ນັກທຸລະກິດໄດ້ຮັບລາງວັນ ຜູ້ປະກອບການແມ່ຍິງດີເດັ່ນອາຊຽນ

114 17 ພ.ພ. 2018 ຂ່າວໜ້າ​ໜຶ່ງ
ນັກທຸລະກິດໄດ້ຮັບລາງວັນ ຜູ້ປະກອບການແມ່ຍິງດີເດັ່ນອາຊຽນ

ນັບ​ວ່າ​ເປັນ​ຂ່າວ​ດີ​ທີ່​ນັກທຸລະກິດ​ຍິງ​ລາວ ຈຳນວນ 9 ທ່ານ ໄດ້​ຮັບ​ລາງວັນ​ຜູ້​ປະກອບ​ການ​ແມ່ຍິງ​ດີເດັ່ນ​ໃນ​ລະດັບ​ອາ​ຊຽນ ປະຈຳ​ປີ 2018 ຖື​ວ່າ​ໄດ້​ຮັບ​ກຽດ​ອັນ​ສົ່ງ​ສູງ ແລະ ສ້າງ​ຜົນງານ​ອັນ​ໂດດ​ເດັ່ນ​ມາ​ໃຫ້​ປະເທດ​ຊາດ ກໍ່​ຄື​ປະຊາຊົນ​ລາວ​ບັນດາເຜົ່າ ໂດຍ​ສະເພາະແມ່ນ​ວົງ​ການ​ນັກທຸລະກິດ​ຍິງ​ລາວ ເຊິ່ງ​ມາ​ຮອດ​ປັດຈຸບັນ​ນີ້​ ມີ​ນັກທຸລະກິດ​ຍິງ​ລາວ​ໄດ້​ຮັບ​ລາງວັນ​ຜູ້​ປະກອບ​ການ​ແມ່ຍິງ​ດີເດັ່ນ ​ໃນ​ລະດັບ​ອາ​ຊຽນ ​ມີ​ທັງ​ໝົດ 21 ທ່ານ ໃນ​ນັ້ນ ປີ 2016 ມີ 9 ທ່ານ ຮັບ​ລາງວັນ​ຢູ່​ປະເທດ​ຫວຽດນາມ ປີ 2017 ມີ 3 ທ່ານ ຮັບ​ລາງວັນ​ຢູ່​ປະເທດ​ຟິ​ລິບ​ປິນ ແລະ ປີ 2018 ມີ 9 ທ່ານ​ຮັບ​ລາງວັນ​ຢູ່​ປະເທດ​ໄທ.

ພິທີ​ມອບ​ລາງວັນ​ຜູ້​ປະກອບ​ການ​ແມ່ຍິງ​ດີເດັ່ນ​ໃນ​ລະດັບ​ອາ​ຊຽນ ໄດ້​ຈັດ​ຂຶ້ນ​ຢູ່​ໃນ​ກອງ​ປະຊຸມ​ເຄືອ​ຄ່າຍ ຜູ້​ປະກອບ​ການ​ແມ່ຍິງ​ອາ​ຊຽນ ປະຈຳ​ປີ 2018 ຈັດ​ຂຶ້ນ​ວັນ​ທີ 10-11 ພຶດສະພາ 2018 ທີ່ບາງກອກ ປະເທດ​ໄທ ໂດຍ​ເປັນ​ປະທານ​ຂອງ​ທ່ານ​ນາງ ຄຸນ​ຍິງ ລັດ​ຕິ​ກາ ປະທານ​ເຄືອ​ຄ່າຍ​ຜູ້​ປະກອບ​ການ​ແມ່ຍິງ​ອາ​ຊຽນ ປະທານ​ສະມາຄົມ​ແມ່ຍິງ​ນັກທຸລະກິດ​ວິຊາ​ຊີບ ແຫ່ງ ຣາ​ຊະ​ອານາຈັກ​ໄທ ໃຫ້​ກຽດ​ເຂົ້າ​ຮ່ວມ​ໂດຍ​ທ່ານ​ພົນ​ເອກ ອາ​ນັນ​ຕະ​ພອນ ການ​ຈາ​ນາ​ຣັດ ລັດຖະມົນຕີ​ກະຊວງ​ການ​ພັດທະນາ​ສັງຄົມ ແລະ ຄວາມ​ໝັ້ນຄົງ​ຂອງ​ມະນຸດ ແຫ່ງ ຣາ​ຊະ​ອານາຈັກ​ໄທ ບັນດາ​ປະທານ​ສະມາຄົມ​ນັກທຸລະກິດ​ຍິງ ແລະ ນັກທຸລະກິດ​ຍິງ​ບັນດາ​ປະເທດ​ສະມາຊິກ​ອາ​ຊຽນ ສ່ວນ​ຄະນະ​ຜູ້​ແທນ​ລາວ​ນຳ​ໂດຍ​ທ່ານ​ນາງ ຈັນທະ​ຈອນ ວົງ​ໄຊ ປະທານ​ສະມາຄົມ​ນັກທຸລະກິດ​ແມ່ຍິງ​ລາວ ຄະນະ​ບໍລິຫານ​ງານ​ເຄືອ​ຄ່າຍ​ຜູ້​ປະກອບ​ການ​ແມ່ຍິງ​ອາ​ຊຽນ.

ສຳລັບ​ລາງວັນ​ຜູ້​ປະກອບ​ການ​ແມ່ຍິງ​ດີເດັ່ນ​ໃນ​ລະດັບ​ອາ​ຊຽນ ປະຈຳ​ປີ 2018 ໄດ້​ມີ​ນັກທຸລະກິດ​ຍິງ​ບັນດາ​ປະເທດ​ສະມາຊິກ​ອາ​ຊຽນ 90 ທ່ານ ​ໄດ້​ຮັບ​ລາງວັນ​ອັນ​ຊົງ​ກຽດ​ທີ່​ໄດ້​ນຳ​ເອົາ​ຊື່​ສຽງ​ມາສູ່​ປະເທດ​ຊາດ ກໍ່ຄືມາສູ່​ວົງ​ການ​ນັກທຸລະກິດ​ຍິງ​ ​ນັກທຸລະກິດ​ຍິງ​ລາວ ຈຳນວນ 9 ທ່ານ ທີ່​ໄດ້​ຮັບ​ລາງວັນ​ຄັ້ງ​ນີ້ປະກອບ​ມີ: ທ່ານ​ນາງ ບົວ​ວຽງ ເພັດ​ທະ​ລານ​ຄຳ ຜູ້ອຳນວຍການ​ບໍລິສັດ SETHA AGRICULTURAL SOLE CO.,LTD ທ່ານນາງ ດວງ​ຕາ ມາດ​ມະນີ​ສອນ ປະທານ​ບໍລິສັດ DM GROUP SOLE CO.,LTD ທ່ານ​ນາງ ດາ​ລີ​ວັນ ສິດ​ພະ​ໄຊ​ປະທານ​ບໍລິສັດ ພູ​ເງິນ​ການ​ຄ້າ​ຂາ​ເຂົ້າ-ຂາ​ອອກ ຈຳກັດ ທ່ານ​ນາງ ແກ່ນ​ຈັນ ບຸດ​ດາ​ວົງ ປະທານ​ກຸ່ມ​ບໍລິສັດ ຫົງ​ຄຳ​ພາກ​ໃຕ້​ ຈຳກັດ ທ່ານ​ນາງ ສີ​ວິ​ໄຊ ທັມມະ​ລັງສີ ຜູ້ອຳນວຍການ​ລາວ​ອິນ​ເຕີ​ຄລີ​ນິກ ທ່ານ​ນາງ ສຸດ​ສະ​ດີ ລື​ໄຊ ຜູ້ອຳນວຍການ​ບໍລິສັດ ລື​ໄຊ​ກໍ່ສ້າງ ຈຳກັດ ທ່ານ​ນາງ ຄອນ​ສະຫວັນ ໄຊ​ສຸ​ລຽນ ຜູ້​ອຳນວຍການ​ບໍລິສັດ INFOTECH CO.,LTD ທ່ານ​ນາງ ຈຳ​ປາທອງ ທະລົງ​ແສງ​ຈັນ ຜູ້ອຳນວຍການ​ບໍລິສັດ LAO INTERTRADE SOLE CO.,LTD ແລະ ທ່ານ​ນາງ ມະໂນ​ທິບ ສີ​ຣິ​ປະພັນ ຜູ້​ອຳນວຍ​ການ​ບໍລິສັດ ນາ​ຣີ​ກະເປົາ​ລາວ​ປະຍຸກ ເຊິ່ງ​ນັກທຸລະກິດ​ຍິງ​ລາວ ​ຈຳນວນ 9 ທ່ານ​ທີ່​ໄດ້​ຮັບ​ລາງວັນ​ອັນ​ຊົງ​ກຽດ​ລະດັບ​ອາ​ຊຽນ​ຄັ້ງ​ນີ້ ​ແມ່ນ​ເປັນ​ສະມາຊິກ​ຢູ່​ໃນ​ສະ​ມາຄົມ​ນັກທຸລະກິດ​ແມ່ຍິງ​ລາວ ແລະ ມາ​ຮອດ​ປັດຈຸບັນ​ ສະມາຄົມ​ນັກທຸລະກິດ​ແມ່ຍິງ​ລາວ ມີ​ສະມາຊິກ​ທັງ​ໝົດ​ໃນ​ທົ່ວປະເທດ 540 ຄົນ ໂດຍ​ລວມ​ແລ້ວ ນັບ​ແຕ່​ສ້າງຕັ້ງ​ສະມາຄົມ​ຂຶ້ນ​ມາ ໄດ້​ເຕີບ​ໃຫຍ່​ຂະຫຍາຍຕົວ​ໃນ​ການ​ເຕົ້າໂຮມ​ເອົາ​ບັນດາ​ຜູ້​ປະກອບ​ການ ກໍ່​ຄືນັກທຸລະກິດ​ຍິງ​ທົ່ວ​ປະເທດ​ເຂົ້າ​ມາ​ຢູ່​ໃນ​ການ​ຈັດຕັ້ງ​ເພື່ອ​ຊ່ວຍເຫຼືອ​ເຊິ່ງ​ກັນ ແລະ ກັນ​ໃນ​ວົງ​ການ​ທຸລະ​ກິດ ແລະ ມາ​ຮອດ​ປັດຈຸບັນ ນອກຈາກ​ມີ​ຂັ້ນ​ສູນ​ກາງ​ແລ້ວ ຍັງ​ມີ​ຂັ້ນ​ແຂວງ ແລະ ຂັ້ນ​ນະຄອນຫຼວງ​ຕື່ມ​ອີກ.

ຂ່າວທີ່ກ່ຽວຂ້ອງ