຄາຕະກຳ ນອກຈາກ​ທ້າວ ມາກ​ເຊ​ໂລ ແລ້ວ​ເຈົ້າ​ໜ້າ​ຕຳຫຼວດ​ທີ່​ຍັງ​ໄດ້​ລ້ອມ​ຈັບ​ຜູ້​ສົມຮູ້​ຮ່ວມ ຄິດ​ອີກ 6 ຄົນ​ຕື່ມ​ການ​ສອບ​ສວນ​ເປີດເຜີຍ​ໃຫ້​ຮູ້​ວ່າ ພວກ​ກ່ຽວ​ຍັງ​ໄດ້​ຮັບຜິດຊອບ​ສົ່ງ​ຄຳ​ຂູ່​ວາງ​ລະເບີດ​ຕາມ​ມະຫາວິທະຍາໄລ​ຕ່າງໆ​ທົ່ວ​ປະເທດ ສັງຄົມ​ອອນ​ລາຍ​ຖ້າ​ປ່ອຍ​ໃຫ້​ເຮັດ​ຊະຊາຍ ຍ່ອມ​ເປັນ ອັນຕະລາຍ​ສຸດ​ຂີດ.

  ທີ່ ​ສປ​ຈີນ: ໃນ​ປັດຈຸບັນ​ເວົ້າ​ໄດ້​ວ່າ ບໍ່​ມີ​ປະເທດ​ໃດ​ໃນ​ໂລກ​ທີ່​ບໍ່​ມີ​ນັກ​ທ່ອງ​ທ່ຽວ​ຈີນ​ໄປ​ທ່ຽວ ເພາະ​ກຳລັງ​ຊື້​ຂອງ​ຊາວ​ຈີນ​ເພີ່ມ​ຂຶ້ນ​ບໍ່​ຢຸດ​ຢັ້ງ ບວກ​ກັບ​ປະຊາ ກອນ​ຈຳນວນ​ມະຫາສານ ປະເທດ​ໃດ​ສາມາດ​ດຶງ​ດູດ​ນັກ​ທ່ອງ​ທ່ຽວ​ຈີນ​ເຂົ້າ​ໄດ້​ຫຼາຍ​ອຸດສາຫະກຳ ຂອງ​ປະເທດ​ນັ້ນ​ກໍ່​ສົດ​ໄສ​ເບັ່ງ​ບານ ດັ່ງນັ້ນ ຫຼາຍ​ປະ ເທດ​ຈຶ່ງ​ໄດ້​ກຳນົດ​ນະໂຍບາຍ​ທ່ອງ​ທ່ຽວ​ພິເສດ ສຳລັບ​ຊາວ​ຈີນ ແນວໃດ​ກໍ່​ດີ​ສ່ວນ​ທາງ​ການ​ຈີນ​ເອງ​ກໍ່ ມີ​ນະໂຍບາຍ​ຄຸ້ມ​ຄອງ​ຄວບ​ຄຸມ​ນັກ​ທ່ອງ​ທ່ຽວ​ຈີນ​ໃຫ້  ຢູ່​ໃນ​ຂອບ ຄື​ໃຫ້​ປະຕິບັດ​ຕາມ​ກົດໝາຍ​ບ້ານ​ເມືອງ ຮີດຄອງ​ປະເພນີ​ຂອງ​ປະເທດ​ທີ່​ໄປ​ຢ້ຽມຢາມ ກຳນົດ ຫຼັກ​ຈັນ​ຍາ​ບັນ ແລະ ມາລະຍາດ​ທີ່​ຊາວ​ຈີນ ຕ້ອງ​ປະຕິບັດ​ເວລາ​ໄປ​ທ່ອງ​ທ່ຽວ​ຢູ່​ຕ່າງ​ແດນ ແຫຼ່ງ​ຂ່າວ​ຈາກ​ໜັງສືພິມ​ລາຍ​ວັນ​ຂອງ​ຈີນ​ຊື່​ຈາຍ​ນາ​ເດລີ (Chinna Daily) ໃນ​ເດືອນ​ສິງຫາ​ປີຜ່ານມາ ໄດ້​ຢ້ຳ ຄຳ​ສັ່ງ​ຂອງ​ທາງ​ການ​ໃຫ້​ນັກ​ທ່ອງ​ທ່ຽວ​ຈີນ​ເຄົາລົບ ຮີດຄອງ​ປະເພນີ ແລະ ລະບຽບ​ກົດໝາຍ​ໃນ​ຕ່າງ​ປະ ເທດ​ເວລາ​ອອກ​ໄປ​ທ່ອງ​ທ່ຽວ ຍົກ​ສູງ​ສະຕິ​ຢ່າ​ໃຫ້ການ​ກະທຳ ກໍ່​ຄື ການ​ປາກ​ເວົ້າ​ສ້າງ​ຜົນ​ກະທົບກະເທືອນ​ກາຍ​ເປັນຄວາມ​ຜິດ ແລະ ເປັນ​ໂທດ​ໃນ​ວັນ​ທີ 5 ສິງຫາ 2017 ຊາຍ​ຈີນ​ສອງ​ຄົນ​ຖືກ​ຕຳຫຼວດ​ເຢຍ​ລະ​ມັນ​ຈັບ​ກຸມ​ໃນ​ຂະນະ​ທ່ອງ​ທ່ຽວ​ຢູ່ ປະເທດ​ນີ້ ຍ້ອນ​ໄດ້​ສະແດງ​ທ່າ​ຄຳນັບ​ແບບ​ຮິດ​ເລີ ກົດໝາຍ ເຢຍ​ລະ​ມັນ​ກຳນົດ​ຫ້າມ​ທຸກ​ການ​ກະທຳ ກໍ່​ຄື ການສະແດງ​ອອກ​ທີ່​ພົວພັນ​ກັບ​ລະບອບ​ຟາດ​ສິດ​ຮິດ​ເລີ           ທັງ​ສອງ​ໄດ້​ເດີນທາງ​ອອກ​ເຢຍ​ລະ​ມັນ ພາຍຫຼັງ​ເສຍ​ຄ່າ​ປັບ​ກັນ​ຜູ້​ລະ 600 ໂດ​ລາ​ສະຫະລັດ.

ຂ່າວທີ່ກ່ຽວຂ້ອງ