ຂ່າວຫຼ້າສຸດ

ນວ ຕິດຕາມກວດກາການລວງຄອງລະບາຍນ້ຳ ບຶງທາດຫຼວງ

250 17 ພ.ພ. 2018 ຂ່າວໜ້າ​ໜຶ່ງ
ນວ ຕິດຕາມກວດກາການລວງຄອງລະບາຍນ້ຳ ບຶງທາດຫຼວງ

ເພື່ອ​​ປ້ອງ​ກັນນໍ້າ​ບໍ່​ໃຫ້ຖ້ວມ​ຂັງ​ຕົວ​ເມືອງ​ວຽງ​ຈັນ ໃນ​ວັນ​ທີ 14 ພຶດສະພາ 2018 ທີ່​ຜ່ານ​ມາ ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງ​ຈັນ ທ່ານ ແກ້ວ​ພິລາ​ວັນ ອາ​ໄພ​ລາດ ຮອງ​ເຈົ້າ​ຄອງ ພ້ອມ​ດ້ວຍ​ຄະນະ​ລົງ​ຕິດຕາມ​ກວດກາ​ການ​ລວງ​ຄອງ​ລະບາຍ​ນ້ຳ​ບຶງ​ທາດຫຼວງ ບໍລິເວນ​ສູນ​ການ​ຄ້າ​ອາ​ຊຽນ​ມໍ ໃນ​ໂອກາດ​ລົງ​ຕິດຕາມ​ຄັ້ງ​ນີ້ ໜ່ວຍ​ງານ​ຮັບຜິດຊອບ ​ໄດ້​ລາຍ​ງານ​ສະພາບ​ການຈັດຕັ້ງ​ປະຕິບັດ​ບັນດາ​ໜ້າ​ວຽກ​ໃນ​ໄລຍະ​ຜ່ານ​ມາ ​ໃຫ້​ແກ່​ຄະນະ​ຊາບ.

ພາຍຫຼັງ​ຮັບ​ຟັງ​ການ​ລາຍ​ງານ ທ່ານ ສິນ​ລະ​ວົງ ຄຸດ​ໄພທູນ ກໍ່​ໄດ້​ມີ​ຄຳ​ເຫັນ​ຊີ້​ນຳ​ກ່ຽວ​ກັບ​ການ​ພັດທະນາ​ບຶງ​ທາດຫຼວງ (ຄອງ​ນ້ຳ​ວຽງ​ຈັນ) ເຊິ່ງ​ໄດ້​ຊີ້​ໃຫ້​ເຫັນ​ເຖິງ​ປັດ​ໄຈ 3 ຢ່າງ ຄື: ອ່າງເກັບນ້ຳ ສ້າງ​ເປັນ​ບ່ອນ​ທ່ອງ​ທ່ຽວ-ທ່າເຮືອ​ຂົນສົ່ງ​ສິນຄ້າ ແລະ ເປັນ​ຈຸດ​ພັກ​ນ້ຳ ເຊິ່ງ​ແຜນ​ວຽກ​ສຳຄັນ​ທີ່​ຈະ​ຕ້ອງ​ເອົາໃຈໃສ່​ໃນຕໍ່ໜ້າ​ແມ່ນ 1. ຕ້ອງ​ເຮັດ​ໃຫ້​ບຶງ​ແຫ່ງ​ນີ້​ສາມາດ​ຮອງ​ຮັບ ຫຼື ເປັນ​ອ່າງ​ກັກ​ເກັບ​ນ້ຳ​ໃຫ້​ໄດ້​ຫຼາຍ​ກວ່າ 4 ລ້ານ​ແມັດ​ກ້ອນ​ໃນ​ລະດູຝົນ ຫຼີກ​ລ່ຽງ​ການ​ລະບາຍ​ນ້ຳ​ດ້ວຍ​ວິທີ​ການ​ໃຊ້​ເຄື່ອງ​ຈັກ​ດູດ​ນ້ຳ ເພາະ​ຕ້ອງ​ໃຊ້​ງົບປະມານ​ຈຳນວນ​ຫຼວງຫຼາຍ 2. ເອົາໃຈໃສ່​ການ​ບໍລິຫານຈັດການ​ນ້ຳ​ໃຫ້​ດີ ຫາກ​ມີ​ປະລິມານ​ນ້ຳ​ຫຼາຍ​ເກີນ​ທີ່​ກຳນົດ​ກໍ່​ຕ້ອງ​ປ່ອຍ​ອອກ. 3. ຮັກສາ​ແກ້ມ​ລິງ​ແຄມ​ບຶງ​ໄວ້ ທັງ​ບ່ອນ​ແຄບ ບ່ອນ​ກວ້າງຕາມ​ທຳ​ມະ​ຊາດ ໃຫ້​ຮັກສາ​ໄວ້​ຢ່າງ​ໜ້ອຍ​ເບື້ອງ​ລະ 50 ແມັດ ເພື່ອ​ເປັນ​ບ່ອນ​ເຈືອ​ຈານ ແລະ ບັນຈຸ​ນ້ຳ 4. ແຄມ​ບຶງ 50 ແມັດ ໃຫ້​ສ້າງ​ເປັນ​ພື້ນ​ທີ່​ສີຂຽວ ເພື່ອ​ສ້າງ​ເປັນ​ແຫຼ່ງ​ທ່ອງ​ທ່ຽວ​ຂີ່​ເຮືອ​ແຄມ​ບຶງ ເຊິ່ງ​ປັດຈຸບັນ ນວ ກຳລັງ​ຮ່າງ​ນິຕິ​ກຳ ແລະ ອອກ​ແບບແຜນ​ຜັງ​ໃນ​ການ​ຄຸ້ມ​ຄອງ ແລະ ນຳ​ໃຊ້​ບຶງ​ດັ່ງກ່າວ 5. ສຳລັບ​ງົບປະມານ​ໃຊ້​ເຂົ້າ​ໃນ​ການ​ລວງ​ຄອງເໝືອງ​ໃນ​ປີຜ່ານມາ ນວ ໄດ້​ນຳ​ໃຊ້​ວິທີ​ການ​ເອົາ​ສິ່ງ​ທີ່​ມີ​ຢູ່​ໝູນ​ໃຊ້​ລ້ຽງ​ໂຕ​ມັນ​ເອງ ເຫັນ​ວ່າ​ວິທີ​ການ​ດັ່ງກ່າວ​ເປັນ​ວິທີ​ການ​ທີ່​ຖືກຕ້ອງ​ແລ້ວ ແຕ່​ພາກ​ປະຕິບັດ ບັນດາ​ບໍລິສັດກໍ່​ຕ້ອງ​ປະຕິບັດ​ຕາມ​ແຜນຜັງ​ທີ່​ພະ​ແນກ​ກະສິກຳ-ປ່າໄມ້​ກຳນົດ 6. ປີ​ນີ້​ເຫັນ​ວ່າ​ສະພາບ​ຟ້າ​ຝົນ​ແມ່ນ​ມາ​ໄວ​ກວ່າ​ປີຜ່ານມາ ຈຶ່ງ​ເຫັນ​ຄວນ​ຢຸດຕິ​ການ​ລວງ​ຄອງ​ບຶງ​ໄວ້​ກ່ອນ​ສຳລັບ​ປີ​ນີ້ ແລະ ສະເໜີ​ໃຫ້​ເລີກ​ຄັນ​ຄູ​ທີ່​ຕັນ​ນ້ຳ​ໄວ້​ອອກ ແລະ ກຳຈັດ​ຜັກ​ຕົບ​ອອກ​ໃຫ້​ສຳເລັດ​ກ່ອນ ເພື່ອ​ເຮັດ​ໃຫ້​ນ້ຳ​ໄຫຼ​ສະດວກ​ດີ.

ນອກ​ນີ້ ທ່ານ​ເຈົ້າ​ຄອງ ຍັງ​ໄດ້​ແນະນຳ​ໃຫ້​ເມືອງ​ໄຊ​ເຊດ​ຖາ ສ້າງ​ຈຸດ​ຊື້ ແລະ ຈຳໜ່າຍ​ຜະລິດ​ຕະ​ພັນ​ສິນຄ້າ​ໂອ​ດ໊ອບ ແລະ ພືດ​ຜັກ​ປອດ​ສານພິດ ໂດຍ​ກຳນົດ​ເອົາ​ສູນ​ການ​ຄ້າ​ອາ​ຊຽນ​ມໍ ເປັນ​ບ່ອນ​ຈຳໜ່າຍ ຕື່ມ​ອີກ.

ຂ່າວທີ່ກ່ຽວຂ້ອງ