ຈັດກິດຈະກຳສົ່ງເສີມວັດທະນະທຳອັນດີງາມ

95 17 ພ.ພ. 2018 ຂ່າວໜ້າ​ໜຶ່ງ
ຈັດກິດຈະກຳສົ່ງເສີມວັດທະນະທຳອັນດີງາມ

ປະເທດ​ລາວ​ເຮົາ​ປະກອບ​ມີຫຼາຍ​ຊົນເຜົ່າ ແລະ ແຕ່​ລະ​ຊົນເຜົ່າ​ຈະ​ມີ​ເອກະລັກ​ການ​ນຸ່ງ​ຖື​ທີ່​ແຕກ​ຕ່າງ​ກັນ ສະເພາະ​ຊົນເຜົ່າ​ໄຕ​ແດງ​ແຂວງ​ຫົວພັນ ກໍ່​ມີ​ຊຸດ​ຊົນເຜົ່າ​ຂອງ​ຕົນ​ເອງ ​ເອີ້ນ​ວ່າ ຊຸດ​ຊົນເຜົ່າ​ໄຕ​ແດງ ເພື່ອ​ເປັນ​ການ​ອະນຸ​ຮັກ​ຮັກສາ​ວັດທະນະທຳ​ຮີດຄອງ​ປະເພນີ​ອັນ​ດີງາມ ການ​ນຸ່ງ​ຖື​ແຕ່​ລະ​ຊົນເຜົ່າ ​ກໍ່​ໄດ້​ພ້ອມ​ກັນ​ອະນຸ​ຮັກ​ສົ່ງເສີມ​ຊຸດ​ຊົນເຜົ່າ​ຂອງ​ຕົນ​ຢ່າງ​ຕໍ່​ເນື່ອງ ມາ​ຮອດ​ປັດຈຸບັນ ​ໃຫ້​ເຊັ່ນ​ລູກ​ເຊັ່ນ​ຫຼານ​ໄດ້​ສືບ​ທອດ​ຕໍ່ໆກັນ​ໄປ ໃນ​ນັ້ນ ກໍ່​ມີ​ຊຸດ​ຊົນເຜົ່າ​ໄຕ​ແດງ​ທີ່​ໄດ້​ສືບ​ທອດ​ກັນ​ມາ​ຍາວ​ນານ.

ວັນ​ທີ 13 ພຶດສະພາ 2018 ທ່ານ​ນາງ ແກ້ວ​ສະຫວ່າງ ພາ​ວົງສາ ເຈົ້າ​ຂອງ​ຮ້ານຂາຍ​ຊຸດ​ຊົນເຜົ່າ​ໄຕ​ແດງ​ບ້ານ​ເຮົາ ບ້ານ​ຊຳ​ເກດ ເມືອງ​ສີ​ໂຄດ​ຕະບອງ ນະຄອນຫຼວງ​ວຽງ​ຈັນ ໄດ້​ນຳ​ເອົາ​ບ່າວ-ສາວ​ນຸ່ງ​ເຄື່ອງ​ຊຸດ​ຊົນເຜົ່າ​ໄຕ​ແດງ ຍິງ-ຊາຍ ຈຳນວນ​ຫຼາຍ​ຊຸດ​ ມາ​ຖ່າຍ​ທຳ​ຢູ່​ສວນ​ບ້ານ​ມະນີ​ຈັນ ທີ່​ຕັ້ງ​ຢູ່​ບ້ານ​ດ່ານ​ຊ້າງ ເມືອງ​ໄຊ​ທານີ ເຊິ່ງ​ເປັນ​ສະຖານທີ່​ທ່ອງ​ທ່ຽວ​ແຫ່ງ​ໜຶ່ງ​ ທີ່​ມີ​ເຄື່ອງມື​ການ​ທຳ​ມາ​ຫາ​ກິນ​ຂອງ​ຊົນເຜົ່າ​ໃນ​ຍຸກ​ກ່ອນ ​ທີ່​ກົມ​ກືນ​ກັບ​ຊຸດ​ຊົນເຜົ່າ​ໄຕ​ແດງ ແລະ ກິດຈະກຳ​ຄັ້ງນີ້ ​ກໍ່​ເພື່ອ​ເປັນ​ການ​ຊຸກຍູ້​ສົ່ງເສີມ​ວັດທະນະທຳ​ອັນ​ດີງາມ​ຂອງ​ຊາດ​ຂອງ​ຊົນເຜົ່າ​ໃຫ້​ສັງຄົມ ກໍ່​ຄືຄົນ​ຮຸ່ນ​ຫຼັງ​ໄດ້​ເຫັນ​ໄດ້​ສືບ​ທອດ ແລະ ເປັນ​ກິດຈະກຳ​ໜຶ່ງ​ປະກອບສ່ວນ​ໃນ​ໂອກາດ​ເປີດ​ປີ​ທ່ອງ​ທ່ຽວ​ລາວ 2018 ໃຫ້​ເປັນ​ຂະ​ບວນ​ຟົດຟື້ນ​ຢ່າງ​ກວ້າງຂວາງ.

ທ່ານ​ນາງ ແກ້ວ​ສະຫວ່າງ ພາ​ວົງສາ ໄດ້​ກ່າວ​ວ່າ: ກ່ອນ​ຈະ​ມາ​ລິ​ເລີ່ມ​ເຮັດ​ຊຸດ​ຊົນເຜົ່າ ​ຍ້ອນ​ມີ​ການ​ສືບ​ມູນ​ຈາກ​ພໍ່​ແມ່​ທີ່​ມີ​ເຊື້ອສາຍ​ມາ​ແຕ່​ແຂວງ​ຫົວພັນ ​ທີ່​ສະແດງ​ອອກ​ບ່ອນ​ສຳນຽງ​ສຽງ​ປາກ​ເວົ້າ ຕໍ່​ມາ​ເຫັນ​ວ່າ​ມັກ​ຮັກ​ຮີດຄອງ​ປະເພນີ​ອັນ​ດີງາມ ແລະ ອະນຸ​ຮັກ​ຮັກສາ​ການ​ນຸ່ງ​ຖື​ ກໍ່​ມີ​ແນວ​ຄວາມ​ຄິດ​ເຮັດ​ຊຸດ​ຊົນເຜົ່າ​ຂຶ້ນ​ມາ​ເປັນ​ການ​ອະນຸ​ຮັກ ສົ່ງເສີມ​ໃຫ້​ຮຸ່ນ​ລູກ​ຮຸ່ນ​ຫຼານ​ໄດ້​ຊົມ​ໄດ້​ເບິ່ງ​ເປັນ​ການ​ສືບ​ທອດ​ຕໍ່ໆ​ໄປ ເອີ້ນ​ວ່າການ​ສືບ​ສານ​ຮຸ່ນ​ຕໍ່​ຮຸ່ນ ໃນ​ນາມ​ເປັນ​ຜູ້​ໜຶ່ງ​ລູກບ້ານ​ຫຼານ​ເມືອງ​ເກີດ​ຢູ່​ບ້ານ​ນາ​ກາງ ເມືອງ​ເຟືອງ ແຂວງ​ວຽງ​ຈັນ ເປັນ​ເຊື້ອສາຍ​ຊົນເຜົ່າ​ໄຕ​ແດງ ຕົ້ນ​ກຳເນີດ​ມາ​ຈາກ​ແຂວງ​ຫົວພັນ ດ້ວຍ​ການ​ຮັກ​ມັກ​ຊຸດ​ຊົນເຜົ່າ​ໄຕ​ແດງ ແລະ ໄດ້​ລິ​ເລີ່ມ​ເຮັດ​ຊຸດ​ຊົນເຜົ່າ​ໄຕ​ແດງ​ມາ​ແຕ່​ປີ 2016 ເປັນຕົ້ນ​ມາ ເຊິ່ງ​ຊຸດ​ຊົນເຜົ່າ​ຈະ​ມີ​ຊຸດ​ຍິງ-ຊາຍ ທີ່​ເປັນ​ເຄື່ອງນຸ່ງ​ສິ້ນ​ເຫຼືອ​ເສື້ອ​ບໍ່​ພໍ ສະເພາະ​ເຄື່ອງ​ຜູ້ຍິງ ມີ​ຜ້າແພ​ປົກ​ຫົວ ມີ​ລິ້ງ​ລາຍ​ທີ່​ສະແດງ​ໃຫ້​ເຫັນ​ກ່ຽວ​ກັບ​ສັດສາ​ວາ​ສິ່ງ ສ່ວນ​ຜູ້​ຊາຍ​ມີ​ແພ​ຄາດ​ຫົວ​ຮັດ​ແອວ ພ້ອມ​ທັງ​ມີ​ຊຸດ​ປະດັບ​ຍິງ-ຊາຍ​ຈະ​ມີ​ປອກ​ຄໍ-ປອກ​ແຂວນ ຕຸ້ມ​ຫູ ສຽນ​ປັກ​ຜົມ​ເປັນ​ຊຸດ​ກອບ​ປີ້​ໃຊ້​ທອງ​ຍ້ອມ​ນ້ຳ​ເງິນ.

ຂ່າວທີ່ກ່ຽວຂ້ອງ