ລາວ-ກຳປູເຈຍ ຫາລືແກ້ໄຂບັນຫາຊາຍແດນ

202 17 ພ.ພ. 2018 ຂ່າວໜ້າ​ໜຶ່ງ

ໃນ​ວັນ​ທີ 16 ພຶດສະພາ 2018 ທີ່​ກະຊວງ​ການ​ຕ່າງປະເທດ ​ທ່ານ ສະເຫຼີມ​ໄຊ ກົມ​ມະ​ສິດ ລັດຖະມົນຕີ​ກະຊວງ​ການ​ຕ່າງປະເທດ ແຫ່ງ ​ສປປ ລາວ ໄດ້​ໃຫ້​ກຽດ​ຕ້ອນຮັບ ແລະ ພົບ​ປະ​ເຮັດ​ວຽກ​ກັບ​ທ່ານ ປຣາກ ໂຊ​ຄົນ ລັດຖະມົນຕີ​ກະຊວງ​ການ​ຕ່າງປະເທດ ແລະ ຮ່ວມ​ມື​ສາກົນ ແຫ່ງ ລາຊະ​ອານາຈັກ ກຳປູເຈຍ ການ​ພົບ​ປະ​ຄັ້ງ​ນີ້ ແມ່ນ​ປະຕິບັດ​ຕາມ​ເຈຕະນາ​ລົມ​ຂອງ​ສອງ​ລັດຖະບານ ກໍ່​ຄື​ຄຳ​ຕົກລົງ​ຂອງ​ສອງ​ນາຍົກລັດຖະມົນຕີ​ລາວ ແລະ ກຳປູເຈຍ ທີ່​ໄດ້​ມອບ​ໝາຍ​ໃຫ້​ກະຊວງ​ການ​ຕ່າງປະເທດ​ຂອງ​ທັງ​ສອງ​ປະເທດ ປຶກສາ​ຫາລື​ຮ່ວມ​ກັນ ເພື່ອ​ຊອກ​ວິທີ​ແກ້​ໄຂ​ບັນຫາ​ຊາຍ​ແດນ​ທີ່​ຍັງ​ຄົງ​ຄ້າງ ລະຫວ່າງ​ສອງ​ປະເທດ​ໃຫ້​ມີ​ຄວາມ​ຄືບ​ໜ້າ ແລະ ກ້າວ​ໄປ​ສູ່​ຄວາມ​ສຳເລັດ​ຕະຫຼອດ​ເສັ້ນ​ຊາຍ​ແດນ​ທີ່​ຍັງ​ເຫຼືອ​ຢູ່ 14% ຂອງ​ລວງ​ຍາວ​ເສັ້ນ​ຊາຍ​ແດນ​ທັງ​ໝົດ 535 ກິໂລແມັດ ໃນ​ໂອກາດ​ດັ່ງກ່າວ​ນີ້ ສອງ​ຝ່າຍ​ໄດ້​ຮ່ວມ​ກັນ​ຕີ​ລາຄາ​ສູງ​ຕໍ່​ຜົນສຳເລັດ​ໃນ​ຂອບ​ການ​ຮ່ວມ​ມື​ຕ່າງໆ ພ້ອມ​ຍັງ​ໄດ້​ແລກປ່ຽນ​ທັດສະນະ​ກ່ຽວ​ກັບ​ວຽກ​ງານ​ສຳ​ຫຼວດ ແລະ ປັກ​ຫຼັກ​ໝາຍ​ຊາຍ​ແດນ ໂດຍ​ໄດ້​ເປັນ​ເອກະ​ພາບ​ກັນ​ຈະ​ສືບຕໍ່​ຊຸກຍູ້​ໃຫ້​ຄະນະ​ກຳມະການ​ຊາຍ​ແດນ ລາວ-ກຳປູເຈຍ ກຳປູເຈຍ-ລາວ ພົບ​ປະ​ປຶກສາ​ຫາລື​ກັນ​ໃຫ້​ຫຼາຍ​ຂຶ້ນ ເພື່ອ​ພ້ອມ​ກັນ​ແກ້​ໄຂ​ບັນຫາ​ຊາຍ​ແດນ​ທີ່​ຍັງ​ຄົງ​ຄ້າງ​ລະຫວ່າງ​ສອງ​ປະເທດ ໃຫ້​ສຳເລັດ​ໃນ​ເວລາ​ອັນ​ຄວນ ພ້ອມ​ດຽວ​ກັນ​ນີ້ ສອງ​ຝ່າຍ​ຈະ​ສ້າງຕັ້ງ​ກົນ​ໄກ​ປະສານ​ງານ​ຂັ້ນ​ກົມ​ກ່ຽວຂ້ອງ​ຂອງ​ກະຊວງ​ການ​ຕ່າງປະເທດ​ທັງ​ສອງ​ປະເທດ ຮ່ວມ​ກັນ​ຕື່ມ​ອີກ ທັງ​ນີ້ ເພື່ອ​ເປັນ​ການ​ປະກອບສ່ວນ​ເຮັດ​ໃຫ້​ບໍລິເວນ​ຊາຍ​ແດນ​ມີ​ຄວາມ​ສະຫງົບ ແລະ ມີ​ສະຖຽນ​ລະ​ພາບ ເພື່ອ​ເຮັດ​ໃຫ້ການ​ພົວພັນ​ຮ່ວມ​ມື​ລະຫວ່າງ​ສອງ​ຝ່າຍ ກັບ​ຄືນ​ສູ່​ສະພາບ​ທີ່​ເປັນ​ປົກກະຕິ​ດັ່ງ​ທີ່​ເຄີຍ​ມີ​ມາ​ແຕ່​ກ່ອນ ການ​ພົບ​ປະ​ປຶກສາ​ຫາລື​ໄດ້​ດຳເນີນ​ໄປ​ດ້ວຍ​ບັນຍາກາດ​ໄມຕີ​ຈິດ​ມິດຕະພາບ ຖານ​ບ້ານ​ໃກ້​ເຮືອນ​ຄຽງ​ທີ່​ມີ​ມູນເຊື້ອ​ອັນ​ດີງາມ​ນຳ​ກັນ​ມາ​ແຕ່​ບູຮານ​ນະ​ການ.

ຂ່າວທີ່ກ່ຽວຂ້ອງ