ບໍລິສັດ BST ມອບເຄື່ອງບັນເທົາທຸກໃຫ້ປະຊາຊົນ ບ້ານສັນແຟນ

247 17 ພ.ພ. 2018 ຂ່າວໜ້າ​ໜຶ່ງ
ບໍລິສັດ BST ມອບເຄື່ອງບັນເທົາທຸກໃຫ້ປະຊາຊົນ ບ້ານສັນແຟນ

ບໍລິສັດ BST ໄດ້​ນຳ​ເອົາ​ເຄື່ອງ​ອຸປະໂພກ-ບໍລິໂພກ ໄປ​ມອບ​ໃຫ້​ແກ່​ປະຊາຊົນ​ບ້ານ​ສັນ​ແຟນ (ກຸ່ມ​ນ້ຳ​ລ້ຽງ) ເມືອງ​ຄຳ ແຂວງ​ຊຽງ​ຂວາງ ທີ່​ປະສົບ​ກັບໄຟ​ໄໝ້​ເຮືອນ ໃນ​ເວລາ​ປະມານ 16:00 ໂມງ​ຂອງ​ວັນ​ທີ 7 ພຶດສະພາ 2018 ຜ່ານ​ມາ ພິທີ​ມອບ-ຮັບ​ໄດ້​ຈັດ​ຂຶ້ນ​ໃນ​ວັນ​ທີ 15 ພຶດສະພາ 2018 ຜ່ານ​ມາ​ນີ້ ທີ່​ບ້ານ​ດັ່ງກ່າວ ໃຫ້​ກຽດ​ກ່າວ​ມອບ​ໂດຍ​ທ່ານ ຖານ​ຈື້​ເສິນ ປະທານ ກຸ່ມ​ບໍລິສັດ BST ແລະ ຕາງໜ້າ​ໃຫ້​ອຳນາດ​ການ​ປົກຄອງ ແລະ ປະຊາຊົນ ກ່າວ​ຮັບ​ໂດຍ​ທ່ານ ລີ​ທໍ່ ຫົວໜ້າ ກຸ່ມ​ນ້ຳ​ລ້ຽງ ໂດຍ​ມີ​ອຳນາດ​ການ​ປົກຄອງ ພ້ອມ​ດ້ວຍ​ພະນັກງານ​ກ່ຽວຂ້ອງ ແລະ ປະຊາຊົນ​ເຂົ້າ​ຮ່ວມ.

ເຄື່ອງ​ອຸປະໂພກ-ບໍລິໂພກ ທີ່​ທາງ​ບໍລິສັດ BST ໄດ້​ນຳໄປ​ມອບປະກອບ​ມີ ເຂົ້າສານ ອາຫານ​ແຫ້ງ ນ້ຳ​ດື່ມ ແລະ ເຄື່ອງໃຊ້​ໃນ​ຄົວ​ເຮືອນ ລວມ​ມູນ​ຄ່າ 100 ລ້ານ​ກີບ ການ​ຊ່ວຍເຫຼືອ​ບັນເທົາ​ທຸກ​ປະຊາຊົນ​ບ້ານ​ດັ່ງກ່າວ​ນີ້ ຖື​ວ່າ​ເປັນ​ການ​ຊ່ວຍເຫຼືອ​ທີ່​ສຳຄັນ​ໃຫ້​ແກ່​ສັງຄົມ ກໍ່​ຄືປະຊາຊົນ ແລະ ຄອບຄົວ​ທີ່​ໄດ້​ຮັບ​ຜົນ​ກະທົບ​ຈາກ​ອັກຄີ​ໄພ ບ້ານ​ສັນ​ແຟນ ເປັນ​ບ້ານ​ເຜົ່າ​ລາວ​ຜ້ອງ ຂຶ້ນ​ກັບ (ກຸ່ມ​ນ້ຳ​ລ້ຽງ) ຕັ້ງ​ຢູ່​ເຂດ​ຫ່າງ​ໄກ​ສອກຫຼີກຈາກ​ເມືອງ​ຄຳ ປະມານ 74 ກິໂລແມັດ ໄດ້​ເກີດ​ເຫດ​ໄຟ​ໄໝ້​ເຮືອນປະຊາຊົນ​ເສຍ​ຫາຍ 32 ຫຼັງ ຂອງ​ຈຳນວນ​ທັງ​ໝົດ 44 ຫຼັງ ປັດຈຸບັນ ປະຊາຊົນ 300 ກວ່າ​ຄົນ ຂາດ​ທີ່ຢູ່​ອາໄສ ແລະ ຕ້ອງການ​ຄວາມ​ຊ່ວຍເຫຼືອ​ຢ່າງ​ຮີບ​ດ່ວນ ທ່ານ​ປະທານ​ກຸ່ມ​ບໍລິສັດ BST ກ່າວ​ວ່າ: ຈະ​ສືບຕໍ່​ປຸກລະດົມ​ຈາກ​ຫຼາຍ​ພາກສ່ວນ​ໃນ​ສັງຄົມ ​ໃຫ້ການ​ຊ່ວຍເຫຼືອ​ຕື່ມ​ອີກ​ໃນ​ສະເພາະ​ໜ້າ.

ຂ່າວທີ່ກ່ຽວຂ້ອງ